ހޫޘީ ހަނގުރާމަވެރިން ދިން ޙަމަލާތަކެއްގައި ޔަމަނުގެ 80 ސިފަައިން މަރުވެއްޖެ
20 ޖެނުއަރީ 2020 | ހޯމަ 07:21ހޫޘީން ޙަމަލާ ދިފައިވަނީ މެރުދެތެރޭ ސަންޢާގައި ޤާއިމުކޮށްފައިވާ އަސްކަރީ މަރުކަޒެއްގެ މިސްކިތަކައް
ޔަމަނުގެ އަސްކަރިއްޔާގެ ރުކުރުވާލެވިފައިވާ ފައުޖެއް
ހޫޘީ ހަނގުރާމަވެރި ޖަމާޢަތުން، ޔަމަނުގެ އަސްކަރިއްޔާއަށް ޢަމާޒުކޮށްދިން ޙަމަލާތަކެއްގައި އެޤައުމުގެ 80 އަށް ވުރެ ގިނަ ސިފައިން މަރުވެއްޖެއެވެ.
ޔަމަނުގެ އަސްކަރިއްޔާއާއި، ކުއްލި ޙާލަތްތަކުގައި އެހީތެރިކަން ފޯރުކޮށްދޭ އިސް މަސްއޫލުވެރިންނާއި ޙަވާލާދީ ބައިނަލްއަޤުވާމީ މީޑިއާތަކުން ރިޕޯޓުކުރާގޮތުގައި، އީރާނުން ވާގިވެރިވެދޭ ހޫޘީ ހަނގުރާމަވެރިން މިސައިލާއި ޑްރޯން ބޭނުންކޮށްގެން ޙަމަލާތަކެއް ދީފައިވަނީ މިދިޔަ ހޮނިހިރު ދުވަހުއެވެ.
އެގޮތުން ހޮނިހިރު ދުވަހުގެ މަޣްރިބު ނަމާދު ވާގުތާއި ދިމާކޮށް ވެރިރަށް ސަންޢާއާއި 105 މޭލު ދުރުގައި އޮންނާ މާރިބު އަވަށުގައި ޤާއިމުކޮށްފައިވާ ޔަމަނުގެ އަސްކަރިއްޔާގެ މަރުކަޒެއްގެ މިސްކިތަކަށް ޢަމާޒުކޮށް ހޫޘީން ޙަމަލާ ދީފައިވާކަމަށް ޔަމަނު އަސްކަރިއްޔާއިން ބުނެއެވެ. މި ޙަމަލާގައި ސިފައިން 83 މީހުން މަރުވެ 148 މީހުން ޒަޚަމްވި ކަމަށް ރިޕޯޓުތައް ބުނެއެވެ.
މިއީ 2014 ވަނަ އަހަރުން ފެށިގެން ހޫޘީ ހަނގުރާމަވެރި ޖަމާޢަތުން އެޤައުމުގެ ސަރުކާރާއި ދެކޮޅަށް ދެމުންގެންދާ ޙަމަލާތަކުގައި ސިފައިންނާއި ފުލުހުންނަށް، ނުވަތަ ސަލާމަތީ ބާރުތަކަށް ޢަމާޒުކޮށް ދަނީ ޙަމަލާތައް ދެމުންނެވެ. މި ޙަމަލާތައް ދިނުމުގައި އެ ޖަމާޢަތައް އެހީތެރިވަމުންދަނީ އީރާނުން ކަމަށް ޔަމަނު ސަރުކާރުން ބުނެއެވެ. ހޫޘީންގެ ޙަމަލާތަކައް ބަލާއިރު ހޮނިހިރު ދުވަހުގެ މިޙަމަލާތަކަކީ ފަހަކަށް އައިސް ޔަމަނުގެ ސަލާމަތީ ބާރުތަކަށް ޢަމާޒުކޮށް ހޫޘީން ދިން މިފަދަ އެންމެ ނުރައްކާތެރު ގެއްލުން ބޮޑު ޙަމަލާކަމަށް ޔަމަނުގެ ސަންޢާ. އަލް-ޙަދަޘް ޓީވީން ރިޕޯޓު ކުރެއެވެ.
ޔަމަނުގެ ސަބާ ނިއުސް އޭޖެންސީން ޚަބަރުފަތުރާގޮތުގައި ހޫޘީން ސަލާމަތީ ބާރުތަކާއި ދެކޮޅަށް މިހާ ވަރުގަދަ ޙަމަލާތަކެއް ދޭން މިފެށީ، ޔަމަނުގެ އުތުރު ނިހްމް ޞަރަޙައްދުގައި ޙަރަކާތްތެރިވަމުންދާ ހޫޘީ ހަނގުރާމަވެރިންނާއި ދެކޮޅަށް ސަރުކާރުގެ އަސްކަރީ ފައުޖުތަކުން ވަރުގަދަ އޮޕަރޭޝަނެއް ހުކުރު ދުވަހުން ފެށުމާއި ގުޅިގެންނެވެ. ޔަމަނުސަރުކާރުގެ އަސްކަރީ ފައުޖުތަކުން ހޫޘީންނާއި ދެކޮޅަށް ޙަމަލާދެމުން ދަނީ ސައުދީޢަރައްބިޔާގެ އެހީތެރިކަމާއެކުގައެވެ. އެއްގަމާއި ވައިގެ މަގުން ހޫޘީންނާއި ދެކޮޅަށް އަސްކަރީ ޙަމަލާތައް ހުކުރ ދުވަހުން ފެށިގެން ދެމުންދާއިރު، ގިނަ ޢަދަދެއްގެ ހަނގުރާމަވެރިން މަރާލާ އެމީހުންގެ މައި ޖަގަހަތައް ނައްތާލެވިފައިވާކަމަށް ޔަމަނުގެ އަސްކަރިއްޔާއާއި ޙަވާލާދީ ސަބާ ނޫސް އޭޖެންސީން ބުނެއެވެ.
