ބަލިނުވެ 22 މެޗު ހަމަކޮށް ޕީއެސްޖީ ފްރެންޗް ކަޕްގެ ސެމީއަށް
13 ފެބުރުއަރީ 2020 | ބުރާސްފަތި 03:45މި މެޗު ޕީއެސްޖީއިން ކާމިޔާބުކުރީ 6-1 ގެ ނަތީޖާ އަކުން
ފްރެންޗް ކަޕް މެޗުގެ ތެރެއިން އެމްބާޕޭ
ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން ބަލިނުވެ 22 މެޗު ހަމަކޮށް ފްރެންޗް ކަޕް ސެމީ ފައިނަލަށް ދަތުރުކޮށްފި އެވެ.
ފްރެންޗް ކަޕް ސެމީ ފައިނަލްގައި ބުދަ ދުވަހުގެރޭ ޑީޖޮން އާއި ދެކޮޅަށް ކުޅުނު މެޗު ޕީއެސްޖީއިން ކާމިޔާބުކުރީ ފަސޭހަ ކަމާއިއެކު 6-1 ގެ ނަތީޖާއަކުންނެވެ.
ޑީޖޮން ދަނޑުގައި ކުޅުނު މި މެޗު ފަށައިގެން 47 ސިކުންތުގެ ތެރޭގައި ޕީއެސްޖީއިން ވަނީ ލީޑު ނަގައިފައެވެ. މި ލަނޑަކީ ޑީޖޮންގެ ވެސްލީ ލައޮޓާ އަތުން ބައިކޮޅަށް ވަން ލަނޑެކެވެ. އެކަމަކު މެޗުގެ 13 ވަނަ މިނެޓުގައި ޑީޖޮން އިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މުނީރު ޝަރް އެވެ. މެޗުގެ ފުރަތަމަ ހާފު ނިމުމުގެ ކުރިން ޕީއެސްޖީއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ޒުވާން ފޯވާޑް ކީލިއަން އެމްބާޕޭ އެވެ. މިއީ މި ސީޒަނުގައި އެމްބާޕޭ ޕީއެސްޖީއަށް ކުޅެދިން 28 މެޗުން އޭނާ ކާމިޔާބުކުރި 24 ވަނަ ލަނޑެވެ.
ދެވަނަ ހާފު ފަށައިގެން ޕީއެސްޖީއިން އެޓީމުގެ އެޓޭކްތައް ވަރުގަދަކުރިއިރު އެޓީމުން ވަނީ މެޗުގެ 50 ވަނަ މިނެޓުގައި ލަނޑު ޖަހައިފައެވެ. މި ލަނޑު އެޓީމަށް ކާމިޔާބުކޮށްދިނީ ތިއާގޯ ސިލްވާ އެވެ. އޭގެ ފަސް މިނެޓު ފަހުން ޕަބްލޯ ސަރާބިއާ ވަނީ އެމްބާޕޭގެ ހުރަހަކުން ލަނޑު ޖަހާ ލީޑު އިތުރަށް ފުޅާ ކޮށްފައެވެ. ޕީއެސްޖީގެ ފަސްވަނަ ލަނޑަކީ ޑީޖޮންގެ ސެނޫ ކޮލަބާލީ އަތުން ބައިކޮޅަށް ވަތް ލަނޑެކެވެ. މެޗުގައި ޕީއެސްޖީއިން ކާމިޔާބުކުރި ފަހު ލަނޑަކީވެސް އެމްބާޕޭގެ ހުރަހަކުން ޕަބްލޯ ސަރާބިއާ ކާމިޔާބުކުރި ލަނޑެކެވެ.
މެޗަށްފަހު ވާހަކަދައްކަމުން ޕީއެސްޖީގެ ކޯޗު ތޯމަސް ބުނީ މެޗުގެ ނަތީޖާ އާއި މެދު ހިތްހަމަ ޖެހޭ ކަމަށާއި ޕީއެސްޖީއިން މިހާރު ތައްޔާރުވަމުން އަންނަނީ ޗެމްޕިއަންސް ލީގުގައި ޑޯޓްމަންޑާއި ދެ ކޮޅަށް ނުކުންނަ މެޗަށް ކަމަށެވެ.
