ކުޑަކުދިންނަށް ޖިންސީ ގޯނާ ކުރުމާއި ގުޅޭ މައްސަލަތައް 6 މަހުގެތެރޭގައި ނިންމަންޖެހޭ ގޮތަށް ހަދައިފި

ކުޑަކުދިންނަށް ކުރާ އަނިޔާއާ ގުޅޭގޮތުން ކޯޓުތަކަށް ހުށަހެޅޭ މައްސަލަތައް "ބްލޮކް ޓްރައިލްސް" ނިޒާމެއްގެ ތެރެއިން އަވަހަށް ކުރިއަށް ގެންދިއުމަށް މައްސަލައެއް ހުށަހެޅުނު ތާރީޚުން ފެށިގެން ލަސްވެގެން 6 މަސްދުވަހުގެ ތެރޭގައި އެ މައްސަލަ ނިންމުމަށް ޓަކައި މައްސަލައިގެ ޝަރީޢަތްތައް ޤަވާޢިދުން ކުރިއަށް ގެންދާގޮތަށް ނިންމާ ގޮތަށް ސަރކިއުލާއެއް ޑިޕަރޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ނެރެފިއެވެ.

ޑީޖޭއޭއިން ނެރެފައިވާ ސަރކިއުލާގައި ބުނެފައިވަނީ ޢަދުލު އިންޞާފު ލިބުމުގެ ޙައްޤަކީ އެކަށީގެންވާ އަވަސް މިނެއްގައި ލިބިދޭންޖެހޭ ޙައްޤަކަށް ވެފައި، ޚާއްޞަކޮށް ކުޑަކުދިންނަށް ޖިންސީގޯނާކުރުން ފަދަ ޙައްސާސް މައްސަލަތަކުގައި އިންޞާފު ލިބެންޖެހޭ ފަރާތްތަކަށް އެ ޙައްޤު ކަށަވަރުކުރުމަށް ޓަކައި އެ ވަގުތަކަށް އަޅަންޖެހޭ އެންމެ މުނާސަބު ފިޔަވަޅުތައް އަޅަމުން ގެންދިއުމަކީ އެ މަސްއޫލިއްޔަތު ޙަވާލުކުރެވިފައިވާ އެންމެހައި ފަރާތްތަކުގެ ޒިންމާއެއް ކަމަށެވެ.

Advertisement

އަދި ކޯޓުތަކަށް ހުށަހެޅޭ ކުޑަކުދިންނަށް ޖިންސީ ގޯނާ ކުރުމާ ގުޅުންހުރި މައްސަލަތައް، ކަނޑައެޅިފައިވާ ޤާނޫނީ އިޖުރާޢަތުގެ ތެރެއިން ވީ އެންމެ އަވަސް މުއްދަތެއްގެ ތެރޭގައި ހިންގާ ނިންމުމަށް ޓަކައި "ބްލޮކް ޓްރައިލްސް" ގެ ނިޒާމެއް ޝަރުޢީ ދާއިރާގައި ޤާއިމުކުރުމަށް 19 ޖަނަވަރީ 2020 ގައި ބޭއްވުނު ޖުޑީޝަލް ސަރވިސް ކޮމިޝަނުގެ މި އަހަރުގެ 6 ވަނަ ކޮމިޝަނުގެ ޖަލްސާގައި ނިންމާ، އެކަމާމެދު މަޝްވަރާކުރުމަށް ފަހު އެއްބަސްވެވުނުގޮތަށް، މިފަދަ މައްސަލަތައް ކޯޓުތަކުގައި ލަސްވުމެއް ނެތި ކުރިއަށް ގެންދެވޭނެގޮތަކަށް ޑިޕާރޓްމަންޓުން ކަންކަން ރޭވުމަށް ނިންމާފައިވާ ކަމަށެވެ.

