ޝަބާނާ އަޒްމީގެ ޙާލު މިހާރު ރަނގަޅު

ބޮލީވުޑްގެ މަޝްހޫރު ފިލްމީ ތަރި ޝަބާނާ އަޒްމީގެ ޙާލު މިހާރު ރަނގަޅުކަމަށް އޭނާގެ ޑޮކްޓަރު ބުނެފިއެވެ.

ވެޓެރަން ޝަބާނާ އަޒްމީއަށް މިހާރު ފަރުވާ ދެމުންދާ މުމްބާއީގެ ކޮކިލާބެން އަމްބާނީ ހޮސްޕިޓަލްގައި ފަރުވާދެމުން އަންނައިރު، ޝަބާނާގެ ޙާލަތު ރަނގަޅުކަމަށާއި، މިހާރު ހޮޮސްޕިޓަލުގައި ބާއްވާފައި އޮތީ އިތުރު ފަރުވާއަށް ބަލަންޖެހޭ ކަންކަން ބެލުމަށް ކަމަށް، އެ ހޮސްޕިޓަލުގެ އެކްޒެކެޓިވް ޑައިރެކްޓަރ ޑރ. ސަންތޯޝް ކުމާރު ޢާންމު ކުރައްވާފައިވާ ބަޔާނެއްގައި ވެއެވެ.

ޝަބާނާ އަޒްމީއާއި އޭނޭގެ ފިރިމީހާ އަދި މަޝްހޫރު ޅެންވެރިއެއް ކަމުގައިވާ މަޝްހޫރު ޖާވިދް އަޚްތަރާއި ދެމީހުން ދަތުރުކުރަމުން ދިޔަ ކާރު އެކްސިޑެންޓުވީ އިއްޔެ ހަވީރުގެ ވަގުތެއްގައެވެ. މުމްބާއީ އާއި ޕޫނާ ގުޅޭ ހައިވޭގައި ދަތުރުކުރަމުން ދިޔައިރު، ދުއްވާފައި ދިޔަ ޕިކަޕެއްގައި ޖެހިގެންނެވެ. މި ޙާދިސާގައި ޝަބާނާގެ ބޮލަށާއި މައިބަދަ އަށް ގެއްލުންވިއެވެ. މިޙާދިސާގައި ޖާވިދަށް މާބޮޑު އަނިޔާއެއް ނުވެ ސަލާމަތްވިއެވެ.

މި ޙާދިސާއާއި ގުޅިގެން ޝަބާނާގެ ކާރު ދުއްވަން އިން މީހާ ކުށްވެރިކޮށް ކާރު ޖެހުނު ލޮރީގެ ޑްރައިވަރު ވަނީ ފުލުހުންނަށް ރިޕޯޓުކޮށްފައެވެ. ޚަބަރު ލިބިފައިވާ ގޮތުގައި މި އެކްސިންޑެންޓް ހިނގީ ޝަބާނާގެ ކާރު ޑްރައިވަރަށް ކާރު ކޮންޓްރޯލް ނުކުރެވިގޮސް ކުރިމަތިން ދުއްވާފައި ދިޔަ ބޮޑު ލޮރީއެއްގައި ޖެހިގެންނެވެ.

ޝަބާނާ އެކްސިޑެންޓުވެ ލިބުނު ގެއްލުމަށް ފަރުވާ ހޯދަމުންދާއިރު، އިންޑިއާގެ ބޮޑު ވަޒީރު ނަރެންދްރަ މޯދީއާއި ވަޒީރުންނާއި ސިޔާސީ ލީޑަރުން ދަނީ އޭނާއަށް އަވަސް ޝިފާއަށް އެދި ޓްވިޓަރ އަދި ފޯނުގެ ޒަރީއާއިން މެސެޖް ފޮނުވަމުންނެވެ. އަދި ބޮލީވުޑްގެ ގިނަ ޢަދަދެއްގެ ފިލްމީ ތަރިން ރެއާއި މިއަދުގެ ވަގުތުތަކުގައި ޝަބާނާ އެޑްމިޓްކޮށްފައި އޮތް ހޮސްޕިޓަކަށް ޒިޔާރަތްކުރަމުންް ދާކަމަށް ބޮލީވުޑް ރިޕޯޓުތައް ބުނެއެވެ. ޝަބާނާ ގެ ޙާލު އެޑްމިޓް ކުރި އިރު ވަރަށް ސީރިއަސް ނަމަވެސް މިހާރު ސްޓޭބަލް ވެފައިވާކަމަށް ޑޮކްޓަރުން ބުނި ނަމަވެސް. އޭނާގެ ފޭނުން އޭނާ ފެންނާނެ އިރެއްގެ އިންތިޒާރުގައި ހޮސްޕިޓަލް ކައިރީ މަޑުކޮށްލައިގެން ތިބި ކަމަށްވެސް ރިޕޯޓުތައް ބުނެއެވެ.