ރައީސް ޔާމީން ޖަލުގައި ހުންނަވަނިކޮށް ފެނުނީ ހަމަ "ޖަލު މީހެއްގެ" ގޮތުގައި: އަދުރޭ
ރައީސް ޔާމީންގެ މައްޗަށް މަނީ ލޯންޑަރ ކުރުމުގެ ކުށް ސާބިތުވެ ޖަލުގައި ހުންނަވާތާ 57 ދުވަސް ވެއްޖެ
ކުރީގެ ރައީސް އަބްދުﷲ ޔާމީން
ޖަލު ޙުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީން ޖަލުގައި ހުންނަވަނިކޮށް ދެފަހަރެއްގެ މަތިން އެމަނިކުފާނާ ބައްދަލުވެއްޖެ ކަމަށާއި އެެންމެފަހުން ބައްދަލުވިއިރު، އެމަނިކުފާނު ފެނުނީ "ޖަލު މީހެއްގެ" ގޮތުގައި ކަމަށް އިދިކޮޅު ޕީއެންސީގެ ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެންބަރު ޢަބްދުއްރަހީމް ޢަބްދުﷲ (އަދުރޭ) ވިދާޅުވެއްޖެ އެވެ.
އިދިކޮޅު ޕީޕީއެމް-ޕީއެންސީ ކޯލިޝަނުން ހުކުރު ދުވަހުގެ ރޭ ހއ. ބާރަށުގައި ބޭއްވި ޖަލްސާގައި ވާހަކަ ދައްކަވަމުން އަދުރޭ ވިދާޅުވީ، ރައީސް ޔާމީން ޖަލަށް ލައްވާފައިވަނީ ނުޙައްޤުން ކަމަށާއި، ރައީސް ޔާމީނާމެދު މިސަރުކާރުން އަދި ޖަލުން ވެސް ޢަމަލު ކުރަނީ ވަރަށް އަނިޔާވެރިކޮށް ކަމަށެވެ.
އަދުރޭ އެގޮތަށް ވިދާޅުވިއިރު، މިހާތަނަށް ދައުލަތުން ހިންގާފައިވާ އެންމެ ބޮޑު ޚިޔާނާތް ހިންގާފައި ވަނީ ރައީސް ޔާމީނުގެ ވެރިކަމުގަ އެވެ. އެމްއެމްޕީއާރުސީގެ ޚިޔާނާތުގެ ފައިސާއިން މަނީ ލޯންޑަރ ކުރުމުގެ ކުށް ރައީސް ޔާމީނުގެ މައްޗަށް ސާބިތުވެ، އެމަނިކުފާނުގެ މައްޗަށް ފަސް އަހަރުގެ ޖަލު ޙުކުމެއް އިއްވީ މިދިޔަ ނޮވެންބަރު މަހުގެ 28 ވަނަ ދުވަހު އެވެ. އެހުކުމާއެކު ރައީސް ޔާމީނުގެ މައްޗަށް ވަނީ ފަސް މިލިއަން ޑޮލަރު، ހަ މަސް ދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަށް ދެއްކުމަށް ޢަމުރުކޮށްފަ އެވެ.
މަނީ ލޯންޑަރ ކުރުމުގެ އިތުރުން އެމްއެމްޕީއާރުސީގެ ޚިޔާނާތުގެ މައްސަލަތަކުގައި ރައީސް ޔާމީނުގެ މައްޗަށް ގިނަ ތުހުމަތުތަކެއް ކުރެވިފައިވާއިރު، އެމަނިކުފާނުގެ ޤާނޫނީ ވަކީލުންގެ ޓީމުން ވަނީ، ރައީސް ޔާމީނުގެ މައްޗަށް އިތުރު ތުހުމަތުތަކެއްގެ ތަހުޤީޤު ފުލުހުން ހިންގަމުންދާ ކަމަށް ބުނެފަ އެވެ.
އެ ޖަލްސާގައި ވާހަކަ ދައްކަވަމުން އަދުރޭ ވަނީ ރައީސް ޔާމީނަށް ޖަލުގައި ޢަމަލު ކުރަމުން ގެންދަނީ ވަރަށް އަނިޔާވެރިކޮށްކަމަށް ވިދާޅުވެފަ އެވެ. ނަމަވެސް މޯލްޑިވްސް ކަރެކްޝަނަލް ސަރވިސްއިން ވަނީ އަދުރޭގެ އެވާހަކަތައް ދޮގު ކުރައްވާފަ އެވެ. އަދި ރައީސް ޔާމީނާމެދު ޢަމަލުކުރަނީ، ކުރީގެ ރައީސެއްވީމަ ޢަމަލު ކުރަންޖެހޭ ޚާއްޞަ އުޞޫލުތަކުގެ ތެރެއިން ކަމަށާއި އެމަނިކުފާނަށް ލިބިލައްވަންޖެހޭ އެއްވެސް ޚިދުމަތެއް، އަދި އެއްވެސް ކަމެއްގައި އިހުމާލުވެފައި ނުވާނެ ކަމަށް ކަރެކްޝަނުން ބުނެއެވެ.
