ކޮޗިން އެއަރޕޯޓުގަ ތާށިވި މީހުން މާލެ ގެނެސްފި
ކޮޗިން އެއަރޕޯޓުގައި ތާށިވި މީހުން ރާއްޖެ އަންނަން ފުރީ ހޯމަ ދުވަހުގެ ރޭ 11:00 ހާއިރު
ކޮޗިން އެއަރޕޯޓުގައި ތާށިވި މީހުންތައް
މޯލްޑިވިއަންގެ ފުލައިޓް ޑިލޭވެގެން ކޮޗިން އެއަރޕޯޓުގަ ތާށިވި ދިވެހިންނާއި ބިދޭސީ ޓީޗަރުން ގެނެސްފިއެވެ.
"ރާއްޖެ އެމްވީ" އަށް މަޢުލޫމާތުދެމުން މޯލްޑިވިއަނުން ބުނީ ވެލާނާ އިންޓަރނޭޝަނަލް އެއަރޕޯޓުގައި ޓްރެފިކް ބޮޑުވުމުގެ ސަބަބުން ހޯމަ ދުވަހު ކޮޗިން އިން ރާއްޖެއަށް އަންނަން އޮތް ފުލައިޓް ކެންސަލްވެގެން ކޮޗިން އެއަރޕޯޓުގަ ތާށިވި ހުރިހާ އެއްމެން ހޯމަ ދުވަހުގެ ރޭ ރާއްޖެ އައިސްފައިވާ ކަމަށެވެ.
އިންޑިއާގެ ކޮޗިން އެއަރޕޯޓުގައި، ރާއްޖެ އައުމަށް ގާތްގަޑަކަށް ދިވެހިންގެ 3 ގުރޫޕެއް ތިބިއިރު އަންގާރަ ދުވަހު ސްކޫލަށް ނުކުންނަންޖެހޭ ގިނަ ޢަދަދެއްގެ ޓީޗަރުން ތިބި ކަމަށް ކޮޗިން އެއަރޕޯޓުގަ ހުރި މީހަކު "ރާއްޖެއެމްވީ" އަށް ވަނީ މަޢުލޫމާތު ދީފައިވެއެވެ. ކޮޗިން އިން ރާއްޖެއަށް އަންނަން އޮތް ފުލައިޓް ޑިލޭވެގެން، ފުލަައިޓް ކެންސަލް ވުމަށްފަހު އެމީހުން ރާއްޖެ އައިސްފައިވަނީ ހޯމަ ދުވަހުގެ ރޭގެ ވަގުތެއްގައި މޯލްޑިވިއަންގެ އެއަރބަސްގައެވެ.
މޯލްޑިވިއަނުން ވަނީ އެއަރޕޯޓުގަ ތާށިވި މީހުންނަށް ބޭނުންވާ އެކި ކަންތައް ފޯރުކޮށްދީފައެވެ. އެގޮތުން ކެއުމާއި، ހޮޓެލް ހަމަޖައްސައިދީފައިވެއެވެ.
ފްލައިޓުތައް ޑިލޭވާ މައްސަލައާއި ގުޅޭގޮތުން "ރާއްޖެއެމްވީ" އަށް މަޢުލޫމާތުދެމުން މޯލްޑިވިއަނުން ބުނީ ފުލައިޓްތައް ޑިލޭވަމުންދާ ކަމަށާއި، އެއީ ޤަޞްދުގަ ކުރާ ކަމެއް ނޫން ކަމަށެވެ. އަދި ފުލައިޓްތައް ޑިލޭވަމުން ދަނީ މި ދުވަސްވަރުގެ ގޮތުން ކަމަށެވެ. ފުލައިޓްތައް ޑިލޭވާ މައިގަނޑޫ ސަބަބެއްގެ ގޮތުގަ މޯލްޑިވިއަނުން ފާހަގަކޮށްފައިވަނީ އެއަރޕޯޓު ބާރުބޮޑުވުމުގެ މައްސަލައެވެ.
ރަންވޭގެ މަސައްކަތަށް ރޭގަނޑުގެ ވަގުތުތަކުގައި، ރަންވޭގެ ބައެއް ބަންދުކުރުމުން ފުލައިޓްތައް ރޭގަނޑު ނުޖައްސައެވެ. އަދި ދުވާލުގަނޑީގަ ފުލައިޓްތައް ޖައްސާއިރު، މި ދުވަސް ވަރަކީ ފަތުރުވެރިކަމުގެ ޕީކް ސީޒަންކަމަށް ވުމުން، ބައެއް ފުލައިޓްތަކަށް ބޮޑެތި ޑިލޭތައް އަންނަމުންދެއެވެ.
