ހާއްސަ ޖާރޒީ އަކާއި އެކު ކުޅެން ނިކުތް ޗެލްސީއިން ނޮޓިންހަމް ފޮރެސްޓް ބަލިކޮށް އިނގިރޭސި އެފްއޭ ކަޕްގެ ހަތަރުވަނަ ބުރުން ޖާގަ ހޯދައިފިއެވެ.

ޗެލްސީގެ ދަނޑުގައި ކުޅުނު މި މެޗު ޗެލްސީއިން ކާމިޔާބުކުރީ 2-0 ގެ ނަތީޖާ އަކުންނެވެ.

މެޗުގެ ފުރަތަމަ ހާފު ފަށައިގެން ޗެލްސީއިން ދިޔައީ ނޮޓިންހަމްގެ ގޯލަށް ނުރައްކާކޮށް ހަމަލާ އުފައްދަމުންނެވެ. އެގޮތުން މެޗުގެ 6 ވަނަ މިނެޓުގައި ޗެލްސީއިން ވަނީ ލަނޑު ޖަހާ މެޗުގެ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ކަލުމް ހަޑްސަންއޮޑޯއި އެވެ. މި ލަނޑު އޭނާ ކާމިޔާބުކުރީ ޕެޑްރޯގެ އެހީތެރިކަމާއިއެކުގައެވެ. މި ލަޑަށްފަހުވެސް ޗެލްސީއިން ގެންދިޔައީ ފުލުފުލުގައި ނޮޓިންހަމްގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 33 ވަނަ މިނެޓުގައި ޗެލްސީއިން ވަނީ އިތުރު ލަނޑެއްޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ރޮސް ބާކްލީއެވެ.

މެޗުގެ ފުރަތަމަ ހާފު ނިމިގެންދިޔައީ 2-0 ގެ ނަތީޖާ އަކުން ޗެލްސީ ކުރީގައި އޮވެގެންނެވެ.

މެޗުގެ ދެވަނަ ހާފު ފަށައިގެން ދެޓީމުގެ ފަރާތުން ހަމަހަމަ ކުޅުމެއްފެނިގެންދިޔައިރު މި ހާފުގައި ވެސް ޗެލްސީއަށް ވަނީ ލަނޑު ޖަހާނެ ފުރުސަތުތަކެއްލިބި ބޭކާރުވެފައެވެ. އެގޮތުން މެޗެގެ 70 ވަނަ މިނެޓުގައި ބަޓްސުއާއީ އަށް ވަނީ ހުސްފުރުސަތެއްލިބި ބޭކާރުވެފައެވެ.

މި މެޗަށް ޗެލްސީއިން ނިކުތީ ހާއްސަ ޖާރޒީއެއްގައެވެ. އެގޮތުން 1970 ވަނަ އހަރު ޗެލްސީއިން ފުރަތަމަ ފަހަރަށް އެފްއޭ ކަޕް ހޯދިއިރު އެޓީމު ބޭނުންކުރި ޖާރޒީގެ ފަރުމާއަކަށް ބަލައިގެން ހަދައިފައިވާ މި ޖާރޒީ ލައިގެން ކުޅުނު މެޗު ބަލަން 1970 ވަނަ އަހަރު ޗެލްސީއާއި އެކު އެފްއޭ ކަޕް ކާމިޔާބުކުރި ޓީމުގެ ބައެއް ކުޅުންތެރިން ވަނީ ބައިވެރިވެފައެވެ.