ކ. މާލެ
|
29 ޑިސެންބަރ 2019 | އާދީއްތަ 00:14
އއ. މާޅޮސް
އއ. މާޅޮސް
ޓްވިޓަރ
މާޅޮސް
މާޅޮހުން ހައްޔަރުކުރީ ހައްމާދަށް ހަމަލާދިން އާސިފުގެ ބަފައިބެ!
 
ހައްޔަރުކުރި މީހާގެ ދަރިން ސްކޫލަށް ނުފޮނުވާ އަދި ވެކްސިން ނުދޭ މައްސަލައެއް ވެސް ވަނީ ފެންމަތިވެފައި
 
ހައްޔަރު ކުރި މީހާގެ އަންހެން ދަރިއެއް އިނދެގެން އުޅެނީ ހައްމާދަށް ހަމަލާދިން އާސިފްއާއި
 
ހައްޔަރު ކުރި މީހާގެ 4 އަންހެން ދަރިން ތިބޭ، އޭގެ ތެރޭގައި 18 އަހަރު ނުފުރޭ 3 ކުދިން އެބަތިބި

ދީނީ ހަރުކަށި ފިކުރަށް ތާޢީދުކޮށް، ޝަރުޢީ ކޯޓުން ބޭރުން ދަރިންގެ ކައިވެނި ކުރުވިކަމުގެ ތުހުމަތުގައި އއ. މާޅޮހުން ހައްޔަރުކުރީ މިދިޔަ މަހު ލަނޑާނަގާ ދޯންޏެއްގައި މީހަކަށް ވަޅިން ޙަމަލާދިނުމުގެ ތުހުމަތުގައި ހައްޔަރުކުރި އިސްމާޢީލް އާސިފުގެ ބަފައިބެކަން "ރާއްޖެ" އެމްވީއަށް ކަށަވަރުވެއްޖެއެވެ.

"ރާއްޖެ އެމްވީ" އަށް އެނގިފައިވާ ގޮތުގައި މާޅޮހުން ހައްޔަރު ކުރި މީހާއަކީ ލަނޑާ ނަގާ ދޯނީގަ މިދިޔަ ނޮވެންބަރު މަހުގެ 22 ވަނަ ދުވަހު ދެމީހެއްގެ ދެމެދުގައި ހިނގި ދެބަސްވުމެއްގަ ވަޅިން ޙަމަލާދިން އިސްމާޢީލް އާސިފުގެ އަންހެނުންގެ ބައްޕަކަން ވަނީ ކަށަވަރުވެފައެވެ.

ފުލުހުން މިއަދު ބުނީ ދީނީ ހަރުކަށި ފިކުރަށް ތާޢީދުކޮށް، 18 އަހަރު ނުފުރެނީސް ޝަރުޢީ ކޯޓުން ބޭރުން ދަރިންގެ ކައިވެނި ކުރުވި މީހަކު އއ. މާޅޮހުން ހައްޔަރުކޮށްފައިވާ ކަމަށެވެ. މީގެ އިތުރުން ދަރިންނަށް ލިބެންޖެހޭ އަސާސީ ޙައްޤުތަކުން މަޙުރޫމުކޮށް، ބައެއް ދަރިން 18 އަހަރު ނުވަނިސް ކޯޓުން ބޭރުގައި ކައިވެނި ކުރުވާފައިވާކަމުގެ ތުހުމަތުތައްވެސް އޭނާގެ މައްޗަށް ވަނީ ކުރެވިފައެވެ.

މި މައްސަލައިގައި ހައްޔަރުކޮށްފައިވަނީ އުމުރުން 45 އަހަރުގެ ދިވެހި ފިރިހެނެއް ކަމަށާއި، އޭނާ ހައްޔަރުކޮށްފައިވަނީ ހޮނިހިރު ދުވަހު މެންދުރު 11:44 ހާއިރު ކަމަށް ފުލުހުން ބުނެއެވެ.

