ނޭމާގެ ދެ ލަނޑުން ޕީއެސްޖީއަށް މޮޅެއް

ފްރެންޗް ލީގުގައި ލިލް އަތުން ޕެރިސް ސެއިންޓް ޖާމަން (ޕީއެސްޖީ) މޮޅުވެއްޖެ އެވެ.

ލިލް ދަނޑުގައި ކުޅުނު މި މެޗު ޕީއެސްޖީއިން ކާމިޔާބުކުރީ 2-0 ގެ ނަތީޖާއަކުންނެވެ. މެޗު ފަށައިގެން ޕީއެސްޖީގެ ފަރާތުން ތަފާތު މޮޅު އެޓޭކިންގ ގޭމެއް ފެނިގެންދިޔައިރު ޕީއެސްޖީއިން ގެންދިޔައީ ލިލްގެ ގޯލަށް ފުލުފުލުގައި ހަމަލާތައް ފޮނުވައިލައިފައެވެ. މެޗުގެ 26 ވަނަ މިނެޓުގައި ޕީއެސްޖީގެ ކީލިއަން އެމްބާޕޭ އަށް ވަނީ ލަނޑު ޖެހުމަށް ރަނުގެ ފުރުސަތެއްލިބި ބޭކާރުވެފައެވެ. އޭނާ ފޮނުވާލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ.

މެޗުގެ 28 ވަނަ މިނެޓުގައި ޕީއެސްޖީއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ނޭމާ އެވެ. މި ލަނޑު އޭނާ ކާމިޔާބުކުރީ މާރކޯ ވެރާޓީގެ އެހީތެރިކަމާއި އެކުގައެވެ. މި ލަނޑަށްފަހު ވެސް ޕީއެސްޖީއިން ގެންދިޔައީ ލިލެގެ ގޯލަށް ނުރައްކާ ކުރަމުންނެވެ. މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާއަކުން ޕީއެސްޖީ ކުރީގައިއޮވެގެންނެވެ.

މެޗުގެ ދެވަނަ ހާފުގެ ކުރީކޮޅު ޕީއެސްޖީއަށް ވަނީ ޕެނަލްޓީއެއް ލިބިފައެވެ. ލިބުނު ޕެނަލްޓީގެ ފައިދާ ނަގައި ޕީއެސްޖީއިން ވަނީ ލަނޑު ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ވެސް ނޭމާ އެވެ. މި ލަނޑަށްފަހު ނޭމާ ވަނީ އުފާ ފާޅުކުރުމުގެ ގޮތުން ހެލިކޮޕްޓަރ އެކްސިޑެންޓްގައި މަރުވި ބާސްކެޓް ބޯޅަ ލެޖެންޑް ކޯބީ ބްރަޔަންޓްގެ ހަނދާން އާކުރުމުގެ ގޮތުން އޭނާގެ ޖާޒީ ނަމްބަރު އަތުން ދައްކައިލައިފައެވެ.

މި މޮޅާއިއެކު ޕީއެސްޖީއިން ފްރެންޗް ލީގުގެ ތާވަލުގެ އެއްވަނައިގައި އޮތީ ކުޅުނު 21 މެޗުން ލިބުނު 52 ޕޮއިންޓާއިއެކުގައެވެ. ދެވަނައިގައި އޮތް މާސޭ އަށް ކުޅުނު 21 މެޗުން ލިބިފައިވަނީ 42 ޕޮއިންޓެވެ.