އެފްއޭކަޕް: ޕޯޓް ވޭލް ބަލިކޮށް ސިޓީ ހަތަރުވަނަ ބުރަށް

އިނގިރޭސި އެފްއޭ ކަޕްގައި މެންޗެސްޓާ ސިޓީ އަދި ޕޯޓް ވޭލް ބައްދަލުކުރި މެޗު ފަސޭހަ ކަމާއިއެކު ސިޓީއިން ކާމިޔާބުކޮށްފިއެވެ.

މެންޗެސްޓާ ސިޓީގެ ދަނޑުގައި ކުޅުނު މި މެޗު ސިޓީއިން ކާމިޔާބުކުރީ 4-1 ގެ ނަތީޖާ އަކުންނެވެ.

މި މެޗު ފަށައިގެން އެންމެ ފަހުގެ ޗެމްޕިއަން ސިޓީއިން މޮޅަށް ކުޅުނުއިރު އެޓީމުން ވަނީ ފުލުފުލުގައި ޕޯޓް ވޭލްގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 19 ވަނަ މިނެޓުގައި ސިޓީއިން ވަނީ ލަނޑު ޖަހައި ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ އަލެކްސަންޑަ ޒިންޗެންކޯ އެވެ. މި ލަނޑު އޭނާ ކާމިޔާބުކުރީ ގުންޑޮގަންގެ އެހީތެރިކަމާއި އެކުގައެވެ.

މި ލަނޑަށްފަހު ވެސް ސިޓީއިން ވަނީ ޕޯޓް ވޭލްގެ ގޯލަށް ނުރައްކާ ކޮށްފައެވެ. ނަމަވެސް ސިޓީއިން ކުރި އެޓޭކްތައް ހުއްޓުވައި ޕޯޓް ވޭލްއިން ވަނީ މެޗުގެ 35 ވަނަ މިނެޓުގައި ލަނޑު ޖަހައި ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ޓޮމް ޕޯޕް އެވެ. ނަމަވެސް މެޗުގެ 42 ވަނަ މިނެޓުގައި ސިޓީއިން ވަނީ އިތުރު ލަނޑެއް ޖަހާ އަނެއްކާވެސް ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ އިތުބާރު ފޯވާޑް ސާޖިއޯ އަގުއެރޯއެވެ.

މެޗުގެ ފުރަތަމަ ހާފު ނިމިގެންދިޔައީ 2-1 ގެ ނަތީޖާ އަކުން ސިޓީ ކުރީގައި އޮވެގެންނެވެ.

މެޗުގެ ދެވަނަ ހާފު ފަށައިގެން ވެސް ސިޓީއިން ވަނީ ފުލުފުލުގައި ޕޯޓް ވޭލްގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 58 ވަނަ މިނެޓުގައި ސިޓީއިން ވަނީ އިތުރު ލަނޑެއްޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޓޭލާ ހާވުޑް ބިލިސްއެވެ. މެޗުގައި ސިޓީއިން ޖެހި ފަހު ލަނޑު މެޗުގެ 76 ވަނަ މިނެޓުގައި އެޓީމަށް ކާމިޔާބުކޮށްދިނީ ފިލް ފޯޑެންއެވެ.

މި ނަތީޖާ އާއި އެކު ސިޓީއިން ވަނީ މި މުބާރާތުގެ ހަތަރު ވަނަ ބުރުން ޖާގަ ހޯދައިފައެވެ.