ޕްރިމިއަރ ލީގު: ފަހަތުން އަރައި ޗެލްސީއިން އާސެނަލް ބަލިކޮށްފި

އިނގިރޭސި ޕްރިމިއަރ ލީގުގައި ފަހަތުން އަރާ ޗެލްސީއިން އާސެނަލް ބަލިކޮށްފިއެވެ.

އާސެނަލްގެ ދަނޑުގައި ކުޅުނު މި މެޗު ޗެލްސީން ކާމިޔާބުކުރީ 2-1 ގެ ނަތީޖާއަކުންނެވެ.

މި މެޗު ފެށިގެން އާސެނަލްއިން ޗެލްސީގެ ގޯލަށް ނުރައްކާކޮށް ހަމަލާތައް އުފައްދާފައިވާއިރު މެޗުގެ 13 ވަނަ މިނެޓުގައި އާސެނަލްއިން ވަނީ ލަނޑު ޖަހައި މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދީފައި ވަނީ ޕިޔޭ އެމިރެކް އޮބަމަޔަންގ އެވެ. މި ލަނޑާއެކު އާސެނަލްއިން އެޓީމުގެ އެޓޭކްތައް ވަރުގަދަ ކުރިއެވެ. އެގޮތުން މެޗުގެ 43 ވަނަ މިނެޓުގައި އޮބަމަޔަންގ އަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ހަމަލާ ދިޔައީ ދަނޑި ކައިރިން ބޭރަށެވެ.

މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާއަކުން އާސެނަލް ކުރީގައި އޮވެގެންނެވެ.

މެޗުގެ ދެވަނަ ހާފުގައި ޗެލްސީން އެޓީމުގެ ކުޅުން ރަނގަޅު ކުރިއިރު އެޓީމުން ވަނީ މި ހާފުގައި އާސެނަލްގެ ގޯލަށް ނުރައްކާ ކޮށްފައެވެ. މެޗުގެ 83 ވަނަ މިނެޓުގައި ޗެލްސީން ވަނީ ލަނޑު ޖަހައި ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ހޮރިހިނިއޯ އެވެ. މެޗުގެ 87 ވަނަ މިނެޓުގައި އާސެނަލްގެ ޑިފެންސަށް ހެދުނު ގޯހެއްގެ ފައިދާ ނަގައި ޗެލްސީން ވަނީ އިތުރު ލަނޑެއް ޖަހާފައެވެ. މި ލަނޑު އެޓީމަށް ކާމިޔާބުކޮށް ދިނީ ވިލިއަންގެ އެހީތެރިކަމާއެކު އަބްރަހަމްއެވެ.

މި ނަތީޖާއާއެކު ޗެލްސީން ވަނީ ތާވަލުގެ ތިންވަނައިގައި އޮތް މެންޗެސްޓަރ ސިޓީއާއި ތިން ޕޮއިންޓަށް ކައިރިކޮށްފައެވެ. ޗެލްސީ ލީގު ތާވަލުގެ ހަތަރުވަނައިގަ އޮތީ ލިބުނު 35 ޕޮއިންޓާއެކުގައެވެ. ތާވަލުގެ އެއްވަނައިގަ އޮތް ލިވަރޕޫލަށް 55 ޕޮއިންޓް ލިބިފައިވާއިރު، ދެވަނައިގަ ލެސްޓަރ ސިޓީ އޮތީ 42 ޕޮއިންޓާ އެކުގައެވެ. ތިންވަނައިގަ ސިޓީ އޮތީ 38 ޕޮއިންޓާއެކުގައެވެ.