ހެނދުނުގެ ނާސްތާ ދަރިވަރުންނަށް ފޯރުކޮށްދޭތީ، ޝަރީފަށް އެކަންވީ ބޮޑު އިސްރާފަކަށް!
1 ފެބުރުއަރީ 2020 | ހޮނިހިރު 07:18އެޑިއުކޭޝަން މިނިސްޓަރު ވިދާޅުވަނީ ހެނދުނުގެ ނާސްތާ ފޯރުކޮށްދެމުންދާތީ، ދަރިވަރުން ކިޔެވުމަށް ދޭ ސަމާލުކަން ވެސް އިތުރުވެފައިވާ ކަމަށް
ހެނދުނުގެ ނާސްތާގައި ދަރިވަރުން
ސްކޫލްތަކުގެ ދަރިވަރުންނަށް ހެނދުނުގެ ނާސްތާއަކީ ތަޢުއުލީމީ ނިޒާމުގެ ތެރެއިން މިސަރުކާރުން ކުރާ އެންމެ ބޮޑު އިސްރާފުކަމަށް އިދިކޮޅު ކޯލިޝަންގެ ޕީޕީއެމް-ޕީއެންސީގެ ޕީއެންސީގެ ނައިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވެއްޖެއެވެ.
އިދިކޮޅު ކޯލިޝަނުން ހދ. ކުޅުދުއްފުށި ސިޓީގައި ބޭއްވި ޖަލްސާގައި ވާހަކަ ދައްކަވަމުން ޝަރީފް ވިދާޅުވީ، ތަޢުލީމީ ނިޒާމުގެ ތެރެއިން އައު ކަމެއް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުން ނުކުރާ ކަމަށާއި ނަމަވެސް އާ ކަމެއްގެ ގޮތުގައި މިސަރުކާރުން ފެށި، ހެނދުނުގެ ނާސްތާ ޕްރޮގުރާމް ކުރިއަށްދާ ކަމަށެވެ. އަދި ހެނދުނުގެ ނާސްތާ ޕްރޮގުރާމަކީ ތައުލީމީ ނިޒާމުގެ ތެރެއިން މިހާތަނަށް ކުރާ އެންމެބޮޑު އިސްރާފުކަމަށް ވެސް ޝަރީފް ވިދާޅުވިއެވެ.
މީގެ އިތުރުން އާދަމް ޝަރީފް ވިދާޅުވީ ދަރިވަރުންނަށް ފޯރުކޮށްދޭ ކާނާއަކީ ޞިއްޙީ ގޮތުން އެންމެ ރަނގަޅު ކާނާއަށް ނުވާނަމަ އެކަމަކީ ކަންބޮޑުވާންޖެހޭ ކަމެއް ކަމަށްވެސް ވިދާޅުވެފައެވެ.
ޝަރީފް މިހެން ވިދާޅުވިއިރު، ރާއްޖޭގެ ތަޢުލީމީ ދާއިރާގަައި މަސައްކަތްކުރައްވާ ބައެއް ބޭފުޅުން ވިދާޅުވާ ގޮތުގައި، ހެނދުނު ސެޝަންގެ ދަރިވަރުން ސްކޫލަށް އަންނަނީ އެއްވެސް އެއްޗެއް ނުކައި ހުސްބަނޑާ ކަމަށްވާތީ، ކިޔެވުމަށް ދޭންޖެހޭ ސަމާލުކަން ކުޑަކަން ފާހަގަ ކުރެވޭ ކަމަށެވެ.
ކުރީގެ ރައީސް މުޙައްމަދު ނަޝީދުގެ ވެރިކަމުގައި ވެސް އެމަނިކުފާނު ވަނީ ދަރިވަރުންނަށް ހެނދުނު ނާސްތާ ދިނުން މުހިއްމުކަމެއް ކަމަށް ވިދާޅުވެ، ވަރަށް ބޮޑަށް އެކަމާމެދު ވާހަކަފުޅު ދައްކަވާފައިއެވެ. އަދި ރައީސް ޞާލިހުގެ ސަރުކާރުގެ ފުރަތަމަ އަހަރުގައި މިވަނީ ހެނދުނުގެ ނާސްތާ ޕްރޮގުރާމް ފަށާ، ރާއްޖޭގެ ހުރިހާ ސްކޫލެއްގައި މި ޕްރޮގުރާމް ހިންގަން ނިންމާފައެވެ. އެގޮތުން މިހާރުވެސް ރާއްޖޭގެ ގިނަ ސްކޫލްތަކެއްގައި ހެނދުނުގެ ނާސްތާ ޕްރޮގުރާމް ދަނީ ހިންގަމުންނެވެ.
މިއަހަރުގެ ދިރާސީ އާ އަހަރގެ ކިޔެވުން ފެށި ދުވަހު އެޑިއުކޭޝަން މިނިސްޓަރު ޑރ. ޢާއިޝަތު އަލީ ވިދާޅުވެފައިވަނީ، ހެނދުނުގެ ނާސްތާ ޕްރޮގުރާމަކީ ކާމިޔާބު ޕްރޮގުރާމެއް ކަމަށާއި ހެނދުނުގެ ނާސްތާ ދަރިވަރުންނަށް ފޯރުކޮށްދެމުންދާނީ އެކަމުގެ ފައިދާ ދަރިވަރުންގެ ކިޔެވުމަށް ދޭ ސަމާލުކަން ވެސް އިތުރުވެފައި، ކިޔެވުމަށް ދޭ ސަމާލުކަމާއި ޝައުޤުވެރިކަންވެސް ދަރިވަރުންގެ ކިބައިން ފެންނަމުންދާކަމަށެވެ.
ދަރިވަރުންނަށް ފޯރުކޮށްދޭ ހެނދުނުގެ ނާސްތާގައި ފޯރުކޮށްދޭ ކާނާއަކީ ވެސް ޞިއްޙީ ގޮތުން ރައްކާތެރި، އަދި ފައިދާހުރި ކާނާ ކަމަށްވާއިރު، އަދި އެކަމުގެ ސަބަބުން ދަރިވަރުން ކިޔެވުމަށްދޭ ސަމާލުކަން އިތުރުވަމުންދާކަން ސަރުކާރުން ފާހަގަ ކުރަމުންދާއިރު، މިކަމަކީ ތަޢުލީމީ ނިޒާމުގެ ތެރެއިން ސަރުކާރުން ކުރާ އެންމެބޮޑު އިސްރާފުކަމަށް އިދިކޮޅު މެންބަރު އާދަމް ޝަރީފް ދެކެވަޑައިގަންނަވާ ސަބަބު އޭނާ ހާމަ ކުރައްވާފައެއް ނުވެއެވެ.
