އަލުން ފުޓުބޯޅައިގެ މަސައްކަތް ކުރަން ބޭނުން: ޕްލެޓިނީ
22 ފެބުރުއަރީ 2020 | ހޮނިހިރު 08:47ޕްލެޓިނީ ވިދާޅުވީ ފުޓުބޯޅައިގައި މަސައްކަތްކުރުމަކީ އޭނާ އަބަދުވެސް ކުރާނެ ކަމެއް
މިޝެލް ޕްލެޓިނީ
ނުހައްގުން އޭނާއަށް ދިން އަދަބުގެ ސަބަބުން ފުޓުބޯޅަ އާއިލާގެމެދުގައި އޭނާގެ އިތުބާރު ވަރަށް ބޮޑަށް ގެއްލިފައިވާ ކަމަށާއި، އެ އިތުބާރު ދަމަހައްޓަން އަލުން ފުޓުބޯޅައިގައި މަސައްކަތްކުރަން ބޭނުންވާ ކަމަށް ޔޫއެފާގެ ކުރީގެ ރައީސް މިޝެލް ޕްލެޓިނީ ވިދާޅުވެއްޖެއެވެ.
އިނގިރޭސި މަޝްހޫރު ނޫސް ދި ޓައިމްސް އަށް ދިން އިންޓަވިއުގައި ޕްލެޓިނީ ވިދާޅުވީ ފުޓުބޯޅައިގައި މަސައްކަތްކުރުމަކީ އޭނާ އަބަދުވެސް ކުރާނެ ކަމެއް ކަމަށާއި، ނަމަވެސް ވިސްނުން ހުރީ ކުލަބަކަށް ވުރެ މަތީ މަގާމެއްގައި މަސައްކަތް ކުރުން ކަމަށެވެ. އެގޮތުން ޕްލެޓިނީ ވިދާޅުވީ ގައުމެއްގެ ފުޓުބޯޅަ އެސޯސިއޭޝަން، ޔޫއެފާ، ނޫންނަމަ ފިފްޕްރޯ މިއީ، ކުރިޔަށް އޮތް ތިން އަހަރުތެރޭގައި އޭނާ މަސައްކަތްކުރަން ޝައުގުވެރިވާ ދިމާތައް ކަމަށާއި، މީގެން ތަނެއްގައި މަސައްކަތް ކުރަން އޭނާ އަށް ލިބިއްޖެ ނަމަ، ރަނގަޅު ކަންތައްތަކެއް ކުރެވޭނެ ކަމުގެ ޔަގީންކަން އެބައޮތް ކަމަށެވެ.
މި ވަގުތަށް ބަލާއިރު އޭނާ މަގާމަކަށް ހަވާލުވުމަށް ފީފާއިން ހުރަސްތަކެއް އަޅާނެ ކަމަށާއި، ނަމަވެސް ދުވަސްތައް ކުރިޔަށްދާ ވަރަކަށް ކަންތައްތައް ބަދަލުވާނެ ކަމަށްވެސް ޕްލެޓިނީ ވިދާޅުވިއެވެ.
ޕްލެޓިނީ ސަސްޕެންޑްކުރީ އޭނާ އާއި ފީފާގެ ކުރީގެ ރައީސް ސެޕް ބްލެޓާ މަގާމުގެ ނުފޫޒު ބޭނުންކޮށް 2011 ވަނަ އަހަރު ކޮރަޕްޝަނުގެ ގޮތުގައި ދެ މިލިއަން ޑޮލަރުގެ މުއާމަލާތެއް އެއްބަސްވުމުގެ ބޭރުން ހިންގާފައިވާތީ އެވެ. މިއާއެކު ޕްލެޓިނީއަށް މި މައްސަލައިގައިވަނީ 8 އަހަރުގެ ސަސްޕެންޝަނެއް އައިސްފައެވެ. އެ މައްސަލަ އެޕީލްކޮށް ލިބުނު ލުޔާއެކު ޕްލެޓިނީ ވަނީ މިދިޔަ އަހަރުގެ އޮކްޓޫބަރު މަހުގައި އޭނާއަށް ދިން ސަސްޕެންޝަން އެއްކޮށް ފުރިހަމަކޮށްފައެވެ.
