ރޯދަ މަހަށް 51 ބާވަތެއްގެ އަގު ދަށްކުރަނީ
11 ފެބުރުއަރީ 2020 | އަންގާރަ 14:27އެކަމާއި ގުޅޭ ފުރަތަމަ ބައްދަލުވުން ބުދަ ދުވަހު ބޭއްވިގެންދާނެ
އިކޮނޮމިކް މިނިސްޓަރ ފައްޔާޒު އިސްމާއިލް
އަންނަ ރޯދަމަހަށް ބެނުންވާ ތަކެތީގެ ތެރެއިން 51 އައިޓަމެއްގެ އަގު ދަށްކުރުމަށް މަސައްކަތް ކުރަމުންދާ ކަމަށް އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެ އެވެ.
މާގިރި ހޮޓަލުގައި އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ ރޯދަމަހަށް ބޭނުންވާ އަސާސީ ބާވަތްތައް އަގުހެޔޮކުރުމަށްޓަކައި ސަރުކަރު ހިއްސާވާ ކުންފުނި އެސްޓީއޯ މެދުވެރިކޮށް ސަޕްލައި އިތުރު ކުރުމަށް މަސައްކަތް ކުރައްވަމުން ގެންދަވާ ކަމަށެވެ.
އެހެންކަމުން އޭގެ ޒާތުގައި ޑިމާންޑް އެންޑް ސަޕްލައިގެ ދަށުން އަގު ތިރިވާނެކަމަށް މިނިސްޓަރ ވިދާޅުވިއެވެ.
އެތަކެތި ސްޓޯކް ކުރުމަށްޓަކައި ގޮތްތަކެއް ރާވާނެ ކަމަށާއި އެކަމާއި ގުޅޭ ފުރަތަމަ ބައްދަލުވުން ބުދަ ދުވަހު ބޭއްވިގެންދާނެ ކަމަށް މިނިސްޓަރ ވިދާޅުވިއެވެ.
މިދިޔަ އަހަރުގެ ރޯދަ މަހު އެންމެ އަގު އުފިލިގެން ދިޔަ ބާވަތީ "ކަނޑޫދޫ މިރުސް" ކަން ފާހަގަ ކުރައްވާ މިނިސްޓަރ ވިދާޅުވީ ވަކި ރަށެއްގެ މިރުހެއްގެ އަގު ދަށްކުރުމަކީ މިނިސްޓްރީއަށް ކުރެވޭނެ ކަމެއް ނޫން ކަމަށާއި، ނަމަވެސް ސިލޯނުން މިރުސް ގެނެސްގެން ނަމަވެސް މާރކެޓްގައި މިރުސް އަގުހެޔޮކޮށް ގަންނަން ބޭނުންވާ ފަރާތްތަކަށް ލިބޭނެ އިންތިޒާމު ހަމަޖެހިގެންދާނެ ކަމަށެވެ.
އެހެން މަސްތަކާއި ޚިލާފަށް ކޮންމެ އަހަރަކުވެސް ރޯދަ މަހާއި ދިމާކޮށް ކާބޯތަކެތީގެ އަގު ބޮޑުވުމުގެ ޝަކުވާ ގިނަ ބަޔަކު ކުރަމުންދެއެވެ. އަގު އުފުލިގެންދާ ތަކެތީގެ ތެރޭގައި ތަރުކާރީ އާއި، މޭވާގެ ބާވަތްތަކާއި، ބިސް އަދި މަސް ހިމެނެއެވެ.
