ފަސޭހަކަމާއި އެކު ގުޑީސް ބަލިކޮށް، ސިފައިން ޗެމްޕިއަންކަމާއި ގާތަށް ޖެހިލައިފި

ގައުމީ ވޮލީބޯޅަ ލީގުގައި ގުޑީސް ސްޕޯޓްސް ކްލަބް އަދި ދިވެހި ސިފައިންގެ ކްލަބު ބައްދަލުކުރި މެޗު ސިފައިން ފަސޭހަކަމާއެކު ކާމިޔާބުކޮށް ޗެމްޕިއަންކަމާއި ގާތަށް ޖެހިލައިފިއެވެ.

ސިފައިން، ގުޑީސް ބަލިކުރީ ސީދާ ތިން ސެޓުންނެވެ.

މި މެޗުގަ ގުޑީސްގެ ޓީމުގެ ފަރާތުން އެންމެ އެދެވޭ ކުޅުމެއް ފެނިފައެއް ނުވެއެވެ. އެހެންނަމަވެސް މި މެޗުގަ، ސިފައިން ވަނީ ތަފާތު މޮޅު ކުޅުމެއް ދައްކާލާފައެވެ. އެގޮތުން މެޗުގެ މޮޅު ކުޅުންތެރިޔާގެ މަގާމު ހޯދި ސިފައިންގެ ޕާކިސްތާނު ކުޅުންތެރިޔާ މުބާޝަރު ރާޖާގެ އިތުރުން ތަޖުރިބާކާރު ކުޅުންތެރިޔާ އަހުމަދު އަބްދުލް ކަރީމް (ލޯންގޭ) ވަނީ މި މެޗުގައި މޮޅު ކުޅުމެއް ދައްކާފައެވެ. ސިފައިން މި މެޗުގެ ސެޓުތައް ގެންދިޔައީ 25-12، 25-17 އަދި 25-17 އިންނެވެ.

މި މުބާރާތުގަ ހޮނިހިރު ދުވަހު ހަވީރު ކުޅުނު މެޗުގައި ބައްދަލުކުރީ ޕޮލިސް ކްލަބާއި ސިޓީ އެވެ. މި މެޗު ސީދާ ތިން ސެޓުން ކާމިޔާބުކޮށް ޕޮލިހުން ވަނީ ލީގު ތާވަލުގެ ދެވަނައަށް ޖެހިލާފައެވެ. މި މެޗުގައި ޕޮލިސް ޓީމުން އެންމެ މޮޅަށް ކުޅުނީ ހުސެއިން ރަޒާންއެވެ. މި މެޗުގެ ސެޓުތައް ޕޮލިހުން ގެންދިޔައީ 25-12، 25-18 އަދި 25-11 އިންނެވެ.

ގައުމީ ވޮލީ ލީގުގެ އެއްވަނައިގަ އޮތް ސިފައިންނަށް ބާކީ އެއް މެޗު އޮތްއިރު، ސިފައިން އެއްވަނައިގަ އޮތީ 15 ޕޮއިންޓާއެކުގައެވެ. ދެވަނައިގަ އޮތް ޕޮލިސް ކްލަބަށް 13 ޕޮއިންޓް ލިބިފައިވާއިރު ތިންވަނައިގަ އޮތް ގުޑީސްއަށް ލިބިފައިވަނީ 11 ޕޮއިންޓެވެ. ސިފައިންގެ އަތުން ގުޑީސްވި ބައްޔާއެކު ގުޑީސްއަށް ތަށި ހޯދުމުގެ ފުރުސަތު ވަނީ ގެއްލިފައެވެ.