މޫސުމަށް އަންނަ ބަދަލުތަކަކީ އިންސާނުންގެ ސަބަބުން އަންނަ ބަދަލުތަކެއްކަމާއިމެދު ޝައްކުކުރާނީ މޮޔައިން: ރައީސް ނަޝީދު
މޫސުމަށް އަންނަ ބަދަލުތަކުގެ ސަބަބުން ރާއްޖެއަށްކުރާ އަސަރުތައް ދެނެގަންނަންޖެހޭކަމަށް ވިދާޅުވި
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާހަކަފުޅުދައްކަވަނީ
މޫސުމަށް އަންނަ ބަދަލުތަކަކީ އިންސާނުންގެ ސަބަބުން އަންނަ ބަދަލުތަކެއްކަމާއިމެދު ޝައްކު ކުރާނީ މޮޔައިންކަމަށް ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު ވިދާޅުވެއްޖެއެވެ.
މޯލްޑިވްސް މެރިން ރިސާރޗް އިންސްޓިޓިއުޓާއި, ބްލޫ ޕްރޮސްޕެރިޓީ ކޯލިޝަން ގުޅިގެން ރާއްޖޭގެ ކަނޑުތަކާއި ގުޅޭ ދިރާސާ ފެށުމަށް ނޭކުރެންދޫގައި ބޭއްވި ހަފްލާގައި ވާހަކަފުޅުދައްކަމުން ރައީސް ނަޝީދު ވިދާޅުވީ ދުނިޔޭގެ މޫސުމަށް ބަދަލު ނާންނަކަމަށް ދެކޭނީ މޮޔައިން ކަމަށެވެ. އަދި އެބަދަލުތަކަކީ އިންސާނުންގެ ސަބަބުން އަންނަ ބަދަލުތަކެއްކަމާއިމެދު ޝައްކުކުރާނީވެސް މޮޔައިން ކަމަށެވެ.
މޫސުމަށް އަންނަ ބަދަލުތަކުގެ ސަބަބުން ދިވެހިރާއްޖެއަށް ގޮތެއް ނުވެ, ސަލާމަތުގެ އައްސޭރީގައި އޮވެވިދާނެ ކަމަށް ދެކޭނީވެސް މޮޔައިން ކަމަށް ވިދާޅުވެ ރައީސް ނަޝީދު ވިދާޅުވީ މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ކުރާ އަސަރުތައް ދެނެގަންނަން ޖެހޭ ކަމަށެވެ. އަދި ދިރިއުޅުން ބިނާކުރަންޖެހެނީ އެ ބަދަލުތަކުގެ މައްޗަށް ބަރޯސާވެގެންކަމަށެވެ.
ދިވެހިރާއްޖެއިން ބްލޫ ޕްރޮސްޕެރިޓީ ކޯލިޝަނުގަ، ބައިވެރިވީ މިދިޔަ އަހަރު ބޭއްވި އ.ދ. ގެ 74 ވަނަ އާންމު ބައްދަލުވުމުގެ ހަވާސާގައި ދިވެހި ސަރުކާރާއި އެ ކޯލިޝަނާއި ދެމެދު ސޮއިކުރެވުނު އެއްބަސްވުމެއްގެ ދަށުންނެވެ. ސަރުކާރާއި، ބްލޫ ޕްރޮސްޕެރިޓީ ކޯލިޝަނާއި ދެމެދު ސޮއިކުރި އެއްބަސްވުމުގެ ދަށުން، ރާއްޖޭގައި ނޫ އިޤްތިޞާދެއް ބިނާކޮށް ކުރިއެރުވުމަށް އެހީވެ މި ސިޔާސަތަށް ބޭނުންވާ މެރިން ސްޕެޝަލް ޕްލޭންއެއް އެކުލަވާލެވިގެން ދާނެއެވެ. މި ޚާއްޞަ ޕްލޭން ވެގެންދާނީ ރާއްޖޭގައި ތިމާވެއްޓާއި ރަށްޓެހި، ތަރައްޤީގެ ނޫ ސިޔާސަތުތަކެއް އެކުލަވާލުމަށް މުހިންމު ދައުރެއް އަދާކުރާނެ ޕްލޭނަކަށް ކަމަށް ފިޝަރީޒް މިނިސްޓްރީން ބުންޏެވެ.
