ކޯޓުތަކުގެ ޤާނޫނާއި، ފަނޑިޔާރުންގެ ޤާނޫނު އިޞްލާޙު ކުރުމުގެ ބިލެއް، ރައްޔިތުންގެ މަޖިލީހުގެ މިދައުރަށް ހުށަހެޅުމަށް މިއަންނަނީ މަސައްކަތް ކުރައްވަމުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަަމަ ޖަލްސާ، ހޯމަ ދުވަހު ބާއްވާފައިވާއިރު، މިޖަލްސާއަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިއަހަރުގެ ރިޔާސީ ބަޔާން އިއްވަވާދެއްވަމުން ވިދާޅުވީ، ގައުމުގެ ހަމަޖެހުމާއި ރައްޔިތުންގެ ހައްގުތައް ހިމާޔާތް ކުރުމާއި އިޖުތިމާއީ އަދާލަތު ގާއިމު ކުރުމަށް ޝަރުއީ ދާއިރާއަށް ރައްޔިތުންގެ އިތުބާރު ގާއިމު ކުރުމަށް ސަރުކާރުން ކުރަމުންދާ މަސައްކަތުގައި ރައްޔިތުންގެ މަޖިލިސްގެ ދައުރު ވަރަށް ފުރިހަމައަށް ލިބެމުންދާ ކަމަށެވެ.
އެގޮތުން މިދިއަ އަހަރުވެސް ޖުޑީޝަރީ އިސްލާހު ކުރުމުގެ މަސައްކަތްތަކެއް ކުރެވިފައިވާއިރު، ރައްޔިތުންގެ އިތުބާރު ހިފޭ ޖުޑީޝާރީއެއް ގާއިމު ކުރުމަށް މިއަހަރުވެސް ބައެއް ގާނޫނުތަކަށް އިސްލާހު ގެންނަވާނެ ކަމަށެވެ.
އެގޮތުން ރައީސް ޞާލިހުގެ ރިޔާސީ ބަޔާނުގައި ދެ ގާނޫނެއް ފާހަގަ ކުރައްވާފައި ވެއެވެ. އެއީ ކޯޓުތަކުގެ ގާނޫނާއި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލެވެ.
މިދިއަ އަހަރުވެސް ކޯޓުތަކުގެ ގާނޫނަށް އިސްލާހު ގެންނަވައި، ސުޕްރީމް ކޯޓުގެ ފަނޑިޔާރުންގެ ބެންޗު ތިއްބަވާ ފަނޑިޔާރުންގެ އަދަދު، ކުރިން އެގާނޫނުގައި ބަޔާން ކޮށްފައިވާގޮތަށް، އުއްތަމަ ފަނޑިޔާރާއެކު ހަތް ފަނޑިޔާރުން ތިއްބަވާގޮތަށް ކަނޑައެޅިގެންދިޔަ އެވެ.
ސުޕްރީމް ކޯޓުގެ ކުރީގެ އުއްތަމަ ފަނޑިޔާރު އަހުމަދު ފާއިޒު ހުސައިނާއި ސުޕްރީމް ކޯޓުގެ ކުރީގެ ފަނޑިޔާރު އަހުމަދު މުއުތަސިމް އަދުނާނު ފަނޑިޔާރުކަމުން ވަކިކުރައްވާ އުއްތަމަ ފަނޑިޔާރުކަމަށް އޭރު ސުޕްރީމް ކޯޓުގެ ފަނޑިޔާރު އަބްދުﷲ ސައީދު އައްޔަން ކުރެއްވުމަށް ކޯޓުތަކުގެ ގާނޫނަށް އިސްލާހު ގެންނަވައި ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް ތިރިކުރެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ.
ސުޕްރީމް ކޯޓުގެ ފަނޑިޔާރުންގެ އަދަދު ހަތަކަށް އިތުރު ކޮށްފައިވާއިރު، ސުޕްރީމް ކޯޓުގައި ކުރިން ތިއްބެވި ހުރިހާ ފަނޑިޔާރުން ވަނީ މަގާމުން ވަކިކުރައްވާފަ އެވެ. ނަމަވެސް ފަނޑިޔާރު ކަމުގެ މަގާމުން ވަކިކުރެއްވުމުގެ ކުރިން ފަނޑިޔާރު އަބްދުﷲ އަރީފް ވަނީ މަގާމުން އިސްތިއުފާ ދެއްވާފަ އެވެ.
މިވަގުތު ސުޕްރީމް ކޯޓުގައި ތިއްބެވީ ފަސް ފަނޑިޔާރުން ނެވެ. އަނެއް ދެ ފަނޑިޔާރުން އައްޔަން ކުރެއްވުމުގެ މަސައްކަތް ދަނީ ކުރެވެމުންނެވެ. އުއްތަމަ ފަނޑިޔާރުގެ މަގާމުގައި ހުންނެވީ ކުރިންވެސް ސުޕްރީމް ކޯޓުގެ ފަނޑިޔާރު ކަމުގެ މަގާމު އަދާކުރެއްވި ފަނޑިޔާރު އަހުމަދު މުއުތަސިމް އަދުނާން އެވެ.
