ހާއްސަ އެހީއަށް ބޭނުންވާ މީހުންގެ މަރުކަޒަށް ޖަޕާނު ސަރުކާރުން އެހީ ދީފި
ތިން ލައްކައަށް ވުރެ ގިނަ ރުފިޔާގެ ފައިސާގެ އެހީއާއި ސިއްހީ އާލަތްތައް ފޯރުކޮށްދީފައިވޭ
ސޮއިކުރުމުގެ ރަސްމިއްޔާތުގައި ޖަޕާނު ސަފީރު ކެއިކޯ ޔަނާއީ އާއި އިމްރާން އިބްރާހިމް
ކ. ގުރައިދޫގައި ޤާއިމުިކޮށްފައިވާ ޚާއްޞަ އެހީއަށް ބޭނުންވާ މީހުންގެ މަރުކަޒަށް، ޖަޕާން ސަރުކާރުން ތިން ލައްކަ ރުފިޔާގެ ފައިސާގެ އެހީއާއި އެތާނގެ މަސައްކަތައް ބޭނުންވާ އާލާތްތައް ހަދިޔާކޮށްފިއެވެ.
ޚާއްޞަ އެހީއަށް ބޭނުންވާ މީހުންގެ މަރުކަޒުގައި ބޭއްވި ރަސްމިއްޔާތެއްގައި، ޖަޕާނު ސަރުކާރުގެ ފަރާތުން އެހީދޭ އެއްބަސްވުމުގައި ސޮއިކުރެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެއިކޯ ޔަނާއީއެވެ. ޚާއްޞަ އެހީއަށް ބޭނުންވާ މީހުންގެ މަރުކަޒުގެ ފަރާތުން އެއްބަސްވުމުގައި ސޮއިކުރެއްވީ އެ މަރުކަޒުގެ ސީއީއޯ އިމްރާން އިބްރާހިމްއެވެ.
އެއްބަސްވުމުގައި ސޮއިކުރެއްވުމަށް ފަހު ވާހަކަފުޅުދައްކަވަމުން ޖަޕާނު ސަފީރު ވިދާޅުވީ، ޚާއްޞަ އެހީއަށް ބޭނުންވާ މީހުންގެ މަރުކަޒުގައި ތިބޭ ބައެއް ބަލި މީހުންނަށް ބޭނުންވާ ކުއްލި ފަރުވާ ނުލިބޭ ވާހަކަތައް އަޑުއެއްސެވީ ވަރަށް ހިތާމައާއިއެކު ކަމަށެވެ. އަދި އެ މަރުކަޒުގައި ތިބި ބަލި މީހުންނަށް ކުއްލި ފަރުވާ ދެވޭނެ ވަޞީލަތްތައް ޖަޕާނު ސަރުކާރުގެ ފަރާތުން ފޯރުކޮށްދެވޭތީ އެކަމާ އުފާކުރައްވާ ކަމަށް އެކަމަނާ ވިދާޅުވިއެވެ.
ޚާއްޞަ އެހީއަށް ބޭނުންވާ މީހުންގެ މަރުކަޒުގެ ޗީފް އެގްޒެކެޓިވް އޮފިސަރ (ސީއީއޯ) އިމްރާން އިބްރާހިމްގެ ވާހަކަފުޅުގައި، ފަރުވާދޭން ބޭނުންވާ ވަޞީލަތްތައް ނެތިގެން ކުއްލި ޙާލަތުގައި ފަރުވާދޭން ޖެހޭ ފަރާތްތައް ގެންދަން ބައެއް ފަހަރު މާލެއަށް ގެންދަން ޖެހޭއިރު، ބައެއް ޙާލާތްތަކުގައި މާލެ ގެންދަން ޖެހެނީ ސްޓޭބަލްވެސް ނުކޮށް ކަން ފާހަގަކުރެއްވިއެވެ. މިސަބަބާ ހުރެ އެ މަރުކަޒުގެ މުވައްޒަފުންނާއި ބަލި މީހުންވެސް ބޮޑު ތަކުލީފެއް އުފުލަން ޖެހޭކަން ފާހަގަކުރައްވާ، ޖަޕާނު ސަރުކާރުން ވެދެއްވި އެހީގެ ސަބަބުނު މިކަމަށް އެކަށީގެންވާ ޙައްލެއް ލިބިގެންދާނެ ކަމަށް ސީއީއޯ ވިދާޅުވިއެވެ.