ނަމަވެސް 18 އަހަރު ނުފުރެނީސް ކޯޓުން ބޭރުގައި ކައިވެނި ކުރީ ހައްޔަރު ކުރި މީހާގެ ކޮން އަންހެން ދަރިއެއްކަމެއް ނޭނގެއެވެ. "ރާއްޖެ އެމްވީ" އަށް މަޢުލޫމާތު ލިބިފައިވާ ގޮތުގަ އެމީހާގެ 4 އަންހެން ދަރިން ތިބެއެވެ. އަދި އޭގެ ތެރެއިން އެންމެ ދޮށީ ދަރި ކައިވެނިކޮށްގެން އުޅެނީ ލަނޑާ ނަގާ ދޯނީގައި ހިނގި ދެބަސްވުމުގައި ޒަޚަމްވި ރ. މަޑުއްވަރީއަށް ނިޞްބަތްވާ ޒުވާނާއަށް ޙަމަލާދިން އިސްމާޢީލް އާސިފާއެވެ. އެ އަންހެން ކުއްޖާ ކައިވެނި ކޮށްފައިވަނީ ކޯޓުން ބޭރުގައެވެ. އަދި އެކައިވެނި ކޮށްދިނީ އެ އަންހެން ކުއްޖާގެ ބައްޕަ ކަމަށް އިތުބާރު ހުރިގޮތަކަށް މަޢުލޫމާތު ލިބެއެވެ.

އެ އަންހެން ކުއްޖާ ދިރިއުޅެމުން އަންނަނީ ރ. މަޑުއްވަރީގައެވެ. ދިނީ ޚިޔާލުތަފާތުވުންތަކުގެ ސަބަބުން ލަނޑާ ނަގާ ދޯންޏެއްގަ ރ. މަޑުއްވަރީ، ފެހިއަލި، އިސްމާއިލް ހައްމާދަށް ޙަމަލާދިން އިސްމާޢީލް އާސިފުގެ ބަންދަށް 10 ދުވަސް ކްރިމިނަލް ކޯޓުން ވަނީ މި މަހުގެ 22 ވަނަ ދުވަހު އިތުރުކޮށްދީފައެވެ.

މާޅޮހުން ހައްޔަރު ކުރި މީހާގެ ޢާއިލާއަކީ ވަކިން އެހެން މީހުންނާ އެކަހެރިކޮށް އުޅެމުން އަންނަ ޢައިލާއެއްކަމަށް ވެސް "ރާއްޖެ އެމްވީ" އަށް ވަނީ މަޢުލޫމާތު ލިބިފައެވެ. މީގެ އިތުރުން އެމީހާގެ ދަރިން ސްކޫލަށް ނުފޮނުވާ ކަމަށާއި، ވެކްސިން ވެސް ނުދޭކަމުގެ މަޢުލޫމާތު ވަނީ ލިބިފައެވެ.

ފުލުހުން އަންނަނީ މި މީހާ ހައްޔަރުކޮށް އެ މައްސަލަ ތަހުޤީޤުކުރަމުންނެވެ. މީގެ ކުރިން ރ. މަޑުއްވަރީން ވެސް ފުލުހުން ވަނީ މިފަދަ މައްސަލައެއްގަ ބަޔަކު ހައްޔަރުކޮށްފައެވެ.

ހަރުކަށި ފިކުރުތައް ފަތުރާކަމުގެ ތުހުމަތުގައި ފުލުހުންގެ ބެލުމުގެ ދަށަށް ބައެއް މީހުން ގެންގޮސް، ފުލުހުންގެ އޮޕަރޭޝަންތައް ވަރުގަދަ ކުރަމުންދާއިރު، އެފިކުރު ފަތުރަން ގިނަގުނަ ރޭވުންތައް ރާވާ، އެކަން ފެތުރުމަށްޓަކައި ބަޔަކު މަސައްކަތް ކުރަމުންދާ ކަމަށް ނެޝަނަލް ކައުންޓަރ ޓެރަރިޒަމް ސެންޓަރ (އެންސީޓީސީ) އިންވެސް ވަނީ ބުނެފައެވެ.

އެގޮތުން އެފަދަ ނުރައްކާތަކާއި މެދު ސަމާލުވެ، ހަރުކަށި ފިކުރު ފަތުރާ ފަރާތްތަކާއި ބެހޭ މަޢުލޫމާތު ސަލާމަތީ ޚިދުމަތްތަކަށް ފޯރުކޮށްދެއްވަމުން ގެންދެވުމަށް އެ ސެންޓަރުންވަނީ އިލްތިމާސްކޮށްފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ޒިހްނަތު ހަސަން
5%
5%
2%
77%
7%
5%
ކޮމެންޓް