އެފްއޭ ކަޕްގައި ބައިވެރިވުމުގެ ފުރުސަތު ހުޅުވައިލައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ރާވާ އިންތިޒާމުކޮށްގެން ބާއްވާ އެފްއޭކަޕް ފުޓުބޯޅަ މުބާރާތުގައި ބައިވެރިވުމަށް ހުޅުވައިލައިފިއެވެ.

އެފްއޭއެމުން ބުނީ އެފްއޭއެމްގެ މެންބަރު ކްލަބު، ޖަމްޢިއްޔާ، ޖަމާޢަތްތަކުން 13 ޖަނަވަރީ 2020 ވަނަ ދުވަހުގެ މެންދުރު 14:30 ގެ ކުރިން މުބާރާތުގައި ބައިވެރިވުމަށް އެދޭ ފޯމު ފުރިހަމަކުރުމަށްފަހު އެފްއޭއެމަށް ހުށަހެޅުމަށް އެދޭ ކަމަށާއި، މުބާރާތާ ބެހޭ އިތުރު މަޢުލޫމާތު 14 ޖަނަވަރީ 2020 ވަނަ ދުވަހު ދޭނެ ކަމަށެވެ. އަދި މުބާރާތުގައި ބައިވެރިވުމަށް އެދޭ ފޯމު 5 ޖަނަވަރީ 2020 ވަނަ ދުވަހުން ފެށިގެން ރަސްމީ ގަޑީގައި އެފްއޭއެމުން ލިބެން ހުންނާނެ ކަމަށެވެ.

އެއްއަހަރު ދުވަހުގެ މެދު ކެނޑުމަކަށްފަހު އެފްއޭކަޕް ބޭއްވުމަށް އެފްއޭއެމުން ނިންމި އިރު މި މުބާރާތް 2017 ވަނަ އަހަރު ކާމިޔާބުކޮށްފައިވަނީ ނިއުރޭޑިއަންޓް ސްޕޯޓްސް ކްލަބެވެ. ނިއު އިން މި މުބާރާތް ކާމިޔާބުކުރީ ޕެނަލްޓީގައި 6-4 ކުން ޓީސީ ސްޕޯޓްސް ކްލަބް ބަލިކުރުމަށްފަހުގައެވެ. މިހާރު ސަސްޕެންޝަނުގައި އޮތް ނިއުރޭޑިއަންޓުން ވަނީ މި މުބާރާތުގެ ޗެމްޕިއަންކަން 12 ފަހަރު ހޯދާފައެވެ.