ގެއަށް ދައްކާ ކުލީގެ %70 ސަރުކާރުން ދިނުމަށް ގޮވާލާ ޖާބިރު ޤަރާރެއް ހުށަހަޅުއްވައިފި
ކުލީގެގޮތުގައި ރައްޔިތުން ދައްކަމުންދާ ޢަދަދު އިންޞާފުވެރި ކަމާއެކު ބަލައި، އެޢަދަދެއްގެ %70 އިންސައްތަ ސަރުކާރުން އެފަރާތްތަކަށް ލިބިގެންދާނެ ގޮތެއް ހަމަޖެއްސުން
ކާށިދޫ ދާއިރާގެ މެމްބަރ އަބްދުﷲ ޖާބިރު
ސަރުކާރުން ފޯރުކޮށްދޭ ބޯހިޔާވަހިކަން ލިބުމާއި ހަމައަށް ފާއިތުވެގެންދާ ދުވަސްތަކުގައި ކުލީގެ ގޮތުގައި އެފަރާތްތަކުންޚަރަދު ކުރަންޖެހިފައިވާ ފައިސާގެ %70 ސަރުކާރުން އެފަރާތްތަކަށް ލިބިގެންދާނެ ގޮތްތަކެއް މިހާރުން މިހާރަށް ހަމަޖެއްސުމަށް ގޮވާލާ ކާށިދޫ ދާއިރާގެ މެމްބަރ އަބްދުﷲ ޖާބިރު ރައްޔިތުންގެ މަޖިލީހަށް ޤަރާރެއް ހުށަހަޅުއްވައިފި އެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާއަށް މިޤަރާރު ހުށަހަޅުއްވަމުން ޖާބިރު ވިދާޅުވީ ކުލީގެގޮތުގައި ރައްޔިތުން ދައްކަމުންދާ ޢަދަދު އިންޞާފުވެރި ކަމާއެކު ބަލައި، އެޢަދަދެއްގެ %70 އިންސައްތަ ސަރުކާރުން އެފަރާތްތަކަށް ލިބިގެންދާނެ ގޮތުގެ ހަރުދަނާ އިންތިޒާމުތަކެއް މިހާރުން މިހާރަށް ހަމަޖައްސަވައި އެމަގުން ޢަމަލު ކުރުމަށްދައުލަތުގެ މައްޗަށް ލާޒިމުކުރުމަށް ގޮވާލާކަމަށެވެ.
ޖާބިރު އިތުރަށް ވިދާޅުވީ މި ޤަރާރަކީ މާލޭގައި ދިރިއުޅޭ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލަތަކާއެކު، މާލޭގެ ރައްޔިތުން ކުލިދެއްކުމަށް ބޮޑު ޚަރަދެއް ކުރަންޖެހިފައިވުމާއެކު، ބޯހިޔާވަހިކަމާ ގުޅިގެން ހުރި ކަންބޮޑުވުންތަކަށް ހައްލެއް ހޯދައިދިނުމަށްގޮވާލައި ހުށަހަޅާ ޤަރާރެއް ކަމަށެވެ.
ޖާބިރު ވިދާޅުވީ މާލޭގެ ރައްޔިތުންގެ ތެރެއިން ބޯހިޔާވަހިކަން ބޭނުންވެފައިތިބި ފަރާތްތަކަށް ބޯހިޔާވަހިކަން ފޯރުކޮށްދިނުމުގެ ވަޢުދަކީ ކޮންމެ ރިޔާސީ ކެނޑިޑޭޓެއްގެ ރިޔާސީ ވަޢުދެއްކަމަށެވެ.
މިޤަރާރުގެ ބަހުސް މަރުހަލާގައި ވާހަކަ ދައްކަވަމުން ޖާބިރު ވިދާޅުވީ މިކަން ކޮށްގެން ދައުލަތުގެ ބަޖެޓުން ދެކޮޅު ނުޖެހޭނެކަން އަޅުގަނޑަށް އެނގިވަޑައިގަންނަވާ ކަމަށެވެ. އަދި ދައުލަތުގެ ބަޖެޓުން ހުރިހާ ކަމެއް ނުކުރެވޭނެކަަންވެސް އެނގިވަޑައިގަންނަވާ ކަމަށް ޖާބިރު ވިދާޅުވި އެވެ.
ޖާބިރު އިތުރަށް ވިދާޅުވީ ބޯހިޔާވަހިކަމުގެ މައްސަލައަށް ހައްލެއް ގެނައުމަށް ޖަޒުބާތުގައި ނުޖެހި ވާހަކަދައްކައިގެން މިކަމަށް ހައްލެއް ގެންނަންޖެހޭ ކަމަށެވެ. އަދި ހުރިހާ ދިވެހި ރައްޔިތުންނަށްވެސް ބޯހިޔާވަހިކަން ލިބެންޖެހޭ ކަމަށް ޖާބިރު ވިދާޅުވި އެވެ.
