ހަތިޔާރު ހިފައިގެން ނިކުމެ ސަރުކާރު ވައްޓާލާނެ ކަމަށް ވިދާޅުވުމުން ލަތީފަށް ގިނަ ބައެއްގެ ފާޑުކިޔުން

މިސަރުކާރު ވައްޓާލަން ކެރިގެން މަގުމައްޗަށް ނިކުންނާނެ ކަމަށާއި ހަތިޔާރުތައް ތޫނުކޮށްގެން މަގުމައްޗަށް ނިކުމެ ސަރުކާރު ވައްޓާލާނެ ކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރ މުހައްމަދު ލަތީފު ވިދާޅުވުމުން ގިނަ ބައެއްގެ ފާޑުކިޔުން އޭނާއަށް އަމާޒުވެއްޖެއެވެ.

ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލާ އިދިކޮޅު ކޯލިޝަނުން ބޭއްވި ޖަލްސާއެއްގައި ވާހަކަ ދައްކަވަމުން ލަތީފުވަނީ މިސަރުކާރާއި ރައީސް އިބްރާހީމް މުހައްމަދު ޞާލިހަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވާފަ އެވެ. އެގޮތުން ޤާނޫނީ އިމުގެ ތެރެއިން މިސަރުކާރު ވައްޓާލާ ހަމަ ބިމަށް ގެންނަންޖެހޭކަމަށް ލަތީފު ތަކުރާރުކޮށް ވިދާޅުވިއެވެ. އަދި ރައީސް ޞާލިހަށް އަމާޒުކުރައްވާ ލަތީފު ތަކުރާރުކޮށް ވިދާޅުވީ ރައީސް ޞާލިހަކީ ގާބިލްކަން ނެތް ވެރިކަން ހިންގަން ނޭންގޭ ވެރިޔެއް ކަމަށެވެ.

އަބަދު މިހެން ނުތިބޭނެކަމަށާއި މަގުމައްޗަށް ނިކުންނާނީ ކެރިގެން ހިތްވަރާއެކު ކަމަށް ލަތީފު ވިދާޅުވި އެވެ.

ލަތީފު ވިދާޅުވީ މިސަރުކާރަކީ އަނިޔާވެރި ސަރުކާރެއްކަމަށެވެ. ލަތީފަކީ 18 ވަނަ ރައްޔިތުންގެ މަޖިލީހުގައި ގޮނޑި ގެއްލުނު 12 މެމްބަރުންގެ ތެރޭގައި ހިމެނިވަޑައިގެންނަވާ ބޭފުޅެކެވެ. އަމިއްލަ މެމްބަރެއްގެ ގޮތުގައި ދިއްދޫ ދާއިރާގެ ގޮނޑި ކާމިޔާބު ކުރެއްވުމަށްފަހު ފަހުން ލަތީފު ވަނީ ޕީޕީއެމް އާއި ގުޅިވަޑައިގެންފައެވެ. އޭގެފަހުން ލަތީފުވަނީ ޕީޕީއެމްއިން ވަކިވެވަޑައިގެންފައެވެ. އަދި އޭރުގެ އިދިކޮޅު ފަރާތްތައް އަދި މިހާރު ސަރުކާރު ހިންގަމުން ގެންދާ ފަރާތްތަކާއި ގުޅިވަޑައިގެންފައެވެ. ނަމަވެސް ފަހުން އަނެއްކާވެސް ލަތީފުވަނީ ޕީޕީއެމް އާއި ގުޅިވަޑައިގެންފައެވެ.

ހަތިޔާރު ތޫނުކޮށްގެން ނިކުމެ މިސަރުކާރު ވައްޓާލާނެކަމަށް ލަތީފު ވިދާޅުވުމުން ގިނަ ބައެއްގެ ފާޑުކިޔުން ލަތީފަށް ވަނީ އަމާޒުވެފައެވެ. އޭގެތެރޭގައި މަޖިލީހުގެ މެމްބަރުންވެސް ހިމެނިވަޑައިގަންނަވައެވެ. އެގޮތުން އަމިއްލަ މެމްބަރެއްގެ ގޮތުގައި މަޖިލީހުގައި އިންނަވާ ވިލިގިނލި ދާއިރާގެ މެމްބަރ ސައުދު ހުސައިން ކުރެއްވި ޓްވީޓެއްގައި ވިދާޅުވެފައިވަނީ މަގުމަތިން ސަރުކާރު ވައްޓާލާ ވާހަކަ ހުއްޓާލުމަށް އެދިވަޑައިގަންނަވާފައެވެ. އެކަމެއް ނުވާނެ ކަމަށާއި ސަރުކާރުން ގޯސްކަމެއް ކުރާނަމަ ޤާނޫނީ އިމުގެ ތެރެއިން ސަރުކާރު ޖަވާބުދާރީ ކުރުމަށް މަސައްކަތްކުރުމަކީ މައްސަލަ އެއް ނޫންކަމަށެވެ.

ލަތީފަށް ރައްދުދެއްވަމުން ފޭދޫ ދާއިރާގެ އެމްޑީޕީ މެމްބަރ މުހައްމަދު ނިހާދު ވިދާޅުވީ ސަރުކާރު ވައްޓާލަން ކަމަށް ބުނެ ވާހަކަދައްކަނީ ޕާޓީ ކުދިން ރުއްސަންކަމަށެވެ. އަދި އެފަދަ މޭރުމަކުން ވާހަކަދައްކާއިރު ޓެރަރިޒަމްގެ އަމަލު ހިންގޭއިރުވެސް ނޭނގޭކަމަށް ނިހާދު ކުރެއްވި އެހެން ޓްވީޓެއްގައި ވަނީ ވިދާޅުވެފައެވެ.

މީގެއިތުރުން ލަތީފަށް އަންނަނީ އާންމުންވެސް ފާޑުކިޔުންތައް އަމާޒުކުރަމުންނެވެ. އެގޮތުން ލަތީފު އެގޮތަށް ވާހަކަ ދެއްކެވުމަކީ ޓެރަރިޒަމްގެ އަމަލަށް ހިތްވަރުދިނުންކަމަށް ބުނެ އާންމުން އަންނަނީ ޓްވިޓަރ ގައި އެމީހުންގެ ޝުޢޫރުތައް ފާޅުކުރަމުންނެވެ.

އަދި މިއީ ހަރުކަށި ފިކުރު ފެތުރުންކަަމަށް އަނެއް ބަޔަކު ބުނަމުންދާއިރު ޕޮލިސް ޓެގްކޮށް ލަތީފު އެހެން ވިދާޅުވާ ވީޑިއޯ އަންނަނީ އާންމުން ޓްވީޓް ކުރަމުންނެވެ.