ރާއްޖޭގެ ރައްޔިތުންނަށް އެންމެ ބޮޑަށް ސާފުވެފައި އޮތް ހަގީގަތަކީ އެމްޑީޕީއަކީ އިންތިހާބާ ދިމާކޮށް ރައްޔިތުން ވާވައްދަން ރަށްރަށަށް އަންނަ ބައެއް ނޫންކަން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ކުރިއަށް އޮތް ލޯކަލް ކައުންސިލް އިންތިޚާބަށް ކެމްޕެއިނަށް އެމްޑީޕީން ތިލަދުންމައްޗަށް ކުރާ ދަތުރުގައި، ހއ. ދިއްދޫގައި އޮތް ޖަލްސާގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ އެމްޑީޕީން އެ ރަށްރަށަށް ވަޑައިގަންނަވަނީ އިންތިހާބާ ދިމާކޮށް ނޫން ކަމަށާއި، ދިއްދޫ ރައްޔިތުންނަށް އެކަން ވަރަށް ބޮޑަށް ސާފުވެވަޑައިގަންނަވާނެ ކަމަށެވެ. މީގެއިތުރުން މުޅި ތިލަދުންމަތީ ރައްޔިތުންނަށް ވެސް އަދި ރާއްޖޭގެ ރައްޔިތުންނަށް ވެސް އަބަދުވެސް އެމްޑީޕީއަކީ އެމީހުން ކައިރީގައި ތިބޭ ބައެއްކަން އެނގިވަޑައިގަންނަވާނެ ކަމަށެވެ.
އިންތިހާބެއް އައީމަ އަޅުގަނޑުމެން އެ ވަގުތު އެ ފުރުސަތު ބޭނުން މިކުރަނީ ވަކި ހާއްސަ ކަމަކަށް. ވަކި ވާހަކައެއް ދައްކަން. އެއީ މި ނިޒާމް ހަމަޖެހިފައި އޮންނަ ގޮތް. އެއަށްކިޔަނީ ޑިމޮކްރަސީ. އިންތިހާބު އައީމަ އަޅުގަނޑުމެން ހުށަހަޅާނަން، ބަލާނަން ތި ބޭފުޅުންގެ ޝަކުވާތައް އަދި ކަންބޮޑުވުންތައް. އެ ކަންބޮޑުވުންތަކަށް ހައްލުގެނައުމަށް އަޅުގަނޑުމެން ހުށަހަޅާނަން ސިޔާޔަސަތުތަކެއް. އެވާހަކަ ދައްކަން އަޅުގަނޑުމެން އިރާދަކުރެއްވިއްޔާ ރާއްޖޭގެ ރައްޔިތުން ކައިރިއަށް އަބަދުވެސް ދާނަން. ރާއްޖޭގެ ރައްޔިތުންނަށް އިނގޭ އަދި އެ ރައްޔިތުން ތިބޭނީ އެ ވާހަކަ ދެއްކުމަށް އަޅުގަނޑުމެން ގެނައުމަށް އެ ރައްޔިތުންގެ ދޮރުތައް ހުޅުވާލައިގެން ސައި ހަދައިގެން. ރައްޔިތުން ތިބީ މި ވާހަކަތައް އަޑުއަހަން.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައީސް ނަޝީދު ވިދާޅުވީ ނާޖާއިޒް ފައިދާ ނަގަން ތައްޔާރަށް ތިބި ބައެއް ތިބޭ ކަމަށާއި، ރިޔާސީ އިންތިހާބަށް 2018 ވަނަ އަހަރު އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހު ކުރިމަތިލެއްވީ ވައުދުތަކާއެކުގައި ކަމަށެވެ. އަދި އެ ވައުދުތައް ފުއްދަވާނެ ކަމަށާއި، އެކަމާ ކުޑަވެސް ޝައްކެއް ނެތް ކަމަށެވެ.
