ޗައިނާގައި ކޮރޯނާވައިރަސްއިން މީހުން ސަލާމަތްކުރުމަށް ގިނަ ވަގުތު މަސައްކަތްކުރި ޒުވާން ޑޮކްޓަރެއް މަރުވެއްޖެއެވެ.
27 އަހަރުގެ ޑރ. ސޮންގް ޔިންގްޖީ ވަނީ 10 ދުވަސް ވަންދެން މެދުކެނޑުމެއްނެތި މީހުންނަށް ފަރުވާދިނުމުގައި މަސައްކަތްކޮށްފައެވެ. އަދި އޭނާ މަރުވީ ހާޓް އެޓޭކެއް ޖެހިގެން ކަމަށާއި، ހާޓް އެޓޭކް ޖެހެން މެދުވެރިވީ ރެސްޓްނުކޮށް މާގިނަ ވަގުތު މަސައްކަތުގައި ހޭދަކުރުމުން ކަމަށް ރިޕޯޓުކޮށްފައިވެއެވެ.
ކޮރޯނ ވައިރަސް ފުރަތަމަ ފެތުނުރު ހޫބޭ ޕްރޮވިންސްގައި އޭނާ މަސައްކަތްކުރީ ދުއްވާ އެއްޗެހީގެ މަގުން ދަތުރުކުރާ މީހުންގެ ފިނިހޫނުމިން ބެލުމުގައެވެ. އަދި މިގްރޫޕްގެ ލީޑަރަކަށް ހުރީ ވެސް އޭނާ ކަމަށް ރިޕޯޓުކޮށްފައިވެއެވެ.
ޑެއިލީމެއިލްގައިވާ ގޮތުގައި، ޑރ. ސޮންގް ވަނީ ޖެނުއަރީ 25 އިން ފެށިގެން ރަނގަޅަށް ރެސްޓްނުކޮށް މަސައްކަތުގައި ހޭދަކޮށްފައެވެ. ޗައިނާގެ ކައިއުން ސިޓީއަށް ނިސްބަތްވާ މިޒުވާން ޑޮކްޓަރު މަރުވީ ހޯމަ ދުވަހު މަސައްކަތް ނިންމާލުމަށްފަހު، އޭނާގެ ކޮޓަރިއަށް ގޮސް އުޅެނިކޮށެވެ.
ސޮންގްގެ ދައްތައާ ހަވާލާދީ ޑެއިލީމެއިލްގައި ވަނީ ޑރ.ސިޮންގްއަކީ ވަރަށް ހިތްވަރުގަދަ މަސައްކަތައް ފަރުވާތެރި އަދި އަބަދުވެސް އެހެންމީހުންނަށް އެހީތެރިކަން ފޯރުކޮށްދިނުމުގައި މިސާލު ދައްކާ މީހެއްގެ ގޮތުގައި ސިފަކޮށްފައެވެ.
ޑރ.ސޯންގް މަރުވުމާ ގުޅިގެން އާއިލާއަށް ޗައިނާ ސަރުކާރުން ދަނީ އެހީތެރިކަން ފޯރުކޮށްދެމުންނެވެ.
