ދ.ރިނބުދޫ ގިރާ ސަރަހައްދު ހިމާޔަތް ކުރުމަށް ހުރި ގޮންޖެހުންތަކަށް ހައްލު ހޯދާނެ ގޮތްތަކާއި ބެހޭ ގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާ މަޝްވަރާކުރެއްވައިފިއެވެ.
ބުރާސްފަތި ދުވަހު ރައީސް ސޯލިހު ވަނީ ރިނބުދޫ ކައުންސިލަރުންނާ ބައްދަލުކުރައްވާފައެވެ. ރައީސް އޮފީހުގައި ބޭއްވެވި މިބައްދަލުކުރެއްވުމުގައި މަޝްވަރާ ކުރައްވާފައިވާ މުހިންމު ކަންތައްތަކުގެ ތެރޭގައި، ރިނބުދޫގެ އިޖްތިމާއީ އަދި އުމްރާނީ ތަރައްގީއަށް ރާވާފައިވާ، އަދި ހިންގަމުން ގެންދާ މަޝްރޫއުތައް ހިމެނެއެވެ.
ރައީސް އޮފީހުން ބުނީ މިބައްދަލުކުރެއްވުމުގައި ކައުންސިލަރުންވަނީ، ރިނބުދޫގައި ކުރިއަށްދާ ބަނދަރު ހެދުމުގެ މަޝްރޫއާއި، މި އަހަރު ހިންގުމަށް ރާވާ ބަޖެޓުކޮށްފައިވާ ފެނާއި ނަރުދަމާގެ ނިޒާމު ގާއިމު ކުރުމުގެ މަޝްރޫއުގެ މަސައްކަތްތަކުގެ މައްޗަށް އަލިއަޅުއްވާލައްވާފައެވެ.
އެރަށުގެ ފެނުގެ ހާލަތަށް އަލިއަޅުއްވާލައްވާ ކައުންސިލަރުން ވަނީ ފެނާއި ނަރުދަމާ ނިޒާމު ގާއިމު ކުރުމުގެ މަޝްރޫއުގެ މަސައްކަތްތައް އަވަސްކުރަން ޖެހިފައިވާކަން ފާހަގަ ކުރައްވާފައެވެ. އަދި، ބަނދަރު ފަރުމާކޮށްފައިވާ ގޮތުން ކުރިމަތިވާ ބައެއް ދަތިތަކުގެ މައުލޫމާތު ވެސް ރައީސްއާ ހިއްސާ ކުރައްވާ، ކަންތައްތައް ހައްލު ކުރެވޭނެ ގޮތްތަކާއިމެދު އެމަނިކުފާނާއިއެކު މަޝްވަރާ ކުރެއްވި ކަމަށް ރައީސް އޮފީހުން މައުލޫމާތުދެއެވެ.
މީގެ އިތުރުން، ރައީސް އޮފީހުން ބުނީ އެރަށުގެ ކުނިކޮށީގެ މަސައްކަތް ނިމިފައި ވީ ނަމަވެސް، ރައްކާތެރި ގޮތުގައި ކުނި މެނޭޖުކުރުމަށް ހުރި ހުރަސްތަކުގެ މައުލޫމާތު ވެސް ރައީސްއާ ހިއްސާކުރެއްވި ކަމަށެވެ. އަދި، ރިނބުދޫގައި ފަތުރުވެރިކަން ތަރައްގީ ކުރުމަށް ކައުންސިލުން ރާވާފައިވާ ޕްލޭނާއި ބެހޭ މައުލޫމާތު ހިއްސާ ކުރައްވާ، ކައުންސިލަރުންވަނީ އެ ޕްލޭން ތަންފީޒު ކުރުމުގައި ސަރުކާރުގެ އެއްބާރުލުން ބޭނުންވާ ދާއިރާތަކާއިމެދު ރައީސް ސޯލިހުއާ މަޝްވަރާ ކުރައްވާފައެވެ.
މީގެ އިތުރުންވެސް، ރަށަށް ކުރިމަތިވެފައިވާ ބައެއް އެހެނިހެން މައްސަލަތައް ފާހަގަކުރައްވާ، ކައުންސިލަރުންވަނީ، ގޯތި ދޫކުރުމާއި، ގިރާ ސަރަހައްދު ޙިމާޔަތް ކުރުމަށް ހުރި ގޮންޖެހުންތަކާއިބެހޭ މައުލޫމާތު ރައީސް ސޯލިހުއާ ހިއްސާ ކުރައްވާފައެވެ.
ކައުންސިލުން އިސްނަގައިގެން ކުރަމުންދާ އިޖްތިމާއީ ބައެއް މަސައްކަތްތައް ފާހަގަކުރައްވާ، ކައުންސިލަރުން ވަނީ މާބަނޑު އަންހެނުންނާއި ތުއްތުކުދީންގެ ސިއްހީ ރައްކާތެރިކަން ކަށަވަރުކުރުމަށް "މަރިޔަންމާ" ކެމްޕެއިންގެ ނަމުގައި ޚާއްސަ މަސައްކަތްތަކެއް ފެށުމަށް ތައްޔާރުވަމުންދާކަން ފާހަގަކުރައްވާފައި ކަމަށް ރައީސް އޮފީހުން މައުލޫމާތުދެއެވެ.
މި ބައްދަލުކުރެއްވުމުގައި ރައީސް ސޯލިހު ދެއްކެވި ވާހަކަފުޅުގައި، ރިނބުދޫގައި ކުރިއަށްގެންދާ މަޝްރޫއުތަކާއި، ކައުންސިލަރުން ފާހަގަކުރައްވާފައިވާ ކަންތައްތަކަށް ވަކިވަކީން އަލިއަޅުއްވައިލައްވައި އެ ރަށުގެ ރައްޔިތުންނަށް ކުރިމަތިވެފައިވާ ދަތިތައް ހައްލުކޮށްދެއްވަން ކުރެއްވެން ހުރި މަސައްކަތްތައް ސަރުކާރުގެ އިދާރާތަކާއި ގުޅިވަޑައިގެން ކުރައްވާނެ ކަމަށް ވިދާޅުވިއެވެ.