ރައީސް ނަޝީދު ވިދާޅުވީ ރަނުން ރަނަށް އެ ވައުދުތައް ފުއްދަވާނެ ކަމަށާއި، އެ ވައުދުތައް ފުއްދުމަށްޓަކައި އެޖެންޑާ 19 އުފެދިގެން އައީ އޭގެ ގާނޫނީ އޮނިގަނޑެއް އެކުލަވާލަން ކަމަށެވެ.
އެޖެންޑާ 19 ގައިވާ ވައުދުތައް ވެސް އަޅުގަނޑުމެން ފުއްދާނަން. މިއީ ފަސް އަހަރު ދުވަހުގެ މުއްދަތެއް އަޅުގަނޑުމެން ކުރާ ކަންތައް ވެސް ވާ ވައުދުތައް ވެސް ވަމުން މިދަނީ ވަކި ހާއްސަ ގަޑިއެއްގައި ވަކި ކަމެއް ވަކި ވަގުތަކަށް ކުރުމުގައި. 2018 ވަނަ އަހަރު މި ރާއްޖޭގެ ވެރިކަން ބަދަލުވުމުގެ އެންމެ ބޮޑު ސިއްރަކީ ރާއްޖޭގައި އިންސާފު ގެއްލިގެން ދިއުން. ދިވެހިރާއްޖޭގެ ފަނޑިޔާރުގެއިން ގާނޫނު ހެދުން ވެސް އަދި އެހެނިހެން ކަންކަން ވެސް ކުރަމުން އައިކަން. ރައްޖޭގެ ރައްޔިތުން ކެނޑިނޭޅި ގޮވަމުން ބުނަމުން އާދޭސް ކުރަމުން ދިޔައީ، އިންސާފު ގެނެސްދޭށޭ. އެ ބޭނުމަށްޓަކައި ރައްޔިތުން ސަރުކާރު ބަދަލުކުރީ. އެޖެންޑާ 19 އަނެއްކާ ރައްޔިތުންނަށް ވައުދުވީ އެ މަސައްކަތް ކުރާނީ ރައްޔިތުންގެ މަޖިލީހުގެ ތެރޭގައި ކަމަށް. އެއީ ދިވެހިރާއްޖޭގެ ގާނޫނު އަސާސީ އެގޮތަށް އެހެން ބުނާތީ. އެ މަސައްކަތް ރައްޔިތުންގެ މަޖިލީހުގެ ތެރެއިން ކޮށް ނިމިއްޖެ. އަޅުގަނޑުމެންގެ އެ ވައުދު ފުއްދިއްޖެ. އެބައި ނިމުނީ. އެކަން ކުރަން ލައްކަ ދުވަސްނެގި. ހައެއްކަ މަސް ނެގި،ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައީސް ނަޝީދު ވިދާޅުވީ ކުރީގެ ރައީސް އަބްދުﷲ ޔާމީނާއި، ޕީޕީއެމާއި އެބޭފުޅުންގެ ބައިވެރިން ރޫޅާލާ ގަޑުބަޑުކޮށް ހަލާކުކޮށްފައިވާ ލާމަރުކަޒީ ނިޒާމް އަލުން އަނބުރާ އެމްޑީޕީން އިޔާދަކޮށްދޭނެކަމަށް ވިދާޅުވެފައިވާނެ ކަމަށާއި، އެކަންކޮށް ނިމިއްޖެ ކަމަށެވެ. އަދި އެ ވައުދު އެމްޑީޕީން ފުއްދައިފި ކަމަށް ރައީސް ނަޝީދު ވިދާޅުވިއެވެ.
