މޮޅެތި ކުޅުންތެރިންނެއް ނުގަންނަން، މޮޅެތި ކުޅުންތެރިން އުފައްދަނީ

ޖަރުމަނުގެ ގަދަ ބާރެއް ކަމުގައިވާ ބްރޫޝިއާ ޑޯޓްމުންޑަކީ ޒުވާން ކުޅުންތެރިން އުފެއްދުމުގައި މަޝްހޫރު ކްލަބެކެވެ. ޒުވާން ސްކޮޑަކާއިއެކު ލީގުގެ ދެންތިބި ކްލަބުތަކާއި ޖެހިލުމެއް ނެތި ވާދަކުރާއިރު ޑޯޓްމުންޑުން މި ފަހަކަށްއައިސް އެ ކްލަބަށް ނަން މަޝްހޫރު މޮޅެތި ކުޅުންތެރިން ނުގެންނައިރު އެ ކްލަބުން އަންނަނީ ޒުވާން ގިނަ ކުޅުންތެރިން ގަނެ ފުރަތަމަ އެގާރައިން އެކުޅުންތެރިންނަށް ފުރުސަތު ދެމުންނެވެ.

މި ގޮތަށް އެ ކްލަބަށް ގެނައި އެއް ކުޅުންތެރިޔަކީ ޖޭޑަން ސަންޗޯއެވެ. ކްލަބާއި ގުޅުނުތާ އަދި ދެ އަހަރު ނުވާ ސަންޗޯ އަންނަނީ މިހާރު ޖަރުމަން ލީގުގައި ރެކޯޑުިތައް ހަދަމުންނެވެ. އެގޮތުން އޭނާ ވެގެން ގޮސްފައިވަނީ ހަގު އުމުރުގައި 22 ހަށް ވުރެ ގިނަ ލަނޑު ހަމަކުރި ފުރަތަމަ ކުޅުންތެރިޔާއަށެވެ. އިނގިރޭސި މަޝްހޫރު ކްލަބު މެންޗެސްޓާ ސިޓީން އޭނާ ޑޯޓްމުންޑްއަށް ބަދަލުވީ 10 މިލިއަން ޕައުންޑަށެވެ.

ޑޯޓްމުންޑްގެ ކުރީގެ ކުޅުންތެރިޔާ އަދި އެ ކްލަބުގެ މިހާރުގެ ޔޫތު ޓީމުގެ ހެޑް ލާސް ރިކެން ބުނީ ޑޯޓްމުންޑުން ޒުވާން ކުޅުންތެރިން ގެންނަންފެށީ އަގު ހެޔޮވުމުން ނޫން ކަމަށާއި ކްލަބުން މިހާރު އެންމެ ބޮޑަށް އިސްކަމެއްދޭ ކަމަކީ ޒުވާން ކުޅުންތެރިން އުފެއްދުން ކަމަށެވެ. އަދި މި ގޮތަށް ޒުވާން ކުޅުންތެރިން އުފެއްދުމުން ކްލަބަށް މާލީ ގޮތުން ވެސް ބޮޑެތި ފައިދާތަކެއްވާ ކަމަށާއި ޒުވާން ކުޅުންތެރިން ދެ ސީޒަނެއް ވަރު ކުޅެލުމުން ޔޫރަޕުގެ ބޮޑެތި ކްލަބުތަކަށް އެކުޅުންތެރިން ބޮޑު އަގުގައި ވިއްކައިލެވޭ ކަމަށެވެ.

ޑޯޓްމުންޑުން ސަންޗޯ ވިއްކައިލުމަށް ނިންމައިފައިވާއިރު، އޭނާ ވިއްކާނީ 100 މިލިއަން ޕައުންޑަށް ވުރެ ބޮޑުކޮށް ކަމަށް ޑޯޓްމުންޑުން ވަނީ އިއުލާން ކޮށްފައެވެ. މީގެ އިތުރުން ނިމިދިޔަ ޓްރާންސްފާ ބާޒާރުގައި ޑޯޓްމުންޑުން ވަނީ އެމެރިކާގެ ޒުވާން ކުޅުންތެރިޔާ ކްރިސްޓެން ޕުލިސިޗް 20، ޗެލްސީއަށް ބޮޑު އަގުގައި ވިއްކާލައިފައެވެ. އޭނާ ޗެލްސީއަށް ވިއްކައިލީ 58 މިލިއަން ޕައުންޑަށެވެ.

ފާއިތުވެދިޔަ ހަތް މަހަށް ބަލާއިރު ޑޯޓްމުންޑުން މިވަނީ އަނެއްކާވެސް ހައިރާންވާފަދަ ދެ ކުޅުންތެރިންގެ ސޮއި ހޯދައިފައެވެ. ޔޫރަޕްގެ ބޮޑެތި ކްލަބުތަކުން ފާރަލަމުންދިޔަ ހާލަންޑްގެ ސޮއި ޑޯޓްމުންޑުން ހޯދީ ހާލަންޑް ހޯދުމަށް ޔުނައިޓެޑުން ބިޑުކުރުމަށް ތައްޔާރުވަމުން ދަނިކޮށެވެ. 19 އަހަރުގެ ހާލަންޑް މިހާރު އަންނަނީ ޑޯޓްމުންޑާއިއެކު ތަފާތު މޮޅު ކުޅުމެއް ދައްކަމުންނެވެ.

ލާސް ރިކެން ބުނީ ޑޯޓްމުންޑުން ޒުވާން ކުޅުންތެރިން ބިނާ ކުރުމަށް ނިންމީ 2004 ވަނަ އަހަރު މާލީ ގޮތުން ޑޯޓްމުންޑް ކުޑަ ކަކޫ ޖަހަން ޖެހުމާއި ގުޅިގެން ކްލަބުގެ ޚަރަދުތައް ކުޑަ ކުރުމަށް އޭރުގެ ބޯޑުން ނިންމުމާއި ގުޅިގެން އޭރުގައި ޑޯޓްމުންޑްގައި ތިބި ކޯޗިން ސްޓާފުން ޒުވާން ކުޅުންތެރިން ބިނާ ކުރަން ކުރި މަސައްކަތުން ކަމަށެވެ. އޭގެ ފަހުން ޑޯޓްމުންޑާއިއެކު އެންމެ ފަހުން ޖަރުމަން ލީގު ހިއްލައިލި ކޯޗު ޔާގެން ކްލޮޕްގެ ކޯޗު ކަމުގެ ދަށުގައި ވެސް އެންމެ އިސްކަމެއް ދިނީ ޒުވާން ކުޅުންތެރިންނަށް ކަމަށް އޭނާ ބުންޏެވެ.

ޒުވާން ކުޅުންތެރިން އުފެއްދުމަކީ ޗެލެންޖެއް ނަމަވެސް ޑޯޓްމުންޑްގެ މިހާރުގެ އަމާޒަކީ ޒުވާން ކުޅުންތެރިންނާއި އެކު ޔޫރަޕުގެ އެންމެ ބޮޑު މުބާރާތް ކަމަށްވާ ޗެމްޕިއަންސް ލީގު ކާމިޔާބުކޮށް ދެންތިބި ކްލަބުތަކަށް ނަމޫނާ އަކަށްވެ ސަޕޯޓަރުންގެ އުންމީދުތައް ފުރިހަމަ ކޮށްދިނުމެވެ.