އޯޕެކު ފަންޑުން ރާއްޖެއަށް 50 މިލިއަން ޑޮލަރުގެ ލޯނެއް ދޭން އެއްބަސްވެއްޖެ
16 ޖެނުއަރީ 2020 | ބުރާސްފަތި 08:015 ރަށެއްގެ ބަނދަރު ހެދުމާއި މަރާމާތު ކުރުން އަދި 8 ރަށެއްގައި ފެނާއި ނަރުދަމާ އެޅުމަށް ވަނީ ހަމަޖެހިފައި
އޯޕެކް ފަންޑާއެކު ސަރުކާރުން ލޯން އެގްރިމެންޓްގައި ސޮއިކުރުން
އޯޕެކް ފަންޑާއެކު ދިވެހި ސަރުކާރުން 50 މިލިއަން ޑޮލަރުގެ ލޯން އެގްރިމެންޓްގައި ސޮއިކޮށްފި އެވެ.
އެކަމަށްޓަކައި ހޮޓެލް ޖެންގައި ބޭއްވި ރަސްމިއްޔާތުގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރ އިބްރާހީމް އަމީރެވެ. އަދި އޯޕެކް ފަންޑުގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ޑރ އަބްދުލް ހާމިދު އަލް-ޚަލީފާއެވެ. މި ލޯން އެގްރިމެންޓްގެ ދަށުން 5 ރަށެއްގެ ބަނދަރު ހެދުމާއި, މަރާމާތު ކުރުމާއެކު، 8 ރަށެއްގައި ފެނާއި ނަރުދަމާ އެޅުމަށް ވަނީ ހަމަޖެހިފައެވެ.
މިއެގްރިމެންޓްގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ އޯޕެކް ފަންޑަކީ ރާއްޖޭގެ ފެނާއި ނަރުދަމާ އަދި ދަތުރުފަތުރުގެ ނިޒާމާއި ގުޅުންހުރި މަޝްރޫޢުތަކަށް އެންމެ ބޮޑަށް ފަންޑުކުރާ އެއް ތަންކަމަށެވެ. އަދި ރާއްޖޭގެ ފެނާއި ނަރުދަމާ އަށް އެންމެ ބޮޑަށް ފަންޑުކުރަނީވެސް އޯޕެކް ފަންޑުންކަމަށް މިނިސްޓަރ ވިދާޅުވި އެވެ. އަދި މިހާރު މި ސޮއިކުރެވިގެންދިޔަ އެގްރިމެންޓްގެ ދަށުން ހިންގާ މަޝްރޫޢުތަކުގެ ފައިދާ 20،000 ށް ވުރެ ގިނަ މީހުންނަށް ކުރާނެ ކަމަށް މިނިސްޓަރ ވިދާޅުވި އެވެ.
މި ސޮއިކުރެވުނު އެއްބަސްވުމަކީ 4.6 އިންސައްތައިގެ އިންޓަރެސްޓް ރޭޓާއެކު ފަސް އަހަރުގެ ގްރޭސް ޕީރިއަޑާއެކު ވިހި އަހަރު ދުވަހުން ދައްކާ ޚާލާސްކުރާ ގޮތަށް ވެވުނު އެއްބަސްވުމެކެވެ.
މިނިސްޓަރ ވިދާޅުވީ އޯޕެކް ފަންޑުގެ އެހީގައި މިދިޔަ އަހަރު ހިތަދޫ ރީޖަނަލް ހޮސްޕިޓަލް ބިނާކުރުމާއި، ފެނާއި ނަރުދަމާ ޤާއިމުކުރުމުގެ މަސައްކަތްކޮށްފައިވާ ކަމަށެވެ. މީގެއިތުރުން މިހާރު ވެލާނާ އިންޓަރނޭޝަނަލް އެއަރޕޯޓުގެ އާ ޕަސިންޖަރ ޓަރމިނަލް ބޮޑުކުރުމުގެ މަސައްކަތަށްވެސް އޯޕެކް ފަންޑުން ވަނީ ފައިސާދީފައެވެ.
އެއްބަސްވުމުގައި ސޮއިކުރުމަށްފަހު އޯޕެކް ފަންޑުގެ ޑިރެކްޓަރ ޖެނެރަލް ވިދާޅުވީ ރާއްޖެއާއެކު އޯޕެކުން މަސައްކަތް ކުރާތާ 42 އަހަރުވެއްޖެ ކަމަށެވެ. އަދި އޯޕެކް ފަންޑުގެ އެހީގައި ތަފާތު އެކި ދާއިރާތަކުގެ މަޝްރޫޢުތައް ރާއްޖޭގައި ކުރިޔަށް ގެންގޮސްފައިވާކަމަށް ޑރ. އަބްދުލް ޙާމިދު ވިދާޅުވިއެވެ. އެގޮތުން އޯޕެކް ފަންޑުގެ އެހީގައި މިހާތަނަށް އާއިރު ރާއްޖޭގައި 23 މަޝްރޫޢެއް ހިންގާފައިވާކަމަށް ޑރ ޢަބްދުލް ޙާމިދު ވިދާޅުވި އެވެ.
މިސޮއިކުރެވުނު އެއްބަސްވުމުގައިވާ މަޝްރޫޢުތަކަކީ މިއަހަރުގެ ބަޖެޓުގައި ހިމަނާފައިވާ މަޝްރޫޢުތަކެކެވެ. ފިނޭންސް މިނިސްޓަރ ވިދާޅުވީ އޯޕެކާއެކު މި އެއްބަސްވުމުގައި ސޮއިކުރުމަށްޓަކައި މަޝްވަރާ ކުރަމުންދާތާ އަހަރަކަށް ވުރެ ގިނަ ވެއްޖެކަމަށެވެ. އަދި މިމަޝްރޫޢުތަކުގެ މަސައްކަތް ވީއެންމެ އަވަހަށް ފެށިގެންދާނެ ކަމަށް މިނިސްޓަރ ވިދާޅުވި އެވެ.
