ފެން މީޓަރަށް ކޮންމެމަހަކު ނަގަމުންދާ 30 ރުފިޔާ އުނިކުރުމަށް އެދި ކަމާބެހޭ އިދާރާއަށް ހުށަހަޅާފައިވާ ކަމަށް ފެނަކަ ކޯޕްރޭޝަން ލިމިޓެޑުން ބުނެފިއެވެ.

އައްޑޫ ސިޓީ ވަރކްޝޮޕްގައި ފެނަކައިގެ މެނޭޖިންގް ޑިރެކްޓަރ އަޙްމަދު ސަޢީދު މިހެން ވިދާޅުވީ އައްޑޫ ސިޓީގެ މޭޔަރ އަބްދުﷲ ޞާދިޤު (ސޯބެ) ކުރެއްވި ސުވާލަކަށް ޖަވާބުދެއްވުމުންނެވެ.

ސަޢީދު ވިދާޅުވީ ފެން ބޭނުން ނުކުރާ ގެތަކުންނާއި، މީހުން ދިރިނޫޅޭ ގެތަކުގެ ފެން މީޓަރަށް ކޮންމެ މަހަކު 30 ރުފިޔާ ނަގާ މައްސަލަ މީގެ ކުރިން ވެސް ސަމާލުކަމަށް އައިސްފައިވާ ކަމަށާއި، މިކަން މިހެން ކުރާތާ 30 އަހަރުވެފައިވާ ކަމަށެވެ.

ސަޢީދު ވިދާޅުވީ ރައީސް އިބްރާހިމް މުޙައްމަދު ޞާލިޙުގެ މިސަރުކާރުގައި ރައްޔިތުންގެ އަތުން ނަގަމުންދާ 30 ރުފިޔާ ކަނޑާލަދިނުމަށް ކަމާބެހޭ އިދާރާތަކަށް ހުށަހަޅާފައިވާ ކަމަށެވެ.

މޭޔަރު ޞާދިޤު ހާމަކުރެއްވި ކުރެއްވި ގޮތުގައި އައްޑޫ ސިޓީގައި މީހުން ދިރިނޫޅޭ ގެތަކުގެ ފެން މީޓަރުތަކަށް މަހުން މަހަށް 30 ރުފިޔާއިން އަރާތީ ބައެއް ގެތަކަށް 3000 ރުފިޔާއަށް ވުރެ ބޮޑު ބިލެއް އައިސްފައިވާ ކަމަށެވެ. މިމައްސަލައަށް އަވަސް ޙައްލެއް ހޯއްދަވައިދެއްވުމަށް މޭޔަރު އެދިވަޑައިގެންނެވިއެވެ.

ކަރަންޓާއި، ފެނުގެ ބިލު ނުދެއްކުމުން އަންނަ ރަތް ބިލަށް އަލިއަޅުއްވާލައްވާ ސަޢީދު ވިދާޅުވީ ރަތް ބިލު ފޮނުވުމުން އޭގެ މަންފާ ލިބެނީ ރައްޔިތުންނަށް ކަމަށެވެ. އެގޮތަށް އެކަން ނުކޮށްފިނަމަ މުޅި ނިޒާމު ގަޑުބަޑުވެގެންދާކަން ފާހަގަކުރެއްވިއެވެ.

ސަޢީދު ވިދާޅުވީ ކުރިއަށް އޮތްތަނުގައި ފެނާއި ކަރަންޓު ބިލުގެ މި ނިޒާމުތައް އިތުރަށް ހަރުދަނާ ކުރެވިގެންދާނެ ކަމަށެވެ.