މަސް ނިމުމުގެ ކުރިން މިނިމަމް ވޭޖް ކަނޑައަޅަނީ!
11 ފެބުރުއަރީ 2020 | އަންގާރަ 06:45މިނިމަމް ވޭޖް ކަނޑައެޅުމަކީ ރައީސް ސޯލިހުގެ ވައުދުފުޅެއް
މިނިސްޓަރ އޮފް އިކޮނޮމިކް ޑިވެލޮޕްމެންޓް ފައްޔާޒް އިސްމާއިލް
މި ހިނގާ ފެބްރުއަރީ މަސް ނިމުމުގެ ކުރިން މިނިމަމް ވޭޖް ކަނޑައަޅާނެ ކަމަށް މިނިސްޓަރ އޮފް އިކޮނޮމިކް ޑިވެލޮޕްމެންޓް ފައްޔާޒް އިސްމާއިލް ވިދާޅުވެއްޖެއެވެ.
މިނިސްޓަރ ކުރެއްވި ޓްވީޓެއްގައި ވަނީ މި މަސް ނިމުމުގެ ކުރިން ރާއްޖޭގައި ފުރަތަމަ ފަހަރަށް މިނިމަމް ވޭޖްއެއް ކަނޑައެޅިގެންދާނެ ކަމަށެވެ. މިނިސްޓަރ ވިދާޅުވީ ވަޒީފާއާއިބެހޭ ގާނޫނަށް އިސްލާހުގެނައުމާއި މިނިމަން ވޭޖު ކަނޑައެޅުމަކާއި ގުޅުމެއް ނެތް ކަމަށެވެ.
މަސައްކަތްތެރިންނަށް އެންމެ ކުޑަ އުޖޫރަ ކަނޑައަޅާނެ ގޮތާ މެދު ލަފާދޭ ކޮމިޓީ ''ސެލެރީސް އެންޑް ވޭޖްސް އެޑްވައިޒަރީ ބޯޑް' ރައީސް ސޯލިޙު އެކުލަވާލެއްވީ ދުނިޔޭގެ މަސައްކަތްތެރިންގެ ދުވަހާ ގުޅިގެންނެވެ. އެ ބޯޑުން ތައްޔާރު ކުރި ރިޕޯޓު މިހާރު ވަނީ ރައީސް ސޯލިހުއަށާއި ރައްޔިތުންގެ މަޖިލީހަށްވެސް ފޮނުވާފައެވެ.
މިނިސްޓަރ މީގެކުރިން ވިދާޅުވެފައިވަނީ މަޖިލީހުގެ މިއަހަރުގެ ފުރަތަމަ ދައުރުގެ ތެރޭގައި މިނިމަމް ވޭޖު ކަނޑައެޅިގެންދާނެ ކަމަށެވެ. އެންމެ ކުޑަ މިނުން ދެވޭ އުޖޫރަ ނުވަތަ މިނިމަމް ވޭޖް ކަނޑައެޅުމަށް މާބޮޑަށް ވެސް ލަސްވެއްޖެ ކަމަށް ބުނެ އާއްމުންގެ ގިނަ ބަޔަކު ދަނީ ކަންބޮޑުވުންފާޅު ކުރަމުންނެވެ.
މިނިމަމްވޭޖް ކަނޑައެޅުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ. 19 ވަނަ ރައްޔިތުންގެ މަޖިލީހުގެ ދެވަނަ ދައުރުގެ މަސައްކަތްތައް ނިންމަވާލައްވައި މެމްބަރުން ޗުއްޓީ އަށް ވަޑައިގެންނެވިއިރު ނުނިމިއޮތީ މިނިމަމްވޭޖް ބިލުގެ މަސައްކަތް އެކަންޏެވެ.
