ރިހާކުރުފުޅި ވަގަށް ނަގައިގެން ޖަލުގައި އެއް އަހަރު، ނިޒާމް އިސްލާހު ކުރުމަކީ މަޖިލީހުގެ ޒިންމާއެއް: ޖީހާން
ޕެރޯލް ބޯޑު ޒިންމާދާރު ކުރުވުމާއި ބޯޑު އެކުލެވިގެން ވާގޮތް ބަދަލުކުރުމަށް ހުށަހަޅާފައިވޭ
ހިންނަވަރު ދާއިރާގެ މެމްބަރު ޖީހާން މަހުމޫދް
އިންސާފުވެރި ނިޒާމެއް ޤާއިމުކޮށްދިނުމަކީ ރައްޔިތުންގެ މަޖިލީހުގެ ޒިންމާއެއް ކަމަށް ރައްޔިތުންގެ މަޖިލީހުގެ ހިންނަވަރު ދާއިރާގެ މެންބަރު ޖީހާން މަހުމޫދު ވިދާޅުވެއްޖެއެވެ.
ޖަލުތަކުގައި ތިބި ފަރާތްތަކުން ފޮނުވާފައިވާ ސިޓީތައް ދިރާސާ ކުރުމަށް އެކުލަވާލާފައިވާ ސަބްކޮމިޓީގެ ބައްދަލުވުމުގައި ޖީހާން ވަނީ ކޮމިއުނިޓީ ސެންޓެންސިންގް ޕްރޮގުރާމް ނުވަތަ ޑައިވަރޝަން ޕްރޮގުރާމުތައް ހިންގުމަށް ޖާގަލިބެނޭހެން ޕެރޯލް ޤާނޫނު އިޞްލާޙުކުރުމަށް ހުށަހަޅުއްވާފައިވެއެވެ. އިޞްލާޙުތައް ތަފުޞީލުކޮށްދެއްވަމުން މެންބަރު ވިދާޅުވީ ޕެރޯލް ޤާނޫނަކު ނެތް ކޮމިއުނިޓީ ސެންޓެންސިންގް ޕްރޮގުރާމް ހިންގޭނެ މަގު ތަނަވަސްވެފައި ނެތް ކަމަށެވެ.
ޕެރޯލް ޤާނޫނަށް ގެންނަން ޖެހޭ އިޞްލާޙުތަކަށް އަލިއަޅުއްވާލައްވާ ޖީހާން ވިދާޅުވީ ކުދި ކުށްތައް ކުރާ ފަރާތްތަކަށް ކޮމިއުނިޓީ ސެންޓެންސިންގް ނުވަތަ ޑައިވަރޝަން ޕްރޮގުރާމުތައް ހިންގިދާނެ ކަމަށެވެ.
ޕެރޯލް ޤާނޫނަށް ހުށަހެޅިފައިވާ އިޞްލާޙުތަކުގެ ތެރޭގައި ކޮމިއުނިޓީ ސެންޓެންސިންގް ޕްރޮގުރާމް ނުވަތަ ޑައިވަރޝަން ޕްރޮގުރާމުތަކަށް ފުރުޞަތު ދިނުމާއި، ޕެރޯލް ބޯޑު ޒިންމާދާރު ކުރުވުމާއި ބޯޑު އެކުލެވިގެން ވާގޮތް ބަދަލުކުރުމުގެ އިތުރުން ބޯޑުގެ މަސައްކަތްތަކަކީ އެބޯޑުން އިސްނަގައިގެން ކުރާ ކަމެއްގެ ގޮތުގައި ކަނޑައެޅުމެވެ.
