ވުހާންގެ ހޮސްޕިޓަލެއްގެ ޑިރެކްޓަރު އަދި ނާރުގެ ހާއްސަ ޑޮކްޓަރެއް ކޮރޯނާވައިރަސްގައި މަރުވެއްޖެ
ލިއުގެ މަރާއެކު ޑޮކްޓަރުންނާއި ނަރުހުން ލައްވާ ހުއްޓުމެއްނެތި މަސައްކަތް ކުރަމުންދާކަމުގެ ތުހުމަތު އަނެއްކާވެސް ކުރެވިގެންދާނެކަމަށް ބެލެވޭ
ޗައިނާގެ ސިޓީއެއްގައި ނަރުހުންނާއި ޑޮކްޓަރުންތަކެއް ހަރަކާތްތެރިވަނީ
އެންކޯވް-19 ނުވަތަ ނޮވެލް ކޮރޯނާވައިރަސް ފެތުރިގެން އައި ޗައިނާގެ ހުބޭ ޕްރޮވިންސްގެ ވުހާން ސިޓީގެ ވުޗަންގ ހޮސްޕިޓަލްގެ އެންމެ ސީނިއާ ހެލްތް ވޯކަރު، ނާރުގެ ހާއްސަ ޑޮކްޓަރު އަދި އެ ހޮސްޕިޓަލުގެ ޑިރެކްޓަރުކަން ކުރެއްވި ލިއު ޒިމިންގ ކޮރޯނާވައިރަސް ޖެހިގެން ފަރުވާ ހޯދަމުން ދަނިކޮށް އަންގާރަ ދުވަހު މަރުވެއްޖެއެވެ.
ލިއު މަރުވިކަން ހާމަކޮށްފައިވަނީ ލޯކަލް ގަވަމަންޓް އޮތޯރިޓީން އާންމުކުރި ބަޔާނެއްގައެވެ. ބައިނަލްއަގުވާމީ މިޑިއާތައް ހަބަރުފަތުރާ ގޮތުން ލިއުގެ މަރާއެކު ޗައިނާގެ ސަރުކާރުން ކޮރޯނާވައިރަސްއާއި ގުޅިގެން އެންމެ އެކަށީގެންވާ ފިޔަވަޅުތަކެއް އަޅަމުން ނުދާކަމުގެ ތުހުމަތު އަނެއްކާވެސް ކުރަން ފެށުމަކީ އެކަށީގެންވާ ކަމެކެވެ.
އަދި ފުރަންޓް ލައިންގައި މަސައްކަތްކުރާ ސިއްހީ މަސައްކަތްތަތެރިން ހުއްޓުމެއްނެތި ކުރަމުންދާ މަސައްކަތް ނުވަތަ މާގިނައިން މަސައްކަތް ކުރަމުންދާ މައްސަލައަށް ހައްލެއް ނުގެނެސް ކުރިން އޮތްގޮތަށް ކަންކަން އަދިވެސް ކުރަމުންދާކަމުގެ ތުހުމަތު އަނެއްކާވެސް ކުރެވެން ފެށިދާނެކަމަށް ހަބަރުތައް ބުނެއެވެ.
ކޮރޯނާވައިރަސްގެ ސަބަބުން މަރުވާ ނަރުހުންނާއި ޑޮކްޓަރުންގެ އަދަދު އިތުރުވަމުންދާއިރު، ޗައިނާއިން ވަނީ ބަލީގައި މަރުވާ އަދި މަސައްކަތުގެ މާހައުލުގައި މަރުވާ ނަރުހުންނާއި ޑޮކްޓަރުންނަކީ ޝަހީދުންގެ ލަގަބު ލިބޭނެ ބައެއް ކަމަށް ކަނޑައަޅާފައެވެ.
