އޭދަފުށީ ޓާފް ދަނޑު ދޫކުރުން މަޑުޖައްސާލައިފި
27 ޖެނުއަރީ 2020 | ހޯމަ 14:45ޓާފް ދަނޑު ދޫކުރުން މަޑުޖައްސާލީ ޓާފް ދަނޑުގައި މުހިންމު މަސައްކަތްތަކެއް ކުރުމަށް
އޭދަފުށީ ޓާފް ދަނޑުގައި ކްލަބް އޭދަފުށިން ޕްރެކްޓިސްކުރަނީ
ބ. އޭދަފުށީގައި ގާއިމުކުރި މަތީފެންވަރުގެ ޓާފް ދަނޑުގައި މުހިންމު މަސައްކަތްތަކެއް ކުރުމައް، ދަނޑު ދޫކުރުން މަޑުޖައްސައިލައިފި ކަމަށް އޭދަފުށީ ކައުންސިލުން ބުނެފިއެވެ.
އޭދަފުށީ ކައުންސިލުން ނެރުނު ބަޔާނުގައި ބުނީ ޓާފް ދަނޑު ދޫކުރުން މަޑުޖައްސާލީ ޓާފް ދަނޑުގައި މުހިންމު މަސައްކަތްތަކެއް ކުރުމަށް ހަމަޖެހިފައިވާތީ ކަމަށާއި އެ މަސައްކަތް ނިމެންދެން ޓާފް ދަނޑު ދޫކުރުން މަޑުޖައްސާލާފައިވާކަމަށެވެ. އޭދަފުށީ ކައުންސިލުން ބުނީ ދަނޑުގައި މިހާރު ކުރެވެމުންދާ މަސައްކަތް ނިމުނުހާ އަވަހަށް ޓާފް ދަނޑު ކުރިންވެސް ދޫކުރި އުސޫލާއި އެއްގޮތަށް ދޫކުރަން ފެށޭނެކަމަށެވެ.
އޭދަފުށީ ޓާފް ދަނޑު ދޫކުރުން މަޑު ޖައްސައިލިއިރު ކްލަބް އޭދަފުށިން ގެންދަނީ މަޝްހޫރު ކޯޗު އިހުސާން އަބްދުލް ޣަނީ (ސާންތީ) ގެ އިރުޝާދުގެ ދަށުން އެފްއޭ ކަޕަށް ތައްޔާރުވަމުންނެވެ. މީގެއިތުރުން ބ. އަތޮޅު ތައުލީމީ މަރުކަޒުން ކުރިޔަށްގެންދާ ގްރާސް ރޫޓް ޕްރޮގްރާމްގެ ފެށުމަށްވެސް ވަނީ ތައްޔާރުވެފައެވެ.
އޭދަފުށީގެ ޓާފް ދަނޑަކީ އޭދަފުށީގެ މަޝްހޫރު ވިޔަފާރިވެރިޔާ ކްރައުން ކޮމްޕެނީގެ ހިއްސާދާރު އަހުމަދު ނަޒީރުގެ ހަރަދުގައި އެޅުނު ޓާފް ދަނޑެވެ. މި ދަނޑަކީ ރާއްޖޭގައި މިހާތަނަށް އެޅުނު އެންމެ ފެންވަރު ރަނގަޅު ޓާފް ދަނޑުވެސް މެއެވެ. މި ދަނޑު ހަދައިފައިވަނީ ފީފާ އިން ބަލާ މިންގަނޑަށް ފެތޭ ހަތް ކުންފުނީގެ ތެރޭގައި ހިމެނޭ ލިމޮންޓާ ސްޕޯޓްސް އެސްޕީއޭ ކުންފުނިން އުފައްދާ ޓާފް ބޭނުންކޮށްގެންނެވެ.
