ރޭޕްގެ ތުހުމަތު ކުރެވޭ މުނިކާފަ: ވީޑިއޯގެ މައްސަލައިގައި ހައްޔަރު ނުކުރެވުނީ ހެކި ނުލިބިގެން!
18 ޖެނުއަރީ 2020 | ހޮނިހިރު 12:00މުނިކާފައާ ގުޅޭ ވީޑިއޯގެ މައްސަލަ ފުލުހުންނަ ހުށައެޅުނީ 2018 ވަނަ އަހަރުގެ ތެރޭގައި
ދެ އަހަރުގެ ތުއްތު ކުއްޖާއަށް ޖިންސީ އަނިޔާދިން ކަމަށްބުނާ އެކުއްޖާގެ މުނިކާފަ
އުމުރުން ދެ އަހަރުގެ މުނިކާފަ ދަރިފުޅު ރޭޕް ކުރި ކަމުގެ ތުހުމަތުކުރެވޭ 81 އަހަރުގެ ފިރިހެން މީހާ، އެހެން ކުޑަކުއްޖަކާ ޖިންސީ ގުޅުން ހިންގަން މަސައްކަތް ކުރާ ވީޑިއޯއާ ގުޅިގެން ހައްޔަރު ކޮށްފައި ނުވަނީ އެކަށީގެންވާ ވަރަށް ފުލުހުންނަށް ހެކި ނުލިބިގެން ކަމަށް ފުލުހުން ބުނެފިއެވެ.
ޖެންޑަރ މިނިސްޓްރީއާއި ފުލުހުން ގުޅިގެން، އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ފުލުހުން ވަނީ އެ ވީޑިއޯގެ މައްސަލަ 2018 ވަނަ އަހަރު އެމުއައްސަސާއަށް ހުށައެޅިފައިވާ ކަން ޔަގީންކޮށްދީފައެވެ. އެކަށީގެންވާ ހެއްކެއް ނެތްކަމަށް ނިންމީ، އޭނާ ވާހަކަ ދައްކާ އަޑުއިވުނަސް އެ ވީޑިއޯއިން އޭނާ ނުފެންނާތީކަމަށް ފުލުހުން ބުނެފައިވެއެވެ.
ފުލުހުން އިތުރަށް ބުނީ، މިހާރު އެ ފިރިހެން މީހާ ހައްޔަރުކޮށްފައިވާ މައްސަލައާއި ގުޅިގެން ހިންގޭ ތަހުގީގުގެ ތެރެއިން އެވީޑިއޯ އިތުރަށް ބަލާ ދިރާސާ ކުރާނެ ކަމަށް ބުނެފައެވެ.
މީސްމީޑިއާގައި ދައުރުވަމުން އަންނަ ވީޑިއޯއިން، މަގުމަތީގައި ކުޅެން އުޅުނު ކުޑަ އަންހެން ކުއްޖެއް ކައިރީ، ޖިންސީ އަމަލެއް ހިންގުމަށް ފިރިހެނަކު އެދޭ އަޑު އިވެއެވެ. އަޑު އިވުނު ނަމަވެސް ވީޑިއޯއިން އެ އަމަލު ހިންގަން އެދޭ މީހާ ނުފެނެއެވެ.
އެކުއްޖާގެ މުނިކާފަގެ އިތުރުން، ކާފައަކީ ވެސް މީގެކުރިން، ކުޑަކުއްޖަކަށް ޖިންސީ އަނިޔާ ކުރިކަމުގެ ތުހުމަތާއި ގުޅިގެން، ތަހުގީގު ފުރިހަމަކޮށް، ޕްރޮސެކިއުޓަރ ޖެނެރަލްގެ އޮފީހަށް ދައުވާ ކުރަން ފޮނުވާފައިވާ މީހެއް ކަމަށް ފުލުހުން ބުނެއެވެ.
ނަމަވެސް އެމައްސަލަވެސް، ކުރިއަށް ނުގޮސް، ރަށު ތެރޭގައި އެ ދެ މީހުންވެސް އުޅެމުންގޮސް، އަމިއްލަ ކާފަ ދަރިފުޅަށް ޖިންސީ އަނިޔާދިން މައްސަލާގައި އާންމު ރައްޔިތުންނާއި ނޫސްވެރިންގެ ގިނަ ސުވާލުތަކެއް ވަނީ ފުލުހުންނަށާއި ޖެންޑަރ މިނިސްޓްރީއަށް އަމާޒު ވެފަ އެވެ.
މީގެއިިތުރުން ކުޑަކުދިންނަށް ޖިންސީ ގޯނާއާއި ޖިންސީ އަނިޔާ ކުރަމުންދާ މައްސަލަތަކުގައި އެކަށީގެންވާ ފިޔަވަޅުތަކެއް އެޅިފައިނުވާކަމަށްބުނެ، ބައެއް ރައްޔިތުންގެ ގެންދަނީ ޝިދާތާ ޝަރީފް ޖެންޑަރ މިނިސްޓަރު ކަމުގެ މަގާމުން އިސްތިއުފާ ދެއްވުމަށް ގޮވާލަމުން ނެވެ.
ފުލުހުން ބުނީ ދެ އަހަރުގެ ތުއްތު ކުއްޖާއަށް ޖިންސީ އަނިޔާދިން މައްސަލާގައި އެކުއްޖާގެ މުނިކާފައާއި ކާފަ މައްޗަށް ތުހުމަތުކުރެވޭތީ އެ ދެމީހުން ހައްޔަރުކޮށް، ބަންދުގެ މުއްދަތުވެސް 15 ދުވަހަށް ކޯޓުން ޖަހާދީފައިވާ ކަމަށެވެ.
މީގެއިތުރުން، އެ ކުއްޖާގެ ބައްޕަ ވެސް ހައްޔަރުކޮށްފައިވާ ކަމަށާއި، އޭނާ ހައްޔަރުކޮށް ތަހުގީގު ކުރަމުންދަނީ އިހުމާލުވި ކަމަށް ކުރެވޭ ތުހުމަތުގައި ކަމަށް ފުލުހުން ބުނެއެވެ. އަދި ފުލުހުން ބުނީ، އެކުއްޖާގެ ބައްޕަ ފިލަން މަސައްކަތް ކުރިކަމަށް ވާހަކަ ދެކުވުނަސް، އޭނާ ފިލަން މަސައްކަތްކޮށްފައި ނުވާކަމަށާއި އަދި ފުލުހުންގެ ތަހުގީގަށް އޭނާގެ ފަރާތުން އެއްބާރުލުން ލިބެމުންދާ ކަމަށެވެ.
