މައްކާއަށް ނިސްބަތްވާ އަންހެން ކުއްޖެއްގެ ދިރިއުޅުމުގެ ވާހަކަތައް ކިޔާދޭ ރެޕް ލަވައެއް ކަމަށްވާ "ބިންތް މައްކާ" ލަވަ ކިޔާފައިވާ ލަވަކިއުންތެރިޔާ ހައްޔަރު ކުރުމަށް މައްކާގެ ގަވަރުނަރު އަމުރެއް ނެރެފިއެވެ.
ސައުދީއަށް ނިސްބަތްވާ އަޔާސިލް ސްލޭ ހައްޔަރު ކުރުމަށް އަމުރު ނެރިފައިވަނީ މި ލަވައިގެ ސަބަބުން މައްކާގެ މުޤައްދަސް ބިމުގެ ޙުރުމަތް ކެނޑޭކަމަށާއި، މައްކާގެ އާދަކާދައާއި ސަޤާފަތަށް ހުތުރުވާކަމަށް ބުނެއެވެ.
މައްކާގެ ގަވަރނަރާ ހަވާލާދީ އަލްޖަޒީރާގައި ރިޕޯޓް ކޮށްފައިވާގޮތުން މި ލަވައިގައި މައްކާ އަންހެނުންނަށް ތައުރީފު ކުރުމުގެ ގޮތުން މުޖުތަމައުގެ އާންމު މިންގަނޑުތަކާއި ޚިލާފުވާގޮތަށް ވާހަކަތައް ވަނީ ދައްކާފައެވެ. އެގޮތުން ސައުދީއަރަބިއާގެ އެހެން ހިސާބުތަކުގައި އުޅޭ އަންހެނުންނަށް ޤަދަރު ކުޑަވާ ބީދައިން މައްކާގެ އަންހެނުންނަށް ތައުރީފުކޮށް މި ލަވައިގައި ވާހަކަތައް ހިމެނޭކަމަށް ރިޕޯޓްތައް ބުނެއެވެ.
މިސާލެއްގެ ގޮތުން މައްކާ އަންހެން ކުއްޖަކާއެކު ދީނުގެ ސުންނަތް ފުރިހަމަކޮށް, ކައިވެނީގެ ގުޅުމާ ހަމައަށް ގޮސް ދިރިއުޅުން ކާމިޔާބުވާނެ ކަމަށް ބުނެފައިވާތީ ގިނަ ބަޔަކު ދަނީ އެކަމަށް ފާޑުކިޔަމުންނެވެ. އަދި މި ލަވައިގައި ނަސްލީ ތަފާތުކުރުން ހިމެނޭ ކަމަށް ބުނެ ބައެއް ފަރާތްތަކުން ކަންބޮޑުވުން ފާޅުކޮށްފައިވެއެވެ.
ނަަމަވެސް އެކަމާ ގުޅިގެން ގިނަ ބަޔަކު ދަނީ ޓްވިޓަރގައި އެކި ޙިޔާލު ފާޅުކުރަމުންނެވެ. އެގޮތުން މިއީ މުނިފޫހި ފިލުވުމުގެ ދާއިރާގައި އުޅޭ ފަންނާނުންނާ "ޖައްސާލުން" ކަމުގައި ބައެއް ފަރާތްތަކުން ސިފަ ކުރެއެވެ.
