މަހުގެ އުފެއްދުންތައް ތައްޔާރުކޮށްދޭން ދަސްކޮށްދޭ ތަމްރީން ޕްރޮގްރާމެއް ފަށަނީ
17 ޖެނުއަރީ 2020 | ހުކުރު 08:21ފެބްރުއަރީ މަހުގެ 27 ގެ ކުރިން ތަމްރީން ޕްރޮގްރާމުގައި ބައިވެރިވުމަށް ހުށަހަޅަން ޖެހޭ
ފެލިވަރު މަސް ފެކްޓްރީ
ދިވެހި މަސްވެރިކަމުގެ ޞިނާޢަތުގައި މަހާއި މަހުން ތައްޔާރުކުރާ ބާވަތްތައް އިތުރުކޮށް މަތީ އަގު ލިބޭ ބާވަތްތައް އުފައްދާ ޖަމާއަތެއްގެ ގޮތުގައި އެ ބާވަތްތައް މާކެޓްތަކަށް ބޭނުންވާ ގޮތަށް ތައްޔާރުކުރުމުގެ މަޤްޞަދުގައި "ވިޔަފާރީގެ އުޞޫލުން އަގު އެއްކުރި މަހާއި މަހުގެ އުފެއްދުންތައް ތައްޔާރުކުރުން" ގެ ނަމުގައި ތަމްރީން ޕްރޮގްރާމުތަކެއް ބޭއްވުމަށް ހަމަޖެހިފައިވާ ކަމަށް ފިޝަރީޒް މިނިސްޓްރީން ބުނެފިއެވެ.
އެ މިނިސްޓްރީން ނެރުނު އިއުލާނެއްގައި ބުނެފައިވަނީ ތަމްރީން ޕްރޮގްރާމުގެ މަޤްޞަދަކީ ރަށްރަށުގެ އަމިއްލަ ފަރުދުންނާއި އަމިއްލަ ޖަމާޢަތްތަކާއި ޖަމްޢިއްޔާތައް މެދުވެރިކޮށް ރަށު ފެންވަރުގަ އާއި އަދި އަތޮޅު ފެންވަރުގައި މަސްވެރިކަމުގެ އުފެއްދުންތައް އުފައްދާ، އެފަދަ އުފެއްދުންތައް ގަންނަ ފަރާތްތަކާ ހަމަޔަށް ފޯރުކޮށްދިނުމަށް އެ ފަރާތްތައް އަޙުލުވެރި ކުރުވުން ކަމަށެވެ. އަދި މި ޕްރޮގްރާމް ކުރިޔަށް ގެންދިއުމަށް ހަމަޖެހިފައިވަނީ ތިއަރީ ސެޝަންތަކަކާއި ޢަމަލީ މަސައްކަތް ތަކެއްގެ މައްޗަށް ބަހާލައިގެން ކަމަށް ވެސް މިނިސްޓްރީން ބުނެއެވެ.
ތަމްރީން ޕްރޮގްރާމްގައި ބައިވެރިވާ ފަރާތްތަކަށް ކިޔަވައިދިނުމަށް ހަމަޖެހިފައިވާ ކަންތައްތަކަކީ:
ފިޝަރީޒް މިނިސްޓްރީން ބުނީ މި ޕްރޮގްރާމް އަމާޒުކޮށްފައިވަނީ ކުދި އަދި މެދުފަންތީގެ ވިޔަފާރި ކުރާފަރާތްތަކާއި ދެ ޖިންސުގެ ޒުވާނުން / މަހުގެ އުފެއްދުން ތައްޔާރުކުރުމަށް ބޭނުންފުޅުވާ އެންމެހާ ފަރާތްތަކަށް ކަމަށެވެ. އަދި މި ޕްރޮގްރާމަށް ޝަރުތު ހަމަވާ ފަރާތްތަކަކީ ވިޔަފާރީގެ ދާއިރާއަށް ނިކުތުމަށް ބޭނުންވާ ޒުވާނުންނާއި މަހުގެ ތަފާތު އުފެއްދުން ތައްޔާރުކުރުމަށް ޝައުޤުވެރިކަން ހުންނަ ފަރާތްތަކުގެ އިތުރުން އުމުރުން 18 އަހަރުވެފައިވާ މީހުންނަށް ކަމަށެވެ.
މި ޕްރޮގްރާމުގައި ބައިވެރިވުމަށް ބޭނުންވާ ފަރާތްތަކުން އަންނަ ފެބްރުއަރީ މަހުގެ 27 ގެ ކުރިން ތަމްރީން ޕްރޮގްރާމުގައި ބައިވެރިވުމަށް އެދި ހުށަހަޅާ ސިޓީ ފޮނުވަންޖެހެއެވެ.
