އެމްޑީޕީއަކީ އިންތިހާބާ ދިމާކޮށް ރައްޔިތުން ވާވައްދަން ރަށްރަށަށް އަންނަ ބައެއް ނޫން: ރައީސް ނަޝީދު
އިންތިހާބެއް އައީމަ އަޅުގަނޑުމެން އެ ވަގުތު އެ ފުރުސަތު ބޭނުން މިކުރަނީ ވަކި ހާއްސަ ކަމަކަށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރާއްޖޭގެ ރައްޔިތުންނަށް އެންމެ ބޮޑަށް ސާފުވެފައި އޮތް ހަގީގަތަކީ އެމްޑީޕީއަކީ އިންތިހާބާ ދިމާކޮށް ރައްޔިތުން ވާވައްދަން ރަށްރަށަށް އަންނަ ބައެއް ނޫންކަން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިއަށް އޮތް ލޯކަލް ކައުންސިލް އިންތިޚާބަށް ކެމްޕެއިނަށް އެމްޑީޕީން ތިލަދުންމައްޗަށް ކުރާ ދަތުރުގައި، ހއ. ދިއްދޫގައި އޮތް ޖަލްސާގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ އެމްޑީޕީން އެ ރަށްރަށަށް ވަޑައިގަންނަވަނީ އިންތިހާބާ ދިމާކޮށް ނޫން ކަމަށާއި، ދިއްދޫ ރައްޔިތުންނަށް އެކަން ވަރަށް ބޮޑަށް ސާފުވެވަޑައިގަންނަވާނެ ކަމަށެވެ. މީގެއިތުރުން މުޅި ތިލަދުންމަތީ ރައްޔިތުންނަށް ވެސް އަދި ރާއްޖޭގެ ރައްޔިތުންނަށް ވެސް އަބަދުވެސް އެމްޑީޕީއަކީ އެމީހުން ކައިރީގައި ތިބޭ ބައެއްކަން އެނގިވަޑައިގަންނަވާނެ ކަމަށެވެ.
ރައީސް ނަޝީދު ވިދާޅުވީ ނާޖާއިޒް ފައިދާ ނަގަން ތައްޔާރަށް ތިބި ބައެއް ތިބޭ ކަމަށާއި، ރިޔާސީ އިންތިހާބަށް 2018 ވަނަ އަހަރު އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހު ކުރިމަތިލެއްވީ ވައުދުތަކާއެކުގައި ކަމަށެވެ. އަދި އެ ވައުދުތައް ފުއްދަވާނެ ކަމަށާއި، އެކަމާ ކުޑަވެސް ޝައްކެއް ނެތް ކަމަށެވެ.
ރައީސް ނަޝީދު ވިދާޅުވީ ރަނުން ރަނަށް އެ ވައުދުތައް ފުއްދަވާނެ ކަމަށާއި، އެ ވައުދުތައް ފުއްދުމަށްޓަކައި އެޖެންޑާ 19 އުފެދިގެން އައީ އޭގެ ގާނޫނީ އޮނިގަނޑެއް އެކުލަވާލަން ކަމަށެވެ.
ރައީސް ނަޝީދު ވިދާޅުވީ ކުރީގެ ރައީސް އަބްދުﷲ ޔާމީނާއި، ޕީޕީއެމާއި އެބޭފުޅުންގެ ބައިވެރިން ރޫޅާލާ ގަޑުބަޑުކޮށް ހަލާކުކޮށްފައިވާ ލާމަރުކަޒީ ނިޒާމް އަލުން އަނބުރާ އެމްޑީޕީން އިޔާދަކޮށްދޭނެކަމަށް ވިދާޅުވެފައިވާނެ ކަމަށާއި، އެކަންކޮށް ނިމިއްޖެ ކަމަށެވެ. އަދި އެ ވައުދު އެމްޑީޕީން ފުއްދައިފި ކަމަށް ރައީސް ނަޝީދު ވިދާޅުވިއެވެ.
އެންމެ ކުޑަ އުޖޫރައާއި، ވަޒީފާ ހޯދައިދޭ މީހަކަށް އިނާޔަތް ދިނުމާއި، ރިސޯޓްގައި މަސައްކަތް ކުރާ ކުދިންނަށް އެމީހުންގެ ސަރވިސްޗާޖާއި ޓިޕްސް ގަވާއިދު އެ އޮންނަ އުސޫލުން ލިބެމުންދާންޖެހޭ ވައުދުތައް ފުއްދުމަށް ފުރަތަމަ އަޅަންޖެހޭ ތަރަހައެއް އެބައޮތްކަމަށް ނަޝީދު ވިދާޅުވިއެވެ. އެއީ ޝަރުއީ ނިޒާމް އަދި ކޯޓްތައް ކަމަށާއި، އެކަން އެމްޑީޕީން ނުކޮށް މިކަމުގެތެރެއަށް ދިޔަނަމަ ހަދާ ގާނޫނު އޭގެ އަނެއް ދުވަހުން ބާތިލް ކުރާނެ ކަމަށް ރައީސް ނަޝީދު ވިދާޅުވިއެވެ. ނަޝީދު ވިދާޅުވީ އެގޮތަށް ކަން ނުކުރެއްވިނަމަ ހަދާ ގާނޫނު އެ ލިޔެފައި އޮތް ގަނޑުގެ ދެއްޔަށް ވެސް އޭގެ ހަރަދު ނުދާނެ ކަމަށެވެ.
ރައީސް ނަޝީދު ވިދާޅުވީ ފަސް އަހަރުގެ ދައުރަކަށް ރައީސުލްޖުމްހުރިއްޔާ ކަމުގައި ހުންނެވީ އިބްރާހިމް މުހައްމަދު ސޯލިހު ކަމަށާއި، އަދި މަޖިލިސް ރައީސް ކަމުގައި މިހުންނެވީ އެމަނިކުފާނު ކަމަށެވެ. އެހެނަކަމުން އެމްޑީޕީންވި ވައުދުތައް ފުއްދަވާތަން ބައްލަވަން ތިއްބެވެވުމަށް އެމަނިކުފާނު ވަނީ ވިދާޅުވެފައެވެ.