ހޫޘީން ރައްދުގައި ނުވަތަ ޖާނު ސަލާމަތްކުރުމަށް ކަމަށް ބުނެ ރައްދު ޙަމަލާތައް ދެމުންދާއިރު، ދެފަރާތުގެ ކުރިމަތިލުންތަކުގައި މަދަނީން މަރުވަމުންދާކަމަށް ރިޕޯޓުތައް ބުނެއެވެ. އެެހެންނަމަވެސް ޔަމަނުގެ އަސްކަރިއްޔާއިން ބުނެފައިވަނީ ޢާންމް ފަރުދުންނަށް ޢަމާޒުކޮށް ޙަމަލާއެއް ދީފައި ނުވާނެކަމަށެވެ. އަދި ހޫޘީންނާއި ދެކޮޅަށް ކުރިޔަށްގެންދާ އަސްކަރީ އޮޕަރޭޝަނުގެ އަސަރު ޢާންމު ރައްޔިތުންނަށް ކުރަމުންދަނީ، އަސްކަރިއްޔާގެ ޙަމަލާތަކުން ރެކެން ހޫޘީން ޢާންމުން އައްޑަނަައެއްގެ ގޮތުގައި ބޭނުން ކުރަމުންދާތީއެވެ. އަދި އަސްކަރިއްޔާގެ ޙަމަލާތަކުން ދިފާޢުވުމަށް ގޮސް ޢާންމު ޞަރަޙައްދުތަކުގައި ޖަގަހަ ހަދައިގެން ޤާއިމުވެ ތިބޭތީ ކަމަށެވެ. އެހެންނަމަވެސް ހޫޘީންނާއި ދެކޮޅަށް ޙަމަލާދޭއިރު ޢާންމު ރައްޔިތުންގެ ސަލާމަތާާއި ރައްކާތެރިކަން ކަށަވަރުކުރާނެކަމުގެ ޔަޤީންކަން ޔަމަނު އަސްކަރިއްޔާއިން ވަނީ ދީފައެވެ.
ޔަމަނުގެ އަސްކަރިއްޔާއާއި، ހޫޘީންގެ ކުރިމަތިލުންތައް މިދިޔަ ހުކުރު ދުވަހުން ފެށިގެން ކުރިޔަށްދާއިރު، އެންމެ ބޮޑު ގެއްލުމެއް ލިބެމުންދަނީ ހޫޘީންގެ ފަރާތުންކަމަށް ޔަމަނުގެ ސަރުކާރުން ބުނެއެވެ. އެޤައުމުގެ ރައީސް އަބްދުއް ރައްބޫ މަންޞޫރު ހާދީ ވިދާޅުވެފައިވަނީ، ހޫޘީންނާއި ހެދި އެޤައުމުގެ ދާޚިލީ ހަމަޖެހުމާއި ޞުލްޙަ މަސަލަސްކަމަށް ބުރޫ އަރަމުންދާކަމަށެވެ. އަދި ޤައުމުގެ މިނިވަންކަމާއި އިސްތިޤުލާލަށް އޮތް ބޮޑޫ ނުރައްކަލެއްގެ ގޮތުގައި ރައީސް ވަނީ ހޫޘީން ސިފަ ކުރައްވާފައެވެ.
ވަކިން ޚާއްޞަކޮށް ހޮނިހިރުދުވަހުގެ އިރުއޮއްސުނު ވަގުތާއި ދިމާކޮށް ސިފައިން އަސްކަރީ މަރުކަޒެއްގެ މިސްކިތައް ޢަމާޒުކޮށް ހޫޘީން ދިން ޙަމަލާ ރައީސް އަބްދުއް ރައްބޫ މަންޞޫރު ހާދީ ވަނީ ވަރަށް ހަރުކަށި އިބާރާތުން ކުށްވެރިކުރައްވާފައެވެ. މިއީ ޤައުމުގައި ޞުލްޙަ މަސަލަސްކަން ޤާއިމު ކުރުމުގެ ވިސްނުމެއް ނެތްކަން ދައްްކުވައިވޭ ވަރުގަދަ ޓޭރަސްރިސްޓު ޙަމަލާއެއްކަމަށެވެ. އަދި އީރާނުގެ އަވައިގަ ޖެހިގެން ކުރާހާވެސް ކަމަކީ މީހުން މެރުމާއި، ފަނާކުރަނިވި ގެއްލުންދިނުންކަމަށް ހާދީ ވިދާޅުވެފައިވެއެވެ.
ސަރުކާރާއި އަސްކަރިއްޔާއިން ހޫޘީންނަށް ޢަމާޒުކޮށް ބަހުގެ ޙަމަލާތައް ދެމުން ގެންދިޔަނަމަވެސް ހޮނިހިރު ދުވަހު މިސަކިތައް ޙަމަލާ ދިން ކަމެއް ހޫޘީން އެއްބަސްވެފައެއް ނުވެއެވެ. އަދި ޙަމަލާގެ ޒިންމާވެސް އުފުލާފައެއް ނުވެއެވެ.
