ދެލައްކަ މީހުންނަށް ދެވޭ މިންވަރަށް ވެކްސިން ގެންނަނީ

ދެލައްކަ މީހުންނަށް ދެވޭ މިންވަރަށް ވެކްސިން ލިބޭ ގޮތް މިހާރު ހަމަޖެހިފައިވާ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.

އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ހެލްތް މިނިސްޓަރު އަމީން ވިދާޅުވީ ވެކްސިން ދެވޭ މިންވަރަށް ވެކްސިން އެބަހުރި ކަމަށާއި، މިހާރު ވެކްސިން ދެމުން ގެންދަނީ ހޮސްޕިޓަލުތަކާއި އަދި ފްރަންޓު ލައިންގައި މަސައްކަތް ކުރާ ފަރާތްތަކަށް ކަމަށެވެ. މިނިސްޓަރު ވިދާޅުވީ ބައިނަލްއަގްވާމީ ފަރާތްތަކާ މަޝްވަރާ ކުރެވި، ވަގުތުން ވަގުތަށް ދެލައްކަ މީހުންނަށް ވެކްސިން ދެވޭ މިންވަރަށް ވެކްސިން ލިބޭ ގޮތް މިހާރު ހަމަޖެހިފައިވާ ކަމަށެވެ. އަދި ވިދާޅުވީ މި ވެކްސިން ރާއްޖެއާ ހިސާބަށް ގެނައުމަށް ގިނަވެގެން ހޭދަވާނީ 10 ވަރަކަށް ދުވަސް ކަމަށެވެ.

މިނިސްޓަރު އަމީން ވިދާޅުވީ ވެކްސިން އަދި ހިމަބިހި ކޮންޓްރޯލްވެގެން ދިޔަ ކަމުގައި ވީނަމަވެސް ވެކްސިން ޕްރޮގްރާމް ކުރިއަށް އޮތް ތިން މަސް ދުވަހަށް މެދުކެނޑުމެއްނެތި ކުރިއަށް ގެންދިއުމަށް ނިންމާފައިވާ ކަމަށެވެ.

ދޮޅު އަހަރަށްފަހު ރާއްޖޭންވެސް ހިމަބިހި ފެނިފައިވާއިރު، ރާއްޖެއަކީ ހިމަބިހި (މީސްލްސް) ނައްތާލާފައިވާ ޤައުމެއް ކަމުގައި ދުނިޔޭގެ ޞިއްޙަތު ޖަމްޢިއްޔާއިން ކަނޑައަޅާ އިޢުލާންކޮށްފައި ވަނީ 13 ޖޫން 2017 ގައެވެ.

ގައިންގަޔަށް އަރާ ބަލިތަކުން ތުއްތު ކުދިން ރައްކާތެރިކުރުމަށް ރާއްޖޭގައި ވެކްސިންދޭން ފަށާފައި ވަނީ 1976 ވަނަ އަހަރުއެވެ. އަދި ހިމަބިހިން ރައްކާތެރިވުމަށް މީސްލްސް ވެކްސިން ދޭން ފަށާފައި ވަނީ 1983 ވަނަ އަހަރުއެވެ. ދިވެހިރާއްޖެއިން މީސްލްސް ޖެހިފައިވާ މީހަކު އެންމެ ފަހުން ފެނިފައިވަނީ 2009 ވަނަ އަހަރެވެ.