ހިމަބިއްސަށް ޕޮޒިޓިވް ވި ކުއްޖާއަށް މީސްލްސް ވެކްސިންގެ ދެޑޯޒް އެއް ނުދޭ!
11 ޖެނުއަރީ 2020 | ހޮނިހިރު 12:49މިހާރު ކުއްޖާގެ ހާލު ރަނގަޅު
ވެކްސިން
ހިމަބިއްސަށް ޕޮޒިޓިވް ވި ކުއްޖާއަކީ، މި މަހުގައާއި 18 މަހުގައި ދޭންޖެހޭ މީސްލްސް ވެކްސިންގެ ދެޑޯޒް ފުރިހަމަ ކޮށްފައި ނުވާ ކުއްޖެއްކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުުނެފިއެވެ.
އެޗްޕީއޭއިން އެކަމާއި ގުޅިގެން ބުނީ، މާލެ ޞަރަޙައްދުގައި ދިރިއުޅޭ އުމުރުން 3 އަހަރުގެ ކުއްޖަކު ހިމަބިހި (މީސްލްސް) ޖެހިފައިވާ ކަމަށް ޝައްކުކުރެވުމާއި ގުޅިގެން ކުރި ޓެސްޓްތަކުން ޕޮޒިޓިވް ވެފައި ވާކަމަށެވެ. އަދި މި ކުއްޖާވަނީ މި މަހުގައާއި 18 މަހުގައި ދޭންޖެހޭ މީސްލްސް ވެކްސިންގެ ދެޑޯޒް ފުރިހަމަ ނުކޮށް ކަމަށެވެ.
އެޗްޕީއޭ އިން ބުނީ އައި.ޖީ.އެމް.އެޗުގައި ފަރުވާ ދިނުމަށްފަހު، ކުއްޖާގެ ޙާލު ރަނގަޅުވެ، އަދި އޭނާގެ ފަރާތުން ބަލި ފެތުރޭ މުއްދަތު ފާއިތުވެފައިވުމުން މިހާރު ހޮސްޕިޓަލުން ދޫކޮށްލާފައިވާ ކަމަށެވެ. އަދި މިކޭސް ދެނެގަނެވިފައިވަނީ ރާއްޖޭގައި ޤާއިމު ކުރެވިފައިވާ ހިމަބިއްސާއި ރުބެއްލާގެ ސަރވެއިލަންސް ނިޒާމުގެ ތެރެއިން ކަމަށާއި، މިނިޒާމުގެ ދަށުން ހުން އައުމާއެކު ހަމުގައި ބިހި ނަގައިފިނަމަ މީސްލްސް އަދި ރުބެއްލާއަށް ޓެސްޓް ކުރެވޭ ކަމަށެވެ.
2019 ވަނަ އަހަރު 66 ފަރާތެއް މީސްލްސް އަދި ރުބެއްލާއަށް ޓެސްޓް ކުރެވިފައިވާއިރު، ހިމަބިއްސަށް ޝައްކުކުރެވޭ ކޭސްއެއް 8 ޖެނުއަރީ 2020ގައި ރިޕޯރޓްކުރެވުމާއެކު، އެކަމާއި ގުޅިގެން ކުރަންޖެހޭ ތަހުޤީޤުތައް އެއޭޖެންސީއިން ވަނީ ފަށާފައިވާ ކަމަށް އެޗްޕީއޭއިން ބުނެއެވެ. އެގޮތުން އެކުއްޖާގެ ފަރާތުން ބަލިފެތުރުމުގެ ފުރުޞަތު އޮތް ދުވަސްވަރު ދެނެގަނެ، އެދުވަސްތަކުގައި އެކުއްޖާއާއި އެކުގައި އުޅެފައިވާ ނުވަތަ ކައިރިވެފައިވާ ފަރާތްތައް ހޯދާ، އޭގެ ތެރެއިން މީސްލްސް ވެކްސިންގެ ދެޑޯޒް ހަމަކޮށްފައި ނުވާ ފަރާތްތަކަކަށް ވެކްސިން ޖެހޭނެ އިންތިޒާމު ހަމަޖެއްސުން ހިމެނޭ ކަމަށެވެ.
އެ އޭޖެންސީން ބުނީ ހިމަ ބިއްސަކީ ވައިގެ ޒަރީއާއިން ވަރަށް ހަލުވިކަމާއެކު ފެތުރޭ ބައްޔެއް ކަމުން، ވެކްސިންގެ ދެޑޯޒް ފުރިހަމަ ނުކުރާ ފަރާތްތަކަށް، މިބަލިޖެހިފައިވާ މީހެއްގެ ފަރާތުން ބަލި ފެތުރުމުގެ ފުރުޞަތު އޮންނާނެ ކަމަށެވެ.
