ޗައިނާއިން އަންނަ މީހުން ރާއްޖެ ވަނުން މަނާކޮށްފި
2 ފެބުރުއަރީ 2020 | އާދީއްތަ 14:12އެކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި
ޗައިނާ އެއާޕޯޓުގައި ބަޔަކު ސްކްރީންކުރަނީ
ކޮރޯނާ ވައިރަސްއާ ގުޅިގެން ޗައިނާއިން މީހުން ރާއްޖެއަށް އެތެރެވުން ސަރުކާރުން މަނާކޮށްފި އެވެ.
މި ޓްރެވަލް އެޑްވައިޒަރީ ނެރިފައިވާކަން ހާމަކުރެއްވީ ރައީސުލްޖުމްހޫރިއްޔާ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޓޫރިޒަމް މިނިސްޓަރ އަލީ ވަހީދު އެވެ.
މިނިސްޓަރ އަލީ ވަހީދު ވިދާޅުވީ ރައީސުލްޖުމްހޫރިއްޔާގެ ނިންމެވުމުގެ ދަށުން މިރޭ 00:00 އިން ފެށިގެން ޗައިނާއިން ރާއްޖެއަށް މީހުން އެތެރެވުން މަނާވާނެ ކަމަށެވެ. އެގެތެރޭގައި ޗައިނާގައި ހުރި އެހެން ޤައުމުތަކުގެ ރައްޔިތުންވެސް ހިމެނޭނެކަމަށާއި، ޓްރާންސިޓް ފްލައިޓަކުންވެސް، ރާއްޖެ އެތެރެނުވެވޭނެކަމަށް މިނިސްޓަރ ވިދާޅުވި އެވެ.
ޗައިނާ އިން ފެތުރެން ފެށި ކޮރޯނާވައިރަހާ ގުޅިގެން، ރާއްޖެ-ޗައިނާގެ ސީދާ ފްލައިޓްތައް މިދިޔަ ހަފުތާގައި ހުއްޓާލާފައިވާއިރު، މިނިސްޓަރ ވިދާޅުވީ ޗައިނާ މަގުން އަންނަ މީހުންނަށް ރާއްޖެ އެތެރެނުވެވޭ ގޮތް ހެދިނަމަވެސް މިހާރުވެސް ޗައިނާގައި ރާއްޖޭގެ ރައްޔިތުން ދިރިއުޅެމުންދާކަމަށާއި ދިވެއްސަކު ރާއްޖެއަންނަން ބޭނުންވެއްޖެނަމަ ދާންޖެހޭނީ ކަރަންޓީން ފެސިލިޓީއަށްކަމަށެވެ.
މިނިސްޓަރ ވިދާޅުވީ މި ނިންމުން ނިންމެވުމުގެ އެންމެ މައިގަނޑު ސަބަބަކީ ރައްޔިތުންގެ ސަލަމާތާއި ރައްކާތެރިކަން ކަށަވަރުކޮށްދިނުމަށްކަމަށެވެ. މިނިސްޓަރ ވިދާޅުވީ މިވަގުތު ސަލާމަތަށްވުރެ މުހިންމު އެއްވެސް ކަމެއް ނޯންނާނެކަމަށާއި ރާއްޖެ ޒިޔާރާތްކުރާ މީހުންނަށާއި ރާއްޖޭގެ ރައްޔިތުންނަށް އެކަން ސަރުކާރުން ކަށަވަރުކޮށްދޭނަކަމަށެވެ.
މިނިންމުމާ ގުޅިގެން އާޙިރުގައި ނިކުންނާނެ ނަތީޖާއަކަށް ތައްޔާރުވަމުން ދާކަން ފާހަގަކުރައްވައި ޓުއަރިޒަމް މިނިސްޓަރ އިތުރަށް ވިދާޅުވީ ސަރުކާރުގެ ކަމާބެހޭ އިދާރާތަކާއި ކުންފުނިތަކަށް ހަރަދު ކުޑަކުރުމުގެ ފިޔަވަޅު އެޅުމަށް ރައީސުލްޖުމްހޫރިއްޔާ އިލްތިމާސްކޮށްފައިވާކަމަށެވެ. އަދި ހަރަދު ކުޑަކުރުމުގައި އެއްވެސް މުވައްޒަފެއް ވަޒީފާއިން ވަކި ނުކުރާނެކަމަށްވެސް މިނިސްޓަރ ވަނީ ފާހަގަކުރައްވާފައެވެ.
