އުދައިގެ އަސަރު ގިނަ ރަށްތަކަށް ކޮށްފައިވޭ
މިހާތަނަށް އުދައިގެ އަސަރުކޮށްފައިވަނީ ނ. ހޮޅުދޫ، ށ. ނަރުދޫ، މ. ދިއްގަރުގެ އިތުުރުން ހއ، ހޯރަފުއްޓަށް
އުދައިގެ އަސަރު މ. ދިއްގަރަށް ވެސް ކުރި
ރާއްޖޭގެ އެކި ހިސާބުތަކަށް އުދައަރައިފިއެވެ.
ރާއްޖެއެމްވީއަށް މައުލޫމާތު ދެއްވަމުން ނެޝެނަލް ޑިޒާސްޓަ މެނޭޖްމަންޓް ސެންޓަރގެ ޗީފް އެކްޒެކެޓިވް ހިސާން ހަސަން ވިދާޅުވީ އުދައިގެ އަސަރުކޮށްގެން މިހާތަނަށް ރިޕޯޓްކޮށްފައިވަނީ ނ. ހޮޅުދޫ އިން އެކަނި ކަމަށެވެ. އެގޮތުން އެ ރަށުގެ 12 ގެއަކަށް ލޮނުވަދެ، އެކިވަރުގެ ގެއްލުންތައް ވެފައިވާ ކަމަށާއި އެ ރަށުގެ ހާލަތު ދިރާސާ ކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ. އަދި އެހެން ރަށްތަކަށް ވެސް އުދައިގެ އަސަރު ކޮށްފައިވޭތޯ ބެލުމުގެ މަސައްކަތް ކުރަމުންދާ ކަމަށް ވެސް ހިސާން ވިދާޅުވިއެވެ.
މިހާތަނަށް އުދައިގެ އަސަރުކޮށްފައިވަނީ ނ. ހޮޅުދޫ، ށ. ނަރުދޫ، މ. ދިއްގަރުގެ އިތުުރުން ހއ، ހޯރަފުއްޓަށެެވެ. ރާއްޖެއެމްވީއަށް މައުލޫމާތުދެއްވަމުން މ. ދިއްގަރު ކައުންސިލްގެ ނައިބު ރައީސް ޔަހްޔާ އަބްދުއް ރަހްމާން ވިދާޅުވީ އެ ރަށަށް އުދައިގެ އަސަރު ވަރަށް ބޮޑަށް ކޮށްފައިވާ ކަމަށެވެ. ރަށުގެ މެދާ ހަމަޔަށް އުދައިގެ އަސަރުކޮށްފައިވާ ކަމަށާއި ގެތަކަށް ފެންވަދެ، ރަށުގެ ތޮށިގަނޑުން ބައެއް ހަލާކުވެފައިވާ ކަަމަށް ވެސް އޭނާ ވިދާޅުވިއެވެ. ދިއްގަރަށް އުދައިގެ އަސަރު ކޮށްފައިވަނީ ރޭ ދަންވަރު 03:30 ހާއިރުގައެވެ. އަދި ކައުންސިލުން ފުލުހުންނާއި ގުޅިގެން ވެލި ބަސްތާތައް ޖެހުމުގެ މަސައްކަތް ކުރި ކަމަށް ވެސް އެ ރަށު ކައުންސިލުން ބުނެއެވެ.
ރާއްޖެއެމްވީއަށް މައުލޫމާތު ދެއްވަމުން ހއ. ހޯރަފުށި ކައުންސިލްގެ ރައީސް މުހައްމަދު ވަހީދު ވިދާޅުވީ އުދައިގެ އަސަރު ރަށު ތެރެއަށް ނުކުރި ނަމަވެސް ފަޅުތެރެއަށް ކޮށްފައިވާ ކަމަށެވެ. އަދި އުދައިގެ ސަބަބުން ހުޅަނގު ފަރާތް ގިރިމުންދާތީ އެކަމުގެ ކަންބޮޑުވުން އޭނާ ފާހަގަކުރެއްވިއެވެ. އަދި ރޭ ދަންވަރު އުދައެރި ވަގުތު އެ ރަށުގެ ނެރުބައްތި ވެއްޓުނު ކަމަށާއި ބައެއް ދޯނި ފަަހަރުތަކަށް އެކިވަރުގެ ގެއްލުންތައް ލިބުނު ކަމަށް މުހައްމަދު ވަހީދު ވިދާޅުވިއެވެ.
ނ. ނަރުދޫ ކައުންސިލްގެ ޕްލޭނިން އޮފިސަރުން އަހުމަދު މާހިރު ރާއްޖެ.އެމްވީ އަށް ވިދާޅުވީ، ހޯމަ ދުވަހުން ފެށިގެން ރަށަށް އުދަ އަރަމުންދާ ކަމަށާއި، އެންމެ ބޮޑަށް އުދައިގެ އަސަރުކޮށްފައިވަނީ އަންގާރަ ދުވަހުގެ ރޭ ގެ އިތުރުން ބުދަ ދުވަހު ހެނދުނު ކަމަށެެވެ. މާހިރު ވިދާޅުވީ، ގޮނޑުދޮށުން ފެށިގެން 400 ފޫޓަށް ރަށުގެ ތެރެއަށް އުދަ އަރާފައިވާ ކަމަށެެވެ.
ރާއްޖޭގެ އެކި ހިސާބުތަކަށް އުދަރާފައިވާއިރު މޫސުމާ ބެހޭ ޤައުމީ އިދާރާ ވަނީ ރާއްޖޭގެ އެކި ހިސާބުތަކަށް އުދައަރާނެ ކަމަށް ލަފާކޮށް އެކަމަށް ސަމާލުވުމަށް މީގެ ކުރިން އިލްތިމާސްކޮށްފައެވެ. އެގޮތުން އުދައިގެ އަސަރު އެންމެ ބޮޑަށް ކުރާނެ ކަމަށް ލަފާކޮށްފައިވަނީ ރާއްޖޭގެ އުތުރާއި މެދުތެރޭގެ ރަށްތަކަށެވެ. މީގެ އިތުރުން މޫސުމާއި ބެހޭ ޤައުމީ އިދާރާ އިން ވަނީ މުސޫމަށް ސަމާލުވުމަށް އިލްތިމާސްކޮށްފައެވެ. އެ އިދާރާ އިން ބުނީ ކުރިއަތް އޮތް ދެ ދުވަހު ވައި ގަދަވާނެ ކަމަށާއި ބައެއް ރަށްތަކަށް ކެރީގެ އަސަރު ފޯރާނެ ކަމަށެވެ. އަދި ކަނޑުތައް އާންމު ގޮތެއްގައި ގަދަވެފައި، މި މަހުގެ 13 އަދި 14 ވަނަ ދުވަހު ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށް މުސުމާއި ބެހޭ ޤައުމީ އިދާރާ އިން ބުނެއެވެ.
