އާ އޮނިގަނޑުގެ ތެރެއިން ކައުންސިލްތަކުން ބޭނުންވާ މުވައްޒަފުން ހޯދަން ހުއްދަ ހޯދާކަށް ނުޖެހޭނެ

މީގެކުރިން ކައުންސިލްތަކުން މުވައްޒަފުން ބޭނުންވެގެން އެކަމަށް ހުއްދަ ހޯދުމަށް ފިނޭންސް މިނިސްޓްރީއަށް ފޮނުވަން ޖެހުނަސް މިހާރުގެ އާ އޮނިގަނޑުގެ ދަށުން އެކަން އެގޮތަށް ކުރަން ނުޖެހޭނެކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.

ހދ. ކުޅުދުއްފުށި ސިޓީގައި އެމްޑީޕީން އިންތިޒާމުކޮށްގެން ކުރިޔަށްގެންދިޔަ "ތިލަދުންމަތި އިރުވައި ކޮންފަރެންސް" ގެ ބައިވެރިން އެކަމާއި ގުޅޭގޮތުން ކުރި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވީ މިހާރު ޤާނޫނަށް އައިސްފައިވާ ބަދަލާއެކު އެކަން ފިނޭންސް މިނިސްޓްރީން ކުރުމުގެ ވިސްނުމެއް ނުގެންގުޅުއްވާކަމަށެވެ. އެހެންނަމަވެސް ކައުންސިލްތަކުން ބަޖެޓް ހަދާއިރު ކައުންސިލްތަކަށް ބޭނުންވާ މުވައްޒަފުންނާއި މުސާރައާއެކު ހިމަނަންޖެހޭނެ ކަމަށް މިނިސްޓަރ ވިދާޅުވިއެވެ.

އެކަންކަން ހުންނަންވާނީ ރަނގަޅަށް ބަޖެޓް ކުރެވިފައިކަމަށް މިނިސްޓަރ ވިދާޅުވިއެވެ. ކައުންސިލްތަކުން ބޭނުންވާ ދާއިރާއަކުން މުވައްޒަފުން ނެގުމުގެ މިނިވަންކަން ކަައުންސިލްތަކަށް ލިބިގެންދާނެ ކަމަށާއި ނަމަވެސް އެކަން ހުންނަންވާނީ ބަޖެޓްގައި ޖެހިފައިކަމަށް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ ނަގާނެ މުވައްޒަފުންގެ ޢަދަދާއި މުސާރަ ކަނޑައަޅާނީ އެ ކައުންސިލަކުން ކަމަށާއި އެކަމުގައި އެންމެ ރަނގަޅަށް ނަތީޖާ ޙާޞިލުކުރެވޭނެ ގޮތަކަށް ވިސްނުމަކީ މުހިންމު ކަމެއް ކަމަށެވެ.