ހިމަބިއްސަށް އިތުރު މީހަކު ޕޮޒިޓިވް ވެއްޖެ
9 ފެބުރުއަރީ 2020 | އާދީއްތަ 07:56މިއީ މި ފެބްރުއަރީ މަހު ހިމަބިއްސަށް ޕޮޒިޓިވްވި ފުރަތަމަ މީހާ
ވެކްސިންގެ މައުލޫމާތު ހިމެނޭ ޝީޓެއް
އިތުރު މީހަކު ހިމަބިއްސަށް ޕޮޒިޓިވް ވެފައިވާކަމަށް ހެލްތު މިނިސްޓްރީން ބުނެފިއެވެ.
ހެލްތު ޕްރޮޓެކްޝަން އޮތޯރިޓީ (އެޗްޕީއޭ) އިން އާދިއްތަ ދުވަހު ބުނީ މިމަހުގެ 8 ވަނަ ދުވަހު އިތުރު މީހަކު ހިމަބިއްސަށް ޕޮޒިޓިވް ވެފައިވާ ކަމަށެވެ. އެގޮތުން މިދިއަ ޖެނުއަރީ މަހުގެ 8 ވަނަ ދުވަހު ހިމަބިއްސަށް ޕޮޒިޓިވްވި ފުރަތަމަ މީހާއާއެކު މިއަދާ ހަމައަށް ޖުމްލަ 9 މީހަކު ހިމަބިއްސަށް ޕޮޒިޓިވް ވެފައިވާ ކަމަށެވެ.
އެޗްޕީއޭގެ ރެކޯޑްތަކުން ދައްކާގޮތުން މިމަހުގެ 8 ވަނަ ދުވަހު ހިމަބިއްސަށް ޕޮޒިޓިވްވީ މީހާއަކީ މި ފެބްރުއަރީ މަހުގެ ތެރޭގައި ހިމަބިއްސަށް ޕްޒިޓިވްވި ފުރަތަމަ މީހާއެެވެ. އަދި މި މީހާގެ ކުރިން 28 ޖެނުއަރީގައި އެކަކު ހިމަބިއްސަށް ޕޮޒިޓިވް ވެފައި ވެއެވެ.
ރާއްޖެއަކީ ހިމަބިހި (މީސްލްސް) ނައްތާލާފައިވާ ގައުމެއް ކަމުގައި ދުނިޔޭގެ ޞިއްޙަތު ޖަމްޢިއްޔާއިން 2017 ވަނަ އަހަރުގެ ޖޫން މަހުގެ 13 ވަނަ ދުވަހު ކަނޑައަޅާފައިވާއިރު، މި ބަލި ރާއްޖެއިން ފެނިފައިވާ ކަމަށް ހެލްތް މިނިސްޓްރީން އިއުލާން ކޮށްފައިވަނީ ޖެނުއަރީ މަހުގެ 8 ވަނަ ދުވަހު އެވެ.
ބަލި ފެނިފައިވަނީ އުމުރުން ތިން އަހަރުގެ ކުއްޖެއްގެ ހަށިގަނޑުންނެވެ. އެއަށް ފަހު ހެލްތް މިނިސްޓްރީއާ ހެލްތް ޕްރޮޓެކްޝަން އެޖެންސީ ގުޅިގެން ދަނީ ހިމަބިއްސަށް ޝައްކު ކުރެވޭ ފަރާތްތަށް ޓެސްޓު ކުރަމުންނެވެ. އަދި ބައްޔަށް ޝައްކުވާ ފަރާތްތަކުން ވެކްސިން ޖެހުމަށް ހެލްތް މިނިސްޓްރީން ވަނީ އިލްތިމާސް ކޮށްފައެވެ.
މީގެއިތުރުން ދަމަނަވެށީގައާއި ސޯޝަލް ސެންޓަރުގައި އަންނަނީ ހިމަބިއްސަށް ވެކްސިން ޖަހައިދެމުންނެވެ.