އެންމެ ކުޑަ އުޖޫރައާއި، ވަޒީފާ ހޯދައިދޭ މީހަކަށް އިނާޔަތް ދިނުމާއި، ރިސޯޓްގައި މަސައްކަތް ކުރާ ކުދިންނަށް އެމީހުންގެ ސަރވިސްޗާޖާއި ޓިޕްސް ގަވާއިދު އެ އޮންނަ އުސޫލުން ލިބެމުންދާންޖެހޭ ވައުދުތައް ފުއްދުމަށް ފުރަތަމަ އަޅަންޖެހޭ ތަރަހައެއް އެބައޮތްކަމަށް ނަޝީދު ވިދާޅުވިއެވެ. އެއީ ޝަރުއީ ނިޒާމް އަދި ކޯޓްތައް ކަމަށާއި، އެކަން އެމްޑީޕީން ނުކޮށް މިކަމުގެތެރެއަށް ދިޔަނަމަ ހަދާ ގާނޫނު އޭގެ އަނެއް ދުވަހުން ބާތިލް ކުރާނެ ކަމަށް ރައީސް ނަޝީދު ވިދާޅުވިއެވެ. ނަޝީދު ވިދާޅުވީ އެގޮތަށް ކަން ނުކުރެއްވިނަމަ ހަދާ ގާނޫނު އެ ލިޔެފައި އޮތް ގަނޑުގެ ދެއްޔަށް ވެސް އޭގެ ހަރަދު ނުދާނެ ކަމަށެވެ.
އަޅުގަނޑުމެންނަށް އެހެންވެގެން މަޖުބޫރުވީ ފުރަތަމަ ކުރަންޖެހޭ ކަންކަން ފުރަތަމަ ކުރުމަށް. އަޅުގަނޑުމެން ބުނަމުން މި އަންނަނީ ވަކި ހާއްސަ ކަންތައްތަކެއް ވަކި އިރެއްގައި ވަކިގޮތަކަށް ކުރުމޭ ތަރައްގީއަކީ. މިއަދު ނާޖާއިޒް ފާއިދާ ނެގުމަށް އަދި އަޅުގަނޑުމެންގެ ހާއްޔަށް ބިސް އެޅުމަށްޓަކައި އެބަ ބުނޭ ކޮބާތޯއޭ ރިސޯޓް މީހުންނަށް ދޭންޖެހޭ ޓިޕްސް. ކޮބާތޯއޭ ސަރވިސްޗާޖްގެ ކަންތައް. ކޮބާތޯއޭ ދެވޭ އެއްމެ ކުޑަ އުޖޫރަ، ކޮބާތޯއޭ ވަޒީފާ ހޯދަން އުޅޭ މީހަކަށްދެ އުޖޫރަދޭން ބުނި އިނާޔަތް. ކޮބާތޯއޭވީ ވައުދުތައް. އާދެ އެކަން ކުރަމުން މިދަނީ. އެ ވައުދުތައް އަޅުގަނޑުމެން ފުއްދަމުން މިދަނީ. އިރާދަކުރެއްވިއްޔާ ރަނުން ރަނަށް އަޅުގަނޑުމެން އެކަން ކުރާނަން. ޕީޕީއެމަކަށް އެހެން ޕާޓީއަކަސް އަދި ކޮންމެފަދަ ބަޔަކަށް މިދަންނަވަނީ ވަޑައިގަންނަވާށޭ، ބައްލަވާށޭ. އަޅުގަނޑުމެން އެ ވައުދުތައް ފުއްދަވާތަން ތިބޭފުޅުން ބައްލަވާށޭ،ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައީސް ނަޝީދު ވިދާޅުވީ ފަސް އަހަރުގެ ދައުރަކަށް ރައީސުލްޖުމްހުރިއްޔާ ކަމުގައި ހުންނެވީ އިބްރާހިމް މުހައްމަދު ސޯލިހު ކަމަށާއި، އަދި މަޖިލިސް ރައީސް ކަމުގައި މިހުންނެވީ އެމަނިކުފާނު ކަމަށެވެ. އެހެނަކަމުން އެމްޑީޕީންވި ވައުދުތައް ފުއްދަވާތަން ބައްލަވަން ތިއްބެވެވުމަށް އެމަނިކުފާނު ވަނީ ވިދާޅުވެފައެވެ.
