ޕައިތަން ޕްރޮގްރާމިންގް ދަސްކޮށްދޭ ކޯހެއް އެމްއެމްއޭ އިން ފަށައިފި
ކޯސް އަމާޒުކޮށްފައި ވަނީ މިދިޔަ އަހަރު އޯލެވެލް ނިންމާފައިވާ ދަރިވަރުންނަށް
ޕައިތަން ޕްރޮގްރާމިންގް ކޯހުގެ ތެރެއިން
ޒުވާނުންނަށް ޕައިތަން ޕްރޮގްރާމިން ލޭންގުއޭޖް ދަސްކޮށްދޭ ކުރު ކޯހެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފަށައިފިއެވެ.
'އިންޓްރަޑަކްޝަން ޓު ކޮމްޕިއުޓަރ ސައިންސް އެންޑް ޕްރޮގްރާމިން ޔޫސިން ޕައިތަން' ގެ ނަމުގައި ކުރިއަށް ގެންދާ މި ކޯސް އަމާޒުކޮށްފައި ވަނީ މިދިޔަ އަހަރު އޯލެވެލް ނިންމާފައިވާ ދަރިވަރުންންނަށެވެ. މި ކޯހުގައި ވިހި ފަރާތަކުން ވަނީ ބައިވެރިވެފައިވާ ކަމަށް އެމްއެމްއޭ އިން މައުލޫމާތުދެއެވެ.
މި ކޯހުގެ ބައިވެރިންނާއި ވާހަކަ ދައްކަވަމުން އެމްއެމްއޭގެ ގަވަރުނަރު އަލީ ހާޝިމް ވިދާޅުވީ މާލީ ނިޒާމުގެ ކުރިއެރުމާއި ޓެކްނޮލަޖީ އާއި ވަރަށް ބޮޑަށް ގުޅިފައިވާކަމަށެވެ. ވަކިން ޚާއްސަކޮށް ގައުމީ ޕޭމެންޓް ނިޒާމެއް ގާއިމުކުރެވުމުން ޕްރޮގްރާމާސް އަށް އޮންނަ ޑިމާންޑް މިހާރަށްވުރެ އިތުރުވާނެ ކަން ފާހަގަކުރެއްވިއެވެ.
ގަވަރުނަރު ވިދާޅުވީ މި ކޯހު ލިބޭ މައުލޫމާތުގެ އަލީގައި ކޯހުގެ ބައިވެރިންގެ ޕްރޮބްލަމް ސޯލްވިން ސްކިލް ކުރިއަރާ ކަންކަމާއި މެދު ވިސްނާގޮތް ބަދަލުވާނެކަމަށެވެ.
ނުވަ ހަފްތާއަށް ކުރިއަށް ގެންދާ މި ކޯހުގައި ކިޔަވާދެއްވާނީ އެމްއެމްއޭގެ ފަންނީ ބޭފުޅުން ކަމަށް އެ އޮތޯރިޓީ އިން ބުނެއެވެ.
