އަމާޒަކީ ތިންވަނަ ފަހަރަށް ޗެމްޕިއަންސް ލީގު ފައިނަލުގައި ކުޅުން: އެލެގްޒެންޑަރ-އަރނޯލްޑް

ލިވަރޕޫލުގެ މި ސީޒަނުގެ އަމާޒަކީ ވިދިވިދިގެން ތިންވަނަ ފަހަރަކަށް ޗެމްޕިއަންސް ލީގުގެ ފައިނަލުގައި ކުޅުން ކަމަށް އެ ޓީމަށް ކުޅެމުން އަންނަ ޒުވާން ލެފްޓް ބެކް ޓްރެންޓް އެލެގްޒެންޑަރ-އަރނޯލްޑް ބުނެފިއެވެ.

ތޭރަ ޕޮއިންޓުގެ ލީޑަކާއިއެކު ޕްރިމިއަރ ލީގު ތާވަލުގެ އެއްވަނައިގައި އޮތް ލިވަރޕޫލުން މިދިޔަ އަހަރު ވަނީ ޔޫއެފްއާ ޗެމްޕިއަންސް ލީގު، ސުޕަރ ކަޕް އަދި ކްލަބް ވަރލްޑް ކަޕް ކާމިޔާބުކޮށްފައެވެ. ޕްރިމިއަރ ލީގު ތަށި އެ ޓީމަށް ގާތްގަނޑަކަށް ކަށަވަރު ވެފައިވާއިރު، އެލެގްޒެންޑަރ-އަރނޯލްޑް ބުނީ އެވަރުން އެ ޓީމަށް ފަރުޖައްސާލައިގެން ތިބެވޭކަށް ނެތްކަމަށެވެ.

އެގޮތުން މި ސީޒަނުގެ ޗެމްޕިއަންސް ލީގާއި އިނގިރޭސި އެފްއޭ ކަޕް ކާމިޔާބުކުރަން ބޭނުންވާ ކަމަށް އެލެގްޒެންޑަރ-އަރނޯލްޑް ބުނެފައިވެއެވެ. އޭނާ ބުނީ 2019 ވަނަ އަހަރުގެ ތެރޭގައި ޓީމުން ދަމަހައްޓަމުން އައި ފޯމު، މި ސީޒަން ނިމެންދެން ދެމެހެއްޓުން މުހިންމު ކަމަށެވެ. ލިވަރޕޫލުން ވަނީ ޕްރިމިއަރ ލީގުގެ އެއްވެސް މެޗަކުން ބަލިނުވުމުގެ ރިކޯޑް ވޭތުވެ ދިޔައަހަރު ދަމަހައްޓާފައެވެ.

ޗެމްޕިއަންސް ލީގާ ގުޅޭ ގޮތުން ވާހަކަ ދައްކަމުން އެލެގްޒެންޑަރ-އަރނޯލްޑް ބުނީ، މި ފަހަރުގެ ގްރޫޕަކީ އުނދަގޫ ގްރޫޕެއް ކަމަށާއި އަދި ގްރޫޕުގެ އެއްވަނަ ޓީމުގެ ގޮތުގައި ދެވަނަ ބުރަށް ދަތުރުކުރެވުމަކީ ބޮޑު އުފަލެއް ކަމަށެވެ. ޗެމްޕިއަންސް ލީގުގެ ދެވަނަ ބުރުގައި އެ ޓީމު ވާދަކުރާނީ ސްޕެއިންގެ އެތްލެޓިކޯ މެޑްރިޑާއެވެ. އަންނަ ފެބްރުއަރީ މަހުގެ ތެރޭގައި ކުޅޭ މި މެޗުގެ ފުރަތަމަ ލެގު ކުޅޭނީ އެތްލެޓިކޯގެ ވަންޑް މެޓްރޮޕޮލިޓާނޯގައެވެ.

ފާއިތުވި ދެ ސީޒަނުގައި ލިވަރޕޫލަށް މޮޅު ކުޅުމެއް ދައްކަމުން އަންނަ، އެލެގްޒެންޑަރ-އަރނޯލްޑަކީ އިނގިރޭސިވިލާތުގައި މިހާރު ކުޅެމުން އަންނަ އެންމެ ހުނަރުވެރި ލެފްޓް ބެކް ކަމަށް ގިނަ ބަޔަކު ގަބޫލުކުރެއެވެ. މި ސީޒަނުގައި އެކަނިވެސް އޭނާ ވަނީ ކުޅުނު 20 މެޗުގައި ދެ ގޯލް ޖަހާ، 8 އެސިސްޓް ފޯރުކޮށްދީފައެވެ.