ހިމަބިހި ފެތުރެން ފެށީ ވެކްސިން ނުޖަހާ މީހުން ގިނަވުމުން: އެޗްޕީއޭ

ރާއްޖެއިން އެއްކޮށް ނައްތާލެވިފައިވާ ''ހިމަބިހި'' މިހާރު ފެތެރުން ފަށާފައިވަނީ ކުރިޔާ އަޅައި ބަލާއިރު ވެކްސިންޖަހާ މީހުންގެ އަދަދު މަދުވުމުންކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

ހިމަބިއްސާ ބެހޭގޮތުން އާއްމުންނަށް މައުލޫމާތުދިނުމަށް ހެލްތް މިނިސްޓްރީއާ، ދަމަނަވެށީއާ، އައިޖީއެމްއެޗްގެ އިތުރުން އެޗްޕީއޭ ގުޅިގެން ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން އެޗްޕީއޭގެ ޑޮކްޓަރު އިބްރާހިމް އަފްޒަލް ވިދާޅުވީ، ހިމަބިހި އެއްކޮށް ނައްތާލެވިފައިވާ ކަމަށް އިއުލާން ކޮށްފައިވިޔަސް އަބަދުވެސް ވެކްސިން ނުޖަހާ ބަޔަކު ތިބޭ ކަމަށެވެ.

އަވަށްޓެރި ގިނަ ގައުމުތަކަކީ ހިމަބިހި ފެނިފައިވާ ގައުމުތަކަށްވާއިރު، އެ ގައުމުތަކުގެ މީހުން ރާއްޖެއަށް ދަތުރުކޮށް އުޅޭނަމަ ބަލި ޖެހުމުގެ ފުރުސަތު ބޮޑު ކަމަށް ޑރ. އަފްޒަލް ވިދާޅުވިއެވެ. އެކަމަކު ރާއްޖޭގެ އާބާދީގެ 90 އިންސައްތަ އަށްވުރެ ގިނަ މީހުންނަކީ ވެކްސިން ޖަހާފައި ތިބި ބައެއްނަމަ ބަލި ފެތުރުމުގެ ފުރުސަތު އެއްވެސް ވަރަކަށް ނޯންނާނެކަމަށް ވިދާޅުވިއެވެ.

ޑރ، އަފްޒަލް ވިދާޅުވީ، އެއް ފަހަރު ހިމަބިހީގެ ބަލި ޖެހުނު މީހަކަށް ދެވަނަ ފަހަރު އެބަލި ޖެހުމަކީ ނާދިރު ކަމެއް ކަމަށެވެ. އޭނާ ވިދާޅުވީ، ކުރިން ވެކްސިން ނެގިޔަސް ދެ ވަނަ ފަހަަރަކު ވެކްސިން ފުރިހަމަ ކޮށްލެވިދާނެ ކަމަށެވެ. ޝައްކެތް އޮތްނަމަވެސް ވެކްސިން ނެގުން މުހިއްމު ކަމަށް އޭނާ ވިދާޅުވިއެވެ.

އެ ޕެނަލް ޑީސްކަޝަންގައި ބައިވެރިވެ ވަޑައިގެންނެވި ޑޮކްޓަރުން ވަނީ ހިމަބިއްސާ ބެހޭ ބައެއް މައުލޫމާތުތައް ހިއްސާ ކުރައްވާފައެވެ.

ވެކްސިން ނުޖެހޭ މީހުންނަށްވެސް އެންމެ ރައްކާތެރި ގޮތަކީ ދެން ތިބި މީހުން ވެކްސިން ޖެހުމެވެ.

ދޮޅު އަހަރަށްފަހު ރާއްޖޭންވެސް ހިމަބިހި ފެނިފައިވާއިރު، ރާއްޖެއަކީ ހިމަބިހި (މީސްލްސް) ނައްތާލާފައިވާ ޤައުމެއް ކަމުގައި ދުނިޔޭގެ ޞިއްޙަތު ޖަމްޢިއްޔާއިން ކަނޑައަޅާ އިޢުލާންކޮށްފައި ވަނީ 13 ޖޫން 2017 ގައެވެ.

ގައިންގަޔަށް އަރާ ބަލިތަކުން ތުއްތު ކުދިން ރައްކާތެރިކުރުމަށް ރާއްޖޭގައި ވެކްސިންދޭން ފަށާފައި ވަނީ 1976 ވަނަ އަހަރުއެވެ. އަދި ހިމަބިހިން ރައްކާތެރިވުމަށް މީސްލްސް ވެކްސިން ދޭން ފަށާފައި ވަނީ 1983 ވަނަ އަހަރުއެވެ. ދިވެހިރާއްޖެއިން މީސްލްސް ޖެހިފައިވާ މީހަކު އެންމެ ފަހުން ފެނިފައިވަނީ 2009 ވަނަ އަހަރެވެ.