މަސް ގަތުމުގެ އެކްސްކުލޫސިވިޓީ އުވާލުމުން މަހަށް ހަމަ އަގު ލިބޭނެ، ސަރުކާރުން އެކަން އެބަކުރޭ: ރައީސް ނަޝީދު
މަހުގެ އަގު އުފުލައިދިނުމަކީ އެމްޑީޕީން ރައްޔިތުންނަށް ވެފައިވާ ވައުދެއް
ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު
މަސްވެރިކަމުގެ ދާއިރާ ކުރިއެރުމަށާއި މަހަށް ހަމަ އަގު ލިބުމުގެ އެންމެ ބޮޑު ހުރަހަކީ އެކްސްކުލޫސިވިޓީ އެގްރީމަންޓްކަމަށާއި އެ އެގްރީމަންޓްތައް ބާތިލުކުރުމުން މަހަށް ހަމަ އަގު ލިބޭނެކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އަންގާރަ ދުވަހުގެ ރޭ ދަރުބާރުގޭގައި ބޭއްވި އެމްޑީޕީގެ ގައުމީ މަޖިލީހުގެ 168 ވަނަ ބައްދަލުވުމުގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ މަހުގެ އަގު އުފުލައިދިނުމަކީ އެމްޑީޕީން ރައްޔިތުންނަށް ވެފައިވާ ވައުދެއްކަމަށެވެ. އަދި އެކަމަށްޓަކައި މަސްވެރިކަމުގެ ގަނޫނު އިސްލާހުކޮށްފައިވާކަމަށެވެ. މަސްވެރިކަމުގެ ގާނޫނުން 3 މަސްދުވަހުގެ ތެރޭގައި ގަވާއިދުތައް ހެދުމަށް ޖާގަދޭކަަން ފާހަގަކުރައްވައި ރައީސް ނަޝީދު ވިދާޅުވީ އެ ގާނޫނަށް ގެނެވުނު އެންމެ ބޮޑު ބަދަލަކީ މަސް ގަތުމުގެ ވިޔަފާރީގެ ވާދަވެރިކަން އުފައްދައި، މަސްގަތުމުގެ ހުއްދަ ރާއްޖެއިން ބޭރުގެ ފަރާތްތަކަށްދީ މަހަށް ހަމަ އަގު ހޯދައިދިނުންކަމަށެވެ.
އިތުރަށް އެ ނުކުތާ ތަފްސީލުކޮށްދެއްވަމުން ރައީސް ނަޝީދު ވިދާޅުވީ ރާއްޖެއިން ބާނާ ކަޅުބިލަމަސް ގަނެ ބޭރުކުރުމުގެ ހުއްދަ ދީފައިވަނީ އެންމެ 3 ފަރާތަކަށް ކަމަށާއި، އެ އެކްސްކުލޫސިވިޓީ އެގްރީމަންޓްތައް އުވާލައި އާންމުކޮށް މަސްގަނެ ބޭރަށް ވިއްކުމުގެ ހުއްދަ ލިބުމުން އިތުރަށް މަހުގެ އަގު އުފުލިގެންދާނެކަމަށް ގަބޫލުކުރައްވާކަމަށެވެ. އެ އެގްރީމަންޓްތައް އުވާލުމުގެ މަސައްކަތް ސަރުކާރުން މިހާރު ކުރަމުންދާކަމަށް އެމަނިކުފާނު ވިދާޅުވި އެވެ.
އޭގެއިތުރުން، މަސްވެރިިކަމާއި ގުޅޭ ގާނޫނާއި ގަވާއިދުތައް ހަދައި ނިމުމުން އެންމެ ދަށްކޮށް މަސްގަނެވޭނެ އަގު ކަނޑައެޅިގެންދާނެކަމަށްވެސް އެމަނިކުފާނު ވިދާޅުވި އެވެ.
މަސް ފެކްޓްރީ އެއް ހެދުމަށްޓަކައި ހޮރައިޒަން ފިޝަރީޒް އަށް ފިޝަރީޒް މިނިސްޓްރީން ގދ ހޯނޑެއްދޫއިން ބިންދޫކޮށްފައިވާތީ އާއި އެކަމާއި ގުޅޭ އެއްބަސްވުމާއި އެއްވެސް ފަރާތަކުން ޚިލާފުވެފައިވާނަމަ، އެކަމުގެ ތަފުޞީލު ދެއްވުމަށް ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް ފިޝަރީޒް މިނިސްޓަރ ހާޒިރުކޮށްފައިވާއިރު ޖަލްސާގައި މެމްބަރުން ކުރި ސުވާލަށް ޖަވާބު ދެއްވަމުން މިނިސްޓަރ ވަނީ ހެދިފައިހުރި އެކްސްކުލޫސިވް އެގްރިމެންޓް އުވާލައިގެން ނޫނީ މަސްވެރިންނަށް ހަމައަގު ހޯދައި ނުދެވޭނެކަމަށާއި އެކަމަށްޓަކައި ކުރަންޖެހޭ މަސައްކަތް ކުރައްވަމުން ގެންދަވާކަމަށް ވިދާޅުވެފައެވެ.
