މީސަލްސްއަށް އިތުރު މީހަކު ޕޮޒިޓިވް ވެއްޖެ

މީސަލްސް ފެތުރެން ފެށި ފަހުން އިތުރު މީހަކު މީސަލްސްއަށް ޕޮޒިޓިވް ވެއްޖެއެވެ.

ހެލްތު މިނިސްޓްރީން ބުނީ މިހާތަނަށް ޖުމުލަ 7 މީހަކު މި ބައްޔަށް ޕޮޒިޓިވްވެފައިވާ ކަމަށެވެ. މި މީހާ ޕޮޒިޓިވްވެފައިވަނީ ހޯމަ ދުވަހު ޓެސްޓް ކުރެވުނު މީހުންގެ ތެރެއިންނެވެ. ހެލްތު މިނިސްޓްރީން ބުނީ ހޯމަ ދުވަހު 16 ސާމްޕަލް ޕީސީއާރު ޓެސްޓް އަދި 7 ސާމްޕަލްގެ އެލައިޒާ ޓެސްޓް ހަދާފައިވާ ކަމަށެވެ.

Advertisement

އަދި މީގެ ތެރެއިން ފާއިތުވި 24 ގަޑި އިރުގެ ތެރޭގައި އެކަކު ޕޮޒިޓިވްވި އިރު، އިތުރަށް ތަހުލީލުކުރަން 1 ސާމްޕަލް ފޮނުވިފައިވާ ކަމަށް މިނިސްޓްރީގެ ތަފާސް ހިސާބުތަކުން ދައްކައެވެ. މީސަލްސް އައުޓްބްރޭކް އިޢުލާން ކުރި ފަހުން މިހާތަނަށް 113 މީހަކު ވަނީ މި ބައްޔަށް ޓެސްޓް ކުރެވިފައެވެ.

މިނިސްޓްރީން ޢާންމުކޮށްފައިވާ މަޢުލޫމާތުތަކަށް ބަލާއިރު، ފާއިތުވި 24 ގަޑިއިރު ތެރޭގައި 173 މީހަކު ވަނީ މީސަލްސް ވެކްސިން ޖަހާފައިވެއެވެ. މިހާތަނަށް 4025 މީހަކު މީސަލްސް ވެކްސިން ޖަހާފައިވެއެވެ.

ހެލްތު މިނިސްޓްރީން މިހާތަނަށް މީސަލްސްއާއި ގުޅިގެން ކޮށްފައިވާ މަސައްކަތްތަކަށް ބަލާލާއިރު، ޤައުމީ ފެންވަރެއްގައި ކުރިޔަށް ގެންދެވޭ މީސްލްސް އަށް ހޭލުންތެރިކުރުމުގެ ކެމްޕެއިނެއް 18 ޖަނަވަރީ 2020 ގައި އަތޮޅުތެރޭގައި ވަނީ ފަށާފައެވެ.

އަދި މީސަލްސް ވެކްސިނޭޝަން ކެމްޕެއިނެއް ކުރިޔަށް އޮތް 8 ނުވަތަ 9 ދުވަހުގެ ތެރޭގައި ފަށަން ތައްޔާރުވަމުންދާއިރު، 200,000 މީސްލްސް ވެކްސިން ޖެނުއަރީ މަހުގެ ތެރޭގައި ދިވެހިރާއްޖެއަށް ލިބޭނެ ކަމަށް ލަފާކުރެވޭކަމަށް ހެލްތު މިނިސްޓްރީން ބުނެއެވެ. މި މަހުގެ 23 ވަނަ ދުވަހު 30000 އެމް.އާރް ވެކްސިން އިންޑިޔާ ސަރުކާރުން ރާއްޖެއަށް ވަނީ ހަދިޔާކޮށްފައެވެ.