އެމެރިކާއާއި އީރާނުގެ މައްސަލައާއި ގުޅޭގޮތުން މަޝްވަރާ ކުރުމަށް މައްކާގައި ބާއްވާ ސަމިޓަށް ސައޫދީ އަރަބިއްޔާއިން ގަތަރުގެ އަމީރު ޝައިޚް ތަމީމް ބުނި ހަމަދު އައްޘާނީއަށް ދައުވަތު ދެއްވައިފިއެވެ.

މި ބައްދަލުވުމަކީ އެމެރިކާއާއި އީރާނުގެ މައްސަލައިގެ އިތުރުން ސައުދީ އަދި ޔޫއޭއީގެ ތެޔޮ ޓޭންކަރުތަކަށް ދެވުނު ހަމަލާތަކާއި، ސައުދީ ތެޔޮ ޕަމްޕްތަކަށް ދެވުނު ހަމަލާތަކާ ގުޅޭގޮތުން އަޅާނެ ފިޔަވަޅުތަކެއް ނިންމުމަށް މަޝްވަރާ ކުރުމަށް ސައުދީ ރަސްގެފާނު ބާއްވާ ބައްދަލުވުންތަކެވެ.

މެއިމަހުގެ 30 ވަނަ ދުވަހު މައްކާގައި ބާއްވާ ދެ ސަމިޓަށް ސައުދީ ރަސްގެފާނު ސަލްމާން ވަނީ، ގަލްފް ގައުމުތަކުގެ ވެރިންނާއި، އަރަބި ލީގުގެ ވެރިންނަށް ވެސް ދައުވަތު ދެއްވާފައެވެ.

އީރާނާއި އެކު ގަތަރުން ގުޅުން ބާއްވާތީ، ޓެރަރިޒަމަށް ތާއީދުކުރާތީ ކަމަށް ބުނެ ސައޫދީ އަރަބިއްޔާއިން 2017 ވަނަ އަހަރުން ފެށިގެން އޮންނަނީ ގަތަރާ ސިޔާސީ ގުޅުން ކަނޑާލައި، ގަތަރު އެކަހެރިކޮށް އިގްތިސާދީ ގޮތުންވެސް ބާކީ ކޮށްލާފައެވެ.

މައްކާގައި ބޭއްވުމަށް ހަމަޖެހިފައިވާ ބައްދަލުވުންތަކުގައި ބައިވެރިވުމާމެދު ގަތަރުން އަދި ވަކި ގޮތެއް ނުނިންމައެވެ. ސަމިޓްގައި ބައިވެރިވެވަޑައި ގަތުމާމެދު ގަތަރުގެ އަމީރު ވެސް ވަކި އެއްޗެއް ވިދާޅު ނުވާކަން ފާހަގަ ކޮށްލެވެއެވެ.