ތުއްތު ކުދިންނަށްކުރާ ޖިންސީ ގޯނާއި ދެކޮޅަށް, ހޮނިހިރު ދުވަހު ހިމޭން އިހުތިޖާޖެއް ކޮށްފިއެވެ.

ކުޑަކުދިންނަށް ޖިންސީ ގޯނާކުރާ މައްސަލަ އަނެއްކާ ފެންމަތިވެފައިވަނީ މީގެ ތިން ދުވަހެއް ކުރިން ގއ. ކަނޑުހުޅުދޫގައި ދެ އަހަރުގެ އަންހެން ކުއްޖަކަށް އާއިލާގެ ތިން ބަފައިންގެ ވެގެން ޖިންސީ ގޯނާކުރިކަމުގެ ތުހުމަތުތަކާއި އެކުއެވެ. އެކަމުގައި ހިމެނޭ އެ ކުއްޖާގެ ބައްޕަ، ކާފަ އަދި މުނިކާފަ ވަނީ ފުލުހުންގެ ބެލުމުގެ ދަށަށް ގެންގޮސްފައެެވެ.

އެ ތުއްތު ކުއްޖާއަށް ޖިންސީ ގޯނާކުރި މައްސަލަ އާއި ގުޅިގެން ހުކުރު ދުވަހު އިހްތިޖާޖު ކޮށްފައިވަނީ ޖެންޑަރ މިނިސްޓްރީ ކުރިމަތީގައެވެ. ހޮނިހިރު ދުވަހު އިހްތިޖާޖު ކޮށްފައިވަނީ އާޓިފިޝަލް ބީޗު ސރަހައްދުގައެެވެ. ގާތްގަނޑަކަށް 130 ގިނަ މީހުން ބައިވެރިވި މި އިހްތިޖާޖުގެ އެ މީހުން ތިބީ ޖިންސީ ގޯނާ އާއި ދެކޮޅަށް އެމީހުންގެ ޝުއޫރު ފާޅުކޮށް ލިޔެފައި ހުރި ބޯޑުތައް ހިފައިގެންނެވެ.

ހޮނިހިރު ދުވަހު ހަވީރު ހަަަތަރެއް ޖެހިއިރު ފެށި އިހުތިޖާޖު އިންތިޒާމުކުރި ފަރާތުން ބުނީ، އިހުތިޖާޖުކުރުމުގެ ބޭނުމަކީ ކުޑަކުދިންނަށް ޖިންސީ ގޯނާކުރާ މީހުންނަށް މިހާރަށްވުރެ ބޮޑު އަދަބެއް ދިނުމަށް ގޮވާލުން ކަމަށެވެ.

އެ މީހުން ބުނީ، އަޑުއުފުލަން އައި ފަރާތްތަކަކީ ސޯޝަލް މީޑިއާ މެދުވެރިކޮށް އިހުތިޖާޖުގެ މައުލޫމާތު ލިބިގެން ދިޔަ މީހުން ކަމަށެވެ. ކަނޑުހުޅުދޫ ކުއްޖާއަށް ޖިންސީ ގޯނާކުރި މައްސަލާގައި ހިމެނޭ ތިން މީހުންގެ ބަންދަށްވެސް 15 ދުވަސް ޖަހާފައިވާއިރު، ކުރިޔަށް އެ 15 ދުވަސްވަންދެން އިހުތިޖާޖު ކުރާނެ ކަމަށް އިހުތިޖާޖުގެ ބައިވެރިން ބުންޏެވެ. ހޮނިހިރު ދުވަހު، ރާއްޖޭގެ 25 ރަށެއްގައި އިހުތިޖާޖު ކޮށްފައިވާ ކަމަށް އެކަން އިންތިޒާމްކުރި ފަރާތުން ވަނީ މައުލޫމާތު ދީފައެވެ.

ކުޑަކުދިންނަށް ކުރާ ޖިންސީ ގޯނާތަކާއި ދެކޮޅަށް އަޑު އުފުލާފައިވާއިރު، ޖިންސީ ގޯނާކޮށްގެން ހުށައެޅޭ މައްސަލަތައް ދަނީ ދުވަހެއް ދުވަހަކަށް އިތުރުވަމުންނެވެ. އެކަމަކު އެކަމުގައި ޝަމިލްވާ މުއައްސަސާތަކަށް އެންމެ އެކަށީގެންވާ ފިޔަވަޅުތައް ނޭޅޭތީވެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ހާއްސަކޮށް ޖެންޑަރ މިނިސްޓްރީ އަށް އަމާޒުވާ ފާޑުކިޔުންތައް ދަނީ ދުވަހެއް ދުވަހަކަށް އިތުރުވަމުންނެވެ. މި ފަދަ މައްސަލަތަކުގައި ރައްޔިތުންނަށް އެނގެން ޖެހޭ ގިނަ މައުލޫމާތުތައް ޖެންޑަރއިން ސިއްރުކުރާ ކަމަށް ބައެއް ފަރާތްތަކުން ދަނީ ތުހުމަތުތައް ކުރަމުންނެވެ.