އަދި ބްލޮކް ޓްރައިޓްސް ގެ ނިޒާމުގެ ތެރެއިން މައްސަލަތައް ބަލައި ގޮތް ކަނޑައެޅުމަކީ، މައްސަލައެއް ކޯޓަށް ހުށަހެޅޭ ހިސާބުން ފެށިގެން، އެ މައްސަލައެއް ބަލައި ފައިޞަލާކުރަނިވި ޙުކުމެއް ކަނޑައެޅުމަށް ޓަކައި ޢަމަލުކުރަންޖެހޭ އިޖުރާޢަތުގައި ހިމެނޭ އެންމެ ކުރު މުއްދަތުގެ ތެރޭގައި މައްސަލަ ބަލާ، ދެ ޝަރީޢަތުގެ ދެމެދުގައި ދެވެން އޮތް އެންމެ ކުރު މުއްދަތުގެ ތެރޭގައި މައްސަލަ ތާވަލުކޮށް، މައްސަލަ ހިންގައި، ތުހުމަތުކުރެވުނު ފަރާތަށާއި އަނިޔާ ލިބުނު ފަރާތަށް ލިބިދޭންޖެހޭ އިންޞާފު އޭގެ އަވަސްކަމާއި ހަލުވިކަމާއެކު ފޯރުކޮށްދެވޭނެ ގޮތަކަށް ޝަރީޢަތްތައް ހިންގުންކަމުގައި ވީހިނދު، ޝަރުޢީ ކޯޓުތަކަށް ހުށަހެޅޭ ކުޑަކުދިންނަށް އަނިޔާ ކުރުމާގުޅުން ހުރި މައްސަލަތައް ހިންގުން އަވަސްކުރުމަށް ޓަކައި އަޅަންޖެހޭ ފިޔަވަޅުތަކެއް ވަނީ އެކުލަވާލާފައެވެ.

އެގޮތުން ކުޑަކުދިންނަށް ކުރާ އަނިޔާއާ ގުޅުންހުރި މައްސަލައެއް ކޯޓަށް ހުށަހެޅުމާއެކު 24 ގަޑިއިރުގެ ތެރޭގައި މި މައްސަލަޔަށް އިސްކަންދީގެން ކޯޓަށް ހުށަހެޅިފައިވާ އެހެނިހެން މައްސަލަތައް މެނޭޖްކޮށް، އަވަސްކަމާއި ހަލުވިކަމާއެކު އެ މައްސަލަ ނިންމޭނެގޮތަކަށް ހަމަޖައްސަންޖެހޭ އިދާރީ އެންމެހައި އިންތިޒާމުތައް، އެ މައްސަލައެއް ބެލުމަށް ޙަވާލުކުރެވޭ ފަނޑިޔާރުގެ މަޝްވަރާއާއެކު އެ ކޯޓެއްގެ ރަޖިސްޓްރަރ ނުވަތަ ޗީފް އެޑްމިނިސްޓްރޭޓަރ ނުވަތަ އިދާރީ އެންމެ އިސް މުވައްޒަފު ހަމަޖައްސަންވާނެ ކަމަށް މި ސަރކިއުލާގައި ބުނެފައިވެއެވެ.

އަދި ކުޑަކުދިންނަށް ޖިންސީ ގޯނާކުރުމުގެ މައްސަލަތައް އަވަސްކަމާއި ހަލުވިކަމާއެކު ކުރިއަށް ގެންދިއުމަށް ޓަކައި، މައްސަލަ ރައްދުވާ ފަރާތާއި މައްސަލައިގައި ދަޢުވާކުރާ ފަރާތަށް، ކަނޑައެޅިފައިވާ އިޖުރާއާތުގެ ތެރެއިން ޤާނޫނު ލާޒިމުކުރާ މުއްދަތުތައް ލިބިދީ، މައްސަލަ މެނޭޖުކޮށް، ޝަރީޢަތުގެ މަރުޙަލާ ފެށުނީއްސުރެ ނިމެންދެން ދެ ޝަރީޢަތުގެ ދެމެދުގައި 48 ގަޑިއިރަށް ވުރެ ދިގު މުއްދަތެއް ހޭދަނުވާނޭހެން މައްސަލަ ތާވަލުކޮށް އަދި މައްސަލައިގެ ތާވަލު މައްސަލައިގެ ޚަޞްމުންނާ ޙިއްޞާކޮށް، އެ މައްސަލައެއް ހުށަހެޅުނު ތާރީޚުން ފެށިގެން ލަސްވެގެން 6 މަސްދުވަހުގެ ތެރޭގައި އެ މައްސަލަ ނިންމުމަށް ޓަކައި މައްސަލައިގެ ޝަރީޢަތްތައް ޤަވާޢިދުން ކުރިއަށް ގެންދަންވާނެ ކަމަށް ބުނެފައިވެއެވެ.

މީގެ އިތުރުން މައްސަލައިގެ ކޮންމެ ޝަރީޢަތުގެ އަޑުއެހުމެއްގައި ކުރިއަށްދާނީ ކޮން ކަންކަމެއްކަން މައްސަލައިގެ ޚަޞްމުންނަށް އެނގޭނޭހެން އެކަމުގެ މަޢުލޫމާތު ކުރިއާލައި ޚަޞްމުންނާ ޙިއްޞާކުރަންވާނެ ކަމަށް ބުނެފައިވެއެވެ.

ފަހުކަމެއްގައި ގޮތުގައި ބުނެފައިވަނީ ކުޑަކުދިންނަށް އަނިޔާ ކުރުމުގެ މައްސަލަތަކުގެ ފާއިތުވި މަހުގެ ތަފާސްހިސާބުގެ މަޢުލޫމާތު ޖެހިގެން އަންނަ މަހުގެ 10 ވަނަ ދުވަހުގެ ކުރިން ޑިޕާޓްމަންޓަށް ފޮނުވަންވާނެ ކަމަށެވެ. އަދި މިގޮތުން ފޮނުވާ ތަފާސްހިސާބުގައި، އެ މައްސަލައެއް ހުށަހެޅުނު ތާރީޚާއި، މައްސަލައިގެ އަޑުހުންތައް ތާވަލުކުރެވިފައިވާގޮތާއި، މައްސަލަ ކުރިއަށް ގޮސްފައިވާ ހިސާބާއި، އަދި މައްސަލަ ކުރިއަށް ދެންދިއުމުގައި ކުރިމަތިވާ ދަތިތަކެއް ހުރިނަމަ އެކަމުގެ މަޢުލޫމާތު ހިމަނަންވާނެ ކަމަށް ބުނެފައިވެއެވެ.

މި ސަރކިއުލާގައި ބުނެފައިވަނީ މިގޮތުގެމަތިން މިކަން އިންތިޒާމްކުރުމުގެ މަޤުޞަދަކީ، މައްސަލައިގައި ތުހުމަތުކުރެވޭ ފަރާތުގެ މައްޗަށް ކުރެވިފައިވާ ތުހުމަތާމެދު އަވަސްކަމާއި ހަލުވިކަމާއެކު ނިހާއީ ޙުކުމެއް ކުރެވިގެންދިއުމާއެކު، މުޅި މުޖުތަމަޢުގެ ޢާންމު މަޞްލަޙަތު ހިމާޔަތްކޮށް، އަނިޔާ ލިބުނު ފަރާތާއި މައްސަލައިގައި ހިމެނޭ ހެކިވެރިންގެ ޙައްޤުތައް ހިމާޔަތްކޮށްދީ، އަވަސްކަމާއެކު މައްސަލައަށް ޙައްލެއް ލިބިދިގެންދާނެ ކަމަށެވެ.

އަދި ލިބެން ހުރި ވަޞީލަތްތަކުގެ ބޭނުން އެންމެ އެދެވޭ ގޮތުގައި ހިފުން ކަމުގައި ވީހިނދު، ކަމާގުޅުންހުރި އެންމެހައި އިދާރާތަކާއި، ޝަރުއީ ދާއިރާގެ ފަނޑިޔާރުންނާއި މުވައްޒަފުންގެ ބައިވެރިވުމާއި ޝާމިލުވުން އެންމެ ފުރިހަމަގޮތުގައި ފޯރުކޮށްދީ، މިފަދަ މައްސަލަތަކަށް އަވަސްކަމާއި ހަލުވިކަމާއެކު ނިހާއީ ޙުކުމެއް ލިބިގެންދާނެގޮތަކަށް ކޯޓުތަކުން ހަމަޖައްސަންޖެހޭ އެންމެހައި އިންތިޒާމްތައް ހަމަޖެއްސުމަށް ޑީޖޭއީން ވަނީ އަންގާފައެވެ.