ކޯސްޓްގާޑްގެ ގިނަ އުޅަނދުތައް ވަނީ ހަލާކުވެފައި: މާރިޔާ
1 ޖެނުއަރީ 2020 | ބުދަ 03:19ކަނޑުދަތުރު ކުރުމުގައި ސަމާލުވުމަށް އިލްތިމާސް ކުރެއްްވި
ޑިފެންސް މިނިސްޓަރު މާރިޔާ އަހުމަދު ދީދީ
ޑިފެންސް މިނިސްޓަރު ކަމާއި ހަވާލުވެވަޑައިގެންނެވި އިރު ކޯސްޓްގާޑްގެ ގިނަ އުޅަނދުތައް ހުރީ ހަލާކުވެފައި ކަމަށާއި، މި ފެށުނު 2020 ވަނަ އަހަރުގައި އުޅަނދުތައް މަރާމަތު ކުރުމަށް ގިނަ މަސައްކަތްތަކެއް ކުރަން ހަމަޖެހިފައިވާ ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެެއެވެ.
ޑިފެންސް މިނިސްޓަރު އެހެން ވިދާޅުވީ، ކޯސްޓްގާޑް ހިދުމަތަށް 40 އަހަރު ފުރުމުގެ މުނާސަބަތުގައި ދެއްވި އިންޓަވިއުއެއްގައެވެ.
މާރިޔާ ވިދާޅުވީ، ކަނޑުމަތީގެ ކޮންމެ ހާދިސާއެއް ގައި ވެސް ފެނިގެންދަނީ ކޯސްޓްގާޑްގައި މަސައްކަތް ކުރާ މުވައްޒަފުންގެ ހުށިޔާރުކަން ކަމަށެވެ. ކަނޑުގަދަވެގެންދާ ދަނޑިވަޅުގައިވެސް މީހަކު ނުވަތަ ބަޔަކު ހާލުގައި ޖެހުނަސް ކޯސްޓްގާޑުން އަބަދުވެސް އެހީތެރިވަމުން އަންނަަކަން މިނިސްޓަރު ފާހަގަކުރެއްވިއެވެ.
މާރިޔާ ވިދާޅުވީ، މިނިސްޓަރު ކަމާއި ހަވާލުވެވަޑައިގެންނެވިއިރު ގިނަ އުޅަނދުތަކެއް ވަނީ ހަލާކުވެފައި ކަމަށެވެ. މި ފެށުނު 2020 ވަނަ އަހަރު ކޯސްޓްގާޑްގެ ހިދުމަތް ފުޅާކުރުމަށް ގިނަ މަސައްކަތްތަކެއް ކުރެވިގެންދާނެ ކަމަށް ވިދާޅުވިއެވެ.
ހުރިހާ ފަރާތްތަކުންވެސް ކަނޑުދަތުރު ކުރާއިރު ސަލާމަތާއި ރައްކާތެރިކަަމަށް އިސްކަންދިނުމަށް މިނިސްޓަރު މާރިޔާ އިލްތިމާސް ކުރެއްވިއެވެ. ވަކިން ހާއްސަކޮށް ކަނޑު ގަދައިރު ކުޑަކުދިން ގޮވައިގެން ނުނިކުތުމަށް މިނިސްޓަރު ވަނީ ތަކުރާރުކޮށް އިލްތިމާސްކުރައްވާފައެވެ.