އިމްރާން ވަނީ ޖަޕާނު ސަރުކާރުން ވެދެއްވި އެހީތެރިކަމަށްޓަކައި ޖަޕާނު ސަރުކާރަށް، މަރުކަޒުގައި ތިބި ބަލި މީހުންގެ ފަރާތުންނާއި، އެތަނުގެ މުވައްޒަފުންގެ ނަމުގައި، ވަރަށް ޚާއްޞަ ޝުކުރެއް އަދާކުރައްވާފައެވެ. އޭގެ އިތުރުން އިމްރާން ވަނީ މަރުކަޒު ޤާއިމުކޮށްފައިވާ ގުރައިދޫގެ ރައްޔިތުންނަށްވެސް ވަރަށް ޚާއްޞަ ޝުކުރެއް އަދާކުރައްވާފައެވެ.
ޖަޕާނު ސަރުކާރުން ދިން އެހީއަކީ، އެ މަރުކަޒުގެ އެމަރޖެންސީ ރޫމް(ކުއްލި ޙާލަތްތަކުގައި ފަރުވާދޭ ކޮޓަރި) އަށް ބޭނުންވާ އަޕްގްރޭޑްތައް ގެނައުމަށް ދެވުނު އެހީއެކެވެ. މި ފައިސާގެ އެހީގައި މަރުކަޒުގައި ހުންނަ އެމަރޖެންސީ ރޫމް އިމާރާތުގެ ބައެއް މަސައްކަތްތައް ކުރުމަށް ވަނީ ހަމަޖެހިފައެވެ.
ފައިސާގެ އެހީގެ އިތުރުން، ޖަޕާނު ސަރުކާރުން ހަދިޔާކުރި ޞިއްޙީ ޙިދުމަތް ދިނުމަށް ބޭނުންކުރާ އާލާތަތްކުގެ ތެރޭގައި ބަލިމީހުން ބާއްވާ 4 އެނދާއި، ބޭސް ރައްކާކުރާނެ ފްރިޖަކާއި، އެސްޕިރޭޓަރާއި، ރެސްޕިރޭޓަރު އަދި އިލެކްޓްރޯ-ކަރޑިއޯގްރާފް ސިސްޓަމްތަކުގެ އިތުރުން ކުއްލި ސަރޖަރީ ހަދަން ބޭނުންވާ ސާމާނު ހިމެނެއެވެ.
ރާއްޖެއާ ޒަމާނުއްސުރެން ގާތްގުޅުމެއް ބާއްވަމުން އަންނަ ޖަޕާނު ސަރުކާރުން މި އެހީ ފޯރުކޮށްދީފައިވަނީ، އެ ޤައުމުގެ "ގްރާންޓް އެސިސްޓަންސް ފޯރ ގްރާސް-ރޫޓްސް ހިއުމަން ސެކިއުރިޓީ ޕްރޮޖެކްޓްސް (ޖީޖީޕީ) ސްކީމް" ގެ ތެރެއިންނެވެ.
މިއަހަރުގެ ތެރޭގައިވެސް ޖަޕާނު ސަރުކާރުން ވަނީ މި ސްކީމްގެ ތެރެއިން ރާއްޖެއަށް ގިނަގުނަ އެހީތަކެއް ވެދީފައެވެ. އެގޮތުން ޞިއްޙީ ދާއިރާއިން ގިނަގުނަ އެހީތަކެއް ވެދީފައިވާއިރު، ކުނި ނައްތާލުމަށާއި، ތިމާވެށި ރައްކާތެރިކުރުމަށްވެސް ޖަޕާނު ސަރުކާރުން ވަނީ އެހީ ފޯރުކޮށްދީފައެވެ.
