ފަތުރުވެރިންނަށް ޙަމަލާދޭނީ ދިވެހި ޤައުމުގެ ޢަދުއްވުން: މެންބަރު ޝަހީމް
9 ފެބުރުއަރީ 2020 | އާދީއްތަ 19:19ފަތުރުވެރިންނަށް ދިން ހަމަލާއަކީ މާރާމާރީއެއް ނޫން
މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސައިން ޝަހީމް
ރާއްޖޭގެ އިޤްތިސާދު ފަތުރުވެރިކަމަށް ބަރޯސާވާއިރު، ފަތުރުވެރިންނަށް ޙަމަލާދޭނީ ދިވެހި ޤައުމުގެ ޢަދުއްވުން ގޮތުގައި މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވިދާޅުވެއްޖެއެވެ.
އާދިއްތަ ދުވަހުގެރޭ ރާއްޖެޓީވީގެ "ފަލަސުރުޚީ" ޕްރޮގުރާމުގައި ވާހަކަދައްކަވަމުން ޝަހީމް ވިދާޅުވީ، ފަތުރުވެރިންނަށް ދިން ޙަމަލާއަކީ މާރާމާރީ ނޫން ކަމަށާއި، އެއީ ސީދާ ޓެރަރިޒަމްގެ ޙަމަލާތަކެއް ކަމަށެވެ. އަދި ސަރުކާރާއި ރައްޔިތުންގެ މަޖިލިސް މެންބަރުންގެ އިތުރުން ކަމާބެހޭ މުއައްސަސާތަކުންވެސް އެ މައްސަލަ ބައްލަވާނެ ކަމަށް އޭނާ ވިދާޅުވިއެވެ.
ޝަހީމް އިތުރަށް ވިދާޅުވީ، އެކަމާ ކަމާބެހޭ ފަރާތްތަކުންވެސް މުޢާމަލާތްކުރާނީ އެންމެ ހަރުކަށި ޤާނޫނުތަކުގެ ދަށުން ކަމަށާއި، މަޖިލީހުގެ ޤައުމީ ސަލާމަތާއި ބެހޭ ކޮމިޓީއާއި، މަޖިލީހުގެ ތަޅުމުންވެސް އެ މައްސަލަ ބަލާނީ ޓެރަރިޒަމްގެ ޢަމަލެއް ގޮތަށް ކަމަށް ޝަހީމް ވިދާޅުވިއެވެ.
އޭގެ އިތުރުން، ޙަމަލާދިން މީހުން ޤައުމުން ފުރައިގެން ގޮސްފި ޙާލަތެއްގައިވެސް ސަލާމަތީ ބާރުތަކަށް ދޭންޖެހޭ އެންމެހައި ބާރުތައް ދީގެން އެފަދަ މީހުން ހޯދައި، ރާއްޖޭގެ ޤާނޫނީ ނިޒާމުގެ ތެރެއިން ދޭންޖެހޭ ހަރުކަށި އަދަބު ދެއްވާނެ ކަމަށް އޭނާ ވިދާޅުވިއެވެ.
ޝަހީމް އެހެން ވިދާޅުވެފައިވާއިރު، ފަތުރުވެރިނަށް ޙަމަލާދިނުމަށް ރާވާފައިވަނީ ވަރަށް ފުޅާކޮށް ކަމަށާއި، އެކަމުގައި އުޅުނު އިސް މީހާ ހައްޔަރުކޮށްފައިވާ ކަމަށް ހޯމް މިނިސްޓަރ ޝައިޚް އިމްރާން ޢަބްދުﷲ ވަނީ ވިދާޅުވެފައެވެ.
މި މަހުގެ 4 ވަނަ ދުވަހުގެ ރޭ ހުޅުމާލޭގައި ފަތުރުވެރިއަކާއި ރާއްޖޭގައި މަސައްކަތް ކުރާ އޮސްޓްރޭލިއާ އަދި ޗައިނާގެ މީހަކަށް ވަޅިން ހަމަލާދިން މި މައްސަލަ ބައިނަލްއަޤުވާމީ މީޑިއާތަކުގެ ސަމާލުކަމަށްވެސް ވަނީ އައިސްފައެވެ. އެގޮތުން ރާއްޖެ ފަދަ ފަތުރުވެރިކަމަށް ބަރޯސާވެފައި އޮންނަ ޤައުމެއްގައި މިފަދަ ޙާދިސާއެއް ހިނގައި ބައިނަލްއަޤުވާމީ މީޑިއާތަކުގައި ޓެރަރިސްޓް ޖަމާޢަތް، އައިސިސްއިން މިކަމުގެ ޒިންމާ ނަގާފައިވާކަން ރިޕޯޓުކޮށްފައިވުމާއި ގުޅިގެން ފަތުރުވެރިކަމަށް އޭގެ ނޭދެވޭ އަސަރުކުރާނެކަމަށް ދާއިރާގެ މާހިރުން ވަނީ ބުނެފައެވެ.
