ޗައިނާއަށް އިއްޔެ އަކީ ބިރުވެރި ދުވަހެއް: ކޮރޯނާވައިރަސް ޖެހިގެން އިއްޔެ އެކަނި 242 މަރު

ޗައިނާގެ ނެޝަނަލް ހެލްތު ކޮމިޝަނުން ރޭ ޢާންމުކުރި ނޮވެލް ކޮރޯނާވައިރަސްގެ އެންމެ ފަހުގެ މަޢުލޫމާތުތަކައް ބަލާލާއިރު، އިއްޔެ އެކަނިވެސް ޗައިނާގައި ނޮވެލް ކޮރޯނާވައިރަސް ކޮރޯނާ ވައިރަސް އަށް ފަރުވާދެމުން އަންނަ 242 މީހުން މަރުވިއެވެ. މިއީ ކޮރޯނާވައިރަސް އެޤައުމުގައި ފެތުރެން ފެށިފަހުން އެއްދުވަހެއްގައި އެންމެ ގިނަ މީހުން މަރުވި ދުވަސް ކަމަށް އެ ކޮމިޝަނުން ބުނެއެވެ. މިއާއެކު މަރުވި މީހުންގެ އަދަދު ވަނީ 1,360 އަށް އަރާފައެވެ.

ޗައިނާއި އިއްޔެ އެކަނިވެސް 14840 މީހުން ކޮރޯނާވައިރަހަށް ޕޮޒިޓިވް ވެފައިވާއިރު، ކޮރޯނާވައިރަސް ޖެހުނު މީހުންގެ ޢަދަދު މިހާރު ވަނީ 60،000އަށް ވުރެ މައްޗަށް އަރާފައެވެ. ޗައިނާގައި ހިފެހެއްޓުމެއް ނެތި ކޮރޯނާ ވައިރަސް ފެތުރެމުން ދާތީ އެޤައުމުގެ ސަރުކާރުން ވަނީ، ހުބެއި ޕްރޮވިންސްގައި ސަމާލަތާ ރައްކާތެރިކަމުގެ ފިޔަވަޅުތައް ވަރުގަދަކޮށްފައެވެ.

ހަމަ އެއާއެކު މި ވައިރަސް ކޮންޓްރޯލް ކުރުމަށް އަޅާމުންދާ ފިޔަވަޅުތަކުގެ ދަށުން ހުބެއި ޕްރޮވިންސްގެ ހުންނަ ކޮމިއުނިސްޓް ޕާޓީގެ ސެކްރެޓަރީ ޖިއާންގ ޝާއޯލިއާންގް މަޤާމުން ދުރުކޮށް، މިހާރު ޝަންހާއީގެ މޭޔަރުކަން ކުރައްވަމުން ގެންދަވާ ޔިންގް ޔޮންގ ހުބެއި ޕްރޮވިންސްގެ ކަންކަން ބެލެހެއްޓުމަށް ޗައިނާ ސަރުކާރުން ވަނީ ހަވާލުކޮށްފައެވެ. އަދި ވުހާން މުނިސިޕަލްޓީގެ ޕާރތީ ސެކްރެޓަރީ މާ ގުއާކިއާންގ އޭނާގެ މަޤާމުން ދުރުކޮށް، ޖިނާން ސިޓީގެ ޕާރޓީ ސެކެޓްރީއާއި ވަނީ އެމަޤާމުގެ ޒިންމާ އުފުލަން އައްޔަނުކުރައްވާފައެވެ. ޗައިނާގެ ދައުލަތުގެ މީޑިއާއިން ރިޕޯޓުކުރާގޮތުގައި މިއީ ޗައިނާގެ ވެރިކަން ކުރާ ކޮމިއުނިސްޓް ޕާޓީގެ ސެންޓްރަލް ކޮމިޓީގެ ނިންމުމުގެ މަތިން ގެނެވުނު ހިންގުމުގެ ނިޒާމަށް ގެނައި ބަދަލެކެވެ